चिखलोली न्यायालय परिसरात अपहरणाचा प्रयत्न भोवला! तिघांविरोधात पोलीस ठाण्यात गुन्हा दाखल

चिखलोली दिवाणी व फौजदारी न्यायालय परिसरात एका व्यक्तीला काही लोक जबरदस्ती चारचाकी वाहनात कोंबण्याचा प्रयत्न करत असल्याचा धक्कादायक प्रकार समोर आला होता. याप्रकरणी आता पोलिसांनी आरोपींवर गुन्हा दाखल केला आहे.

अंबरनाथ : राज्यासह देशभरात गुन्हेगारी वाढली असून, दररोज, खून, खुनाचा प्रयत्न, लुटमार यासारख्या घटना घडत आहेत. अशातच आता एक मोठी बातमी समोर आली आहे. चिखलोली न्यायालय परिसरात अपहरणाचा प्रयत्न केल्याप्रकरणी तीन जणांविरुद्ध गुन्हा दाखल करण्यात आला आहे. मागील आठवड्यात ६ ऑगस्ट रोजी चिखलोली दिवाणी व फौजदारी न्यायालय परिसरात एका व्यक्तीला काही लोक जबरदस्ती चारचाकी वाहनात कोंबण्याचा प्रयत्न करत असल्याचा धक्कादायक प्रकार समोर आला होता. न्यायालय परिसरातील आरडाओरडा ऐकूण एका जेष्ठ वकिलाने तात्काळ धाव घेत त्या व्यक्तीला अपहरणकर्त्यांच्या तावडीतून सुखरूप सोडवले होते. या घटनेचा थरारक व्हिडीओ देखील सोशल मीडियावर व्हायरल झाला होता.

न्यायालय परिसरात घडलेल्या या प्रकारानंतर शिवाजीनगर पोलिसांनी या घटनेची गंभीर दखल घेतली. दिवसाढवळ्या न्यायालयाच्या परिसरात घडलेल्या या प्रकारामुळे न्यायालय परिसरातील सुरक्षेबाबत अनेक प्रश्न उपस्थित झाले होते. अखेर या प्रकरणी अपहरणाचा प्रयत्न झालेले फिर्यादी दिलीप पवार यांच्या तक्रारीवरून शिवाजीनगर पोलिसांनी आरोपी सिराज गाझी, अन्वर शेख आणि एका अज्ञात व्यक्ती विरोधात अपहरणाचा प्रयत्न केल्याप्रकरणी गुन्हा दाखल केला आहे.

पोलिसांनी दिलेल्या माहितीनुसार, फिर्यादी दिलीप पवार हे कुळगाव पोलिस ठाण्यात दाखल गुन्ह्याच्या सुनावणीकामी चिखलोली न्यायालयात आले होते. त्यांच्या विरोधात दाखल गुन्ह्यातील पैसे परत केले नाही म्हणून आरोपींनी चिखलोली न्यायालय परिसरातून फिर्यादी दिलीप पवार यांचे अपहरण करण्याचा प्रयत्न केला तसेच त्यांचा भाऊ संतोष यांना शिवीगाळ केली. असे फिर्यादीत नमूद आहे. याप्रकरणी गुन्हा दाखल केला आहे. या प्रकरणाचा अधिक तपास शिवाजीनगर पोलिस ठाण्याचे पोलिस उपनिरीक्षक स्वप्नील चौरे करत आहेत.

हे सुद्धा वाचा : उद्योगमंत्र्यांनी सुट्टीच्य दिवशी नव्हे, तर कामाच्या दिवशी चाकणमध्ये यावे; रोहीत पवारांचा हल्लाबोल

दारू पिण्यासाठी पैसे न दिल्याचा राग अनावर

पुण्यातून एक मोठी बातमी समोर आली आहे. दारू पिण्यास पैसे न दिल्याने तरुणाच्या डोक्यात दगड घातल्याची घटना गुलटेकडीतील डायसप्लॉट परिसरात घडली आहे. यामुळे परिसरात तणावाचे वातावरण निर्माण झाले होते. दरम्यान खुनाचा प्रयत्न केल्याप्रकरणी पोलिसांनी एकाला अटक केली. राजू शिवलिंगप्पा इककळकी (वय ३०, रा. डायसप्लाॅट, गुलटेकडी) असे गंभीर जखमी झालेल्याचे नाव आहे. याप्रकरणी प्रेम संजय काळे (वय २८, रा. डायसप्लाॅट, गुलटेकडी) याला अटक करण्यात आली आहे. याबाबत इककळकी याची आई लक्ष्मीबाई (वय ५८) यांनी स्वारगेट पोलिस ठाण्यात तक्रार दिली आहे.