कौटुंबिक अडचणी दूर करण्याच्या आमिषाने फसवणूक; बिबवेवाडीतील भोंदू महिला मोनाली विधातेविरुद्ध गुन्हा दाखल

कौटुंबिक अडचणी दूर करण्याच्या आमिषाने एकाची ४५ हजार रुपयांची फसवणूक केल्याप्रकरणी बिबवेवाडी परिसरातील भोंदू महिला मोनाली विधाते हिच्यासह साथीदारांवर गुन्हा दाखल करण्यात आला आहे.

• कौटुंबिक अडचणी दूर करण्याच्या आमिषाने फसवणूक
• भोंदू महिला मोनाली विधातेविरुद्ध गुन्हा दाखल
• अनेकांची फसवणूक केल्याचा संशय

पुणे : कौटुंबिक अडचणी दूर करण्याच्या आमिषाने एकाची ४५ हजार रुपयांची फसवणूक केल्याप्रकरणी बिबवेवाडी परिसरातील भोंदू महिला मोनाली विधाते हिच्यासह साथीदारांवर गुन्हा दाखल करण्यात आला आहे. फसवणूक, तसेच जादूटोणा प्रतिबंधक कायद्यान्वये गुन्हा दाखल करण्यात आला आहे. भोंदू महिलेने अशा पद्धतीने अनेकांची फसवणूक केल्याचा संशय व्यक्त करण्यात आला आहे. याबाबत ४७ वर्षीय बिबवेवाडी पोलिस ठाण्यात तक्रार दिली आहे. तक्रारीनुसार, मोनाली विधाते, कृष्णा विधाते (दोघे रा. सुखसागरनगर, कात्रज), तसेच मोनालीचा भाऊ मयूर, अशोक बनकर, मंजू कौर यांच्याविरुद्ध गुन्हा दाखल करण्यात आला आहे.

पोलिसांच्या माहितीनुसार, तक्रारदार हे सोलापूर जिल्ह्यातील टेंभुर्णी परिसरातील रहिवासी आहे. ते बांधकाम ठेकेदार आहेत. समाज माध्यमात त्यांनी ‘गुरुवर्य मोनाली आई विधाते’ ही चित्रफीत पाहिली होती. या चित्रफितीत कौटुंबिक अडचणी, पीडा दूर करण्याचे आमिष दाखविण्यात आले होते. अशा प्रकारच्या अनेक चित्रफिती विधातेने प्रसारित केल्या होत्या. तक्रारदार हे डिसेंबर २०२५ मध्ये तिच्या संपर्कात आले. कौटुंबिक अडचणी दूर करण्याच्या आमिषाने मोनाली विधाते हिने हळदी-कुंकू, बाहुली, दोर तक्रारदाराला पाठवून दिला. त्यानंतर तिने तक्रारदाराला बिबवेवाडीतील सुखसागरनगर परिसरातील घरी बोलावले.

कौटुंबिक अडचणी दूर करण्याचे आमिष दाखविले. तक्रारदाराला मृत्यूची भीती दाखविली. पीडा दूर करण्यासाठी उतारा टाकवा लागेल, असे सांगून त्यांच्याकडून वेळोवेळी रोख आणि ऑनलाइन स्वरुपात ४५ हजार रुपये घेतले. तक्रारदाराला जिवे मारणे, तसेच मारहाण करण्याची धमकी दिल्याचे फिर्यादीत म्हटले आहे. वरिष्ठ निरीक्षक अश्विनी सातपुते तपास करत आहेत.

हे सुद्धा वाचा : बुलडाणा अर्बनच्या माजी सीईओ व विभाग व्यवस्थापिकांविरुद्ध गुन्हा दाखल; नेमकं प्रकरण काय?

कार सोडण्यासाठी ३ हजारांची लूट

नो-पार्किंगमध्ये लावलेले वाहन उचलल्यानंतर वाहनचालकाला ‘दंडा’चा धाक दाखवीत त्याच्याकडून ३ हजार रुपये खंडणी उकळल्याचा प्रकार कोरेगाव पार्कमध्ये उघडकीस आला आहे. टोइंग व्हॅनवरील चालकासह दोन कंत्राटी कर्मचाऱ्यांनी कार सोडण्यासाठी १० हजार रुपयांचा दंड भरावा लागेल, अशी भीती घातली आणि त्यातून तीन हजार रुपये उकळले. याप्रकरणी कोरेगाव पार्क पोलिस ठाण्यात गुन्हा दाखल करण्यात आला असून, गुन्हे शाखेच्या खंडणी विरोधी पथकाने टोइंग व्हॅनवरील तीन कंत्राटी कर्मचाऱ्यांच्या मुसक्या आवळल्या आहेत. आकाश नवनीत सावंत, समीर अतिक अन्सारी आणि शेख शौकत अतिक अन्सारी अशी अटक केलेल्यांची नावे आहेत. हे तिघेही शहर वाहतूक पोलिसांच्या टोइंग व्हॅनवर कंत्राटी कर्मचारी म्हणून काम करीत होते. याबाबत कोरेगाव पार्क येथील ४६ वर्षीय व्यापाऱ्याने तक्रार दिली आहे.