अल्पवयीनवर अत्याचार; नराधमास १३ वर्षे कारावास
नाशिक : नाशिक तालुक्यातील विल्होळी येथील एका आठ वर्षीय अल्पवयीन मुलीवर लैंगिक अत्याचार करण्यात आला. याप्रकरणी आरोपीला नाशिक जिल्हा सत्र न्यायालयाने दोषी ठरवले. जिल्हा न्यायालयाने आरोपी साईनाथ रवींद्र थोरात (वय २७) याला विविध कलमान्वये एकूण १३ वर्षांच्या सश्रम कारावासाची आणि ८५ हजार रुपये दंडाची शिक्षा सुनावली. ही घटना १४ जानेवारी २०२६ रोजी रात्री साडेआठच्या सुमारास घडली.
आरोपी साईनाथ थोरात याने पीडित चिमुरडीला ‘गाडीवर फिरवून आणतो’ असे आमिष दाखवून तिचे अपहरण केले. तिला घरापासून सुमारे एक किलोमीटर अंतरावर असलेल्या विल्होळी माध्यमिक शाळेजवळील एका निर्जनस्थळी नेले. तेथे अंधाराचा फायदा घेत आणि ‘आरडाओरडा केल्यास ठार मारण्याची’ धमकी देऊन तिच्यावर लैंगिक अत्याचार केला होता. याप्रकरणी नाशिक तालुका पोलीस ठाण्यात गुन्हा दाखल करण्यात आला होता.
नाशिक जिल्हा सत्र न्यायालयातील जिल्हा न्यायाधीश वडणे यांनी आरोपी साईनाथ रवींद्र थोरात याला भारतीय न्याय संहिता कलम ७४ व १३७ (२) अंतर्गत दोषी ठरवून ५ वर्षे सश्रम कारावास आणि २५००० रुपये दंड, पोक्सो कायदा कलम ८ नुसार ५ वर्षे सश्रम कारावास आणि २५००० रुपये दंड, तसेच पोक्सो कायदा कलम १२ अंतर्गत ३ वर्षे सश्रम कारावास आणि १०००० रुपये दंड अशी शिक्षा सुनावली आहे.
आरोपीला 85000 रुपयांचा दंड
न्यायालयाने आरोपीला एकूण ८५००० रुपये दंड ठोठावला असून, त्यापैकी ८०००० रुपये पीडित मुलीस नुकसान भरपाई म्हणून देण्यात यावेत आणि उर्वरित ५००० रुपये सरकारी तिजोरीत जमा करावेत, असे आदेश दिले आहेत. दंडाची रक्कम न भरल्यास आरोपीला अतिरिक्त कारावासाची शिक्षाही भोगावी लागणार आहे.
तपास पथकाची कामगिरी
नाशिक तालुका पोलीस ठाण्याच्या महिला पोलीस निरीक्षक मृदुला नाईक यांनी या गुन्ह्याचा सखोल तपास करून न्यायालयात भक्कम पुरावे आणि दोषारोपपत्र सादर केले होते. सरकारी अभियोक्ता लीना चव्हाण यांनी सरकार पक्षातर्फे प्रभावीपणे बाजू मांडली. गुन्हे दोषसिद्धी विभागाचे सहाय्यक पोलिस निरीक्षक श्रीकांत पाटील आणि अश्विनी परदेशी यांनी तांत्रिक व कायदेशीर पाठपुरावा केला. पोलीस अधीक्षक बाळासाहेब पाटील आणि अपर पोलीस अधीक्षक आदित्य मिरखेलकर यांनी तपासी पथकाचे विशेष अभिनंदन केले.
.png "Videos"){kind=small}
