विज्ञान संशोधनात मराठी पुस्तकांचा अभाव! इंग्रजी साहित्यावरच द्यावा लागतोय भर; अनुवादकांचीही कमतरता
सावित्रीबाई फुले पुणे विद्यापीठातील विद्यार्थ्यांनी ‘नवराष्ट्र’शी बोलताना सांगितले की, मराठी माध्यमातून विज्ञान किंवा तंत्रज्ञानाचे शिक्षण घेताना संशोधनात्मक पुस्तके मराठीत उपलब्ध आहेत का, याचा शोध घ्यावा लागतो. अनेकदा इंग्रजीतील संशोधनपर साहित्य समजणे कठीण जाते. इंटरनेटवर सर्वच संदर्भग्रंथ उपलब्ध नसतात. त्यामुळे दर्जेदार आणि संशोधनाधिष्ठित विज्ञान-तंत्रज्ञान विषयक पुस्तके मराठीत उपलब्ध व्हावीत, अशी अपेक्षा विद्यार्थ्यांनी व्यक्त केली.
शब्दसंच विकसित करण्यात मागे
प्रकाशन क्षेत्रातील तज्ज्ञांच्या मते, मराठीत विज्ञान आणि तंत्रज्ञान विषयांवरील पुस्तकांचे प्रमाण कमी असण्यामागे काही मूलभूत कारणे आहेत. विज्ञान आणि तंत्रज्ञान क्षेत्रात सातत्याने नवीन संकल्पना, शोध आणि तांत्रिक शब्दांची भर पडत असते. त्या अनुषंगाने आवश्यक असलेला मराठी शब्दसंच विकसित करण्यात आपण मागे आहोत, असे सुनिधी पब्लिशर्सचे अविनाश काळे यांनी सांगितले. काळे यांच्या मते विज्ञान आणि तंत्रज्ञान हा केवळ अभ्यासाचा विषय नसून, तो एक विचारसरणी आणि दृष्टिकोन आहे. मराठी शाळांमधील विद्यार्थ्यांमध्ये हा वैज्ञानिक दृष्टिकोन कितपत रुजवला गेला आहे, हा देखील विचार करण्याचा मुद्दा आहे. वैज्ञानिक दृष्टिकोनातून आयुष्याचा विचार करण्याची गरज असली तरी, समाजात तो मर्यादित प्रमाणात दिसून येतो. मराठी भाषकांमध्ये संशोधक आणि वैज्ञानिकांचे प्रमाण तुलनेने कमी असल्याने त्या अनुषंगाने मराठीत लेखनही मर्यादित राहिले असल्याचे त्यांनी नमूद केले.
हे सुद्धा वाचा : DCM एकनाथ शिंदे यांचा दिल्ली दौरा चर्चेत; PM मोदींसोबत दीड तास चर्चा
.png "Videos"){kind=small}
