शासकीय नोकरीच्या आमिषाने एकाची फसवणूक; तब्बल 5 लाखांना घातला गंडा

मुलाला शासकीय नोकरी मिळवून देण्याचे आमिष दाखवून एकाकडून पाच लाख रुपये घेऊन त्यांच्या मुलाला नोकरी न लावता फसवणूक करण्यात आल्याचा प्रकार उघडकीस आला आहे.

पुणे : राज्यात फसवणुकीचे प्रमाण वाढले आहे. राज्यातील वेगवेगळ्या भागातून फसवणुकीच्या घटना उघडकीस येत असतात. अशातचं आता पुण्यातून एक मोठी बातमी समोर आली आहे. मुलाला शासकीय नोकरी मिळवून देण्याचे आमिष दाखवून एकाकडून पाच लाख रुपये घेऊन त्यांच्या मुलाला नोकरी न लावता फसवणूक करण्यात आल्याचा प्रकार उघडकीस आला आहे. याप्रकरणी एकावर गुन्हा दाखल केला आहे. याप्रकरणी विशाल किसनराव साळी (वय ५२, रा. गणेशनगर, वडगाव शेरी) यांनी चंदननगर पोलीस ठाण्यात तक्रार दिली आहे. त्यानुसार, विजय मुरलीधर जाधव (वय ४५, रा. येरवडा) याच्यावर गुन्हा दाखल केला आहे.

पोलिसांच्या माहितीनुसार, साळी यांची जाधव याच्याशी एका त्रयस्त व्यक्तीमार्फत मार्च २०२३ मध्ये ओळख झाली होती. तेव्हा त्याने साळी यांना त्यांच्या मुलाला शासकीय कार्यालयात नोकरी लावून देतो, असे आमिष दाखविले. नंतर त्यांच्याकडून नोकरी लावण्याच्या कारणाने वेळोवेळी पाच लाख रुपये घेतले. पैसे घेतल्यानंतर देखील मुलाला नोकरी लागली नाही. साळी यांनी त्याच्याकडे विचारणा केली. तेव्हा त्याने उडवाउडवीच उत्तरे दिली. फसवणूक झाल्याचे लक्षात आल्यानंतर त्यांनी नुकतीच पोलिसांकडे तक्रार दिली. सहायक पोलीस निरीक्षक प्रशांत माने अधिक तपास करत आहेत.

लष्करात भरती करण्याच्या बहाण्याने फसवणूक

गेल्या काही दिवसाखाली महाराष्ट्रातील मुलांना लष्करात भरती करण्याचे आमिष दाखवून प्रत्येक उमेदवाराकडून प्रत्येकी तीन लाख रुपये घेऊन लष्करात नोकरी लावतो म्हणून फसवणूक करणाऱ्या तोतया लष्करी जवानावर बंडगार्डन पोलिस ठाण्यात गुन्हा दाखल करण्यात आला आहे. मिलिटरी इंटेलिजन्स आणि वन गार्डन पोलीस यांनी ही संयुक्त कारवाई केली आहे. नितीन बालाजी सुर्यवंशी (रा.मु. पो. हेळंब, तालुका देवणी, जिल्हा लातुर) असे बोगस जवानांचे नाव आहे. याबाबत भरत रमेश महाटे (वय 23, रा. नागराळ, तालुका – मुखेड, जिल्हा नांदेड गोंधळेनगर, हडपसर) यांनी फिर्याद दिली आहे. हा प्रकार 13 ऑगस्ट 2024 रोजी ते आज रोजी पर्यंत सदर्न कमांड कैंटीन व सब एरीया कैंटीन कॅप परिसर येथे घडला आहे. यामध्ये फिर्यादीची 1 लाख 75 हजारांची फसवणूक करण्यात आली.

कोथरुडमधील व्यक्तीला ३० लाखाला गंडा

कोथरूड भागातील एका नोकरदार व्यक्तीला सायबर चोरट्यांनी टास्क तसेच युट्यूबला लाईक्स मिळवून देण्यासाठी तसेच ऑनलाइन पद्धतीने कामाची संधी (ऑनलाइन टास्क) असल्याच्या आमिषाने २९ लाख ६३ हजार रुपयांना गंडा घातला आहे. याप्रकरणी अज्ञात चोरट्यांवर कोथरुड पोलिसांनी गुन्हा दाखल केला. याबाबत ५३ वर्षीय व्यक्तीने तक्रार दिली आहे. वरिष्ठ पोलीस निरीक्षक संदीप देशमाने तपास करत आहेत.