गुंतवणुकीच्या आमिषाने कोथरुडमधील नागरिकाची फसवणूक; तब्बल 23 लाखांना घातला गंडा

शेअर बाजारात गुंतवणुकीच्या आमिषाने ज्येष्ठ नागरिकाची २३ लाख रुपयांची फसवणूक केल्याचा प्रकार उघडकीस आला आहे. याबाबत ६८ वर्षीय ज्येष्ठ नागरिकाने अलंकार पोलीस ठाण्यात तक्रार दिली आहे.

पुणे : देशभरात फसवणुकीचे प्रमाण वाढले आहे. देशातील वेगवेगळ्या भागातून फसवणुकीच्या घटना दररोज उघडकीस येत असतात. अशातचं आता पुण्यातून एक मोठी बातमी समोर आली आहे. शेअर बाजारात गुंतवणुकीच्या आमिषाने ज्येष्ठ नागरिकाची २३ लाख रुपयांची फसवणूक केल्याचा प्रकार उघडकीस आला आहे. याबाबत ६८ वर्षीय ज्येष्ठ नागरिकाने अलंकार पोलीस ठाण्यात तक्रार दिली आहे.

पोलिसांच्या माहितीनुसार, तक्रारदार ज्येष्ठ नागरिक कोथरूड भागात राहायला आहेत. त्यांच्या मोबाइलवर जानेवारी महिन्यात संदेश पाठविला होता. शेअर बाजारात गुंतवणूक केल्यास चांगला परतावा मिळेल, असे आमिष चोरट्यांनी दाखविले होते. त्यानुसार चोरट्यांच्या बँक खात्यात वेळोवेळी २३ लाख रुपये जमा केले. सुरुवातीला त्यांना परताव्याच्या स्वरुपात काही रक्कम दिली. नंतर चोरट्यांनी त्यांन परतावा दिला नाही, तसेच त्यांचे मोबाइल बंद केल्याचे लक्षात आले.

फसवणूक झाल्याचे उघडकीस आल्यानंतर त्यांनी पोलिसांकडे तक्रार दिली. वरिष्ठ निरीक्षक सुनीता रोकडे अधिक तपास करत आहेत. अशाच पद्धतीने चोरट्यांनी कोथरूड भागातील हॅप्पी कॉलनीत राहणाऱ्या एका ५६ वर्षीय नागरिकाची दोन लाख ८३ हजार रुपयांची फसवणूक केली आहे.

ऑनलाइन टास्कच्या आमिषाने महिलेची फसवणूक

गेल्या काही दिवसाखाली ऑनलाइन काम देण्याच्या आमिषाने महिलेची १० लाख २६ हजार रुपयांची फसवणूक करण्यात आली आहे. याप्रकरणी ४२ वर्षीय महिलेने सिंहगड रोड पोलिसांत तक्रार दिली आहे. तक्रारदार महिला नऱ्हे येथे राहते. सायबर चोरट्यांनी त्यांच्या मोबाइलवर संपर्क साधला. सोशल मिडीयावर पोस्ट, व्हिडीओ व ग्राफिक्स याला व्ह्यू मिळवून दिल्यास चांगला परतावा मिळेल, असे आमिष दाखविले. चोरट्यांनी महिलेला प्रथम एक काम दिले. ते पुर्ण केल्यानंतर महिलेला सुरुवातीला पैसेही दिले. त्यामुळे महिलेचा विश्वास बसला. नंतर चोरट्यांनी महिलेला आणखी रक्कम गुंतविण्यास सांगितले. महिलेने १० लाख २६ हजार रुपये गुंतवले. त्यानंतर चोरट्यांनी महिलेला परतावा न देता तिची फसवणूक केली. गुन्हे शाखेचे पोलीस निरीक्षक उत्तम भजनावळे तपास करत आहेत.