सावंतवाडीत ‘ओटी’ भरण्याच्या बहाण्याने लूट; संशयास्पद महिला अन् डिलिव्हरी बॉईजवर कारवाई करण्याची मागणी

सावंतवाडी शहरात सध्या श्रद्धेचा गैरफायदा घेऊन नागरिकांना लुटणारी एक टोळी सक्रिय झाली आहे. या टोळीवर पोलिसांनी तातडीने कारवाई करावी, अशी मागणी आता जोर धरू लागली आहे.

सावंतवाडी : सावंतवाडी शहरात सध्या श्रद्धेचा गैरफायदा घेऊन नागरिकांना लुटणारी एक टोळी सक्रिय झाली आहे. ‘ओटी भरा’ असा बनाव करून घरोघरी जाणाऱ्या संशयास्पद महिला आणि शहरात रेकी करणाऱ्या डिलिव्हरी बॉईजवर पोलिसांनी तातडीने कारवाई करावी, अशी मागणी आता जोर धरू लागली आहे.

 

मिळालेल्या माहितीनुसार, शहरात चार महिलांची एक टोळी फिरत आहे. यातील एक महिला अंध असल्याचे भासवले जाते, तर इतर तीन महिला सोबत असतात. या महिला घरासमोर येऊन ‘ओटी भरा’ अशी विनंती करतात. मात्र, एकदा का त्यांना घरात प्रवेश मिळाला की त्या थेट ५ हजार रुपयांची अवास्तव मागणी करतात. पैसे देण्यास नकार दिल्यास या महिला हुज्जत घालतात आणि जबरदस्तीने ५०० ते १००० रुपये घेतल्याशिवाय तिथून हलत नाहीत. या आक्रमक पवित्र्यामुळे शहरातील नागरिकांमध्ये, विशेषतः महिलांमध्ये भीतीचे वातावरण आहे.

डिलिव्हरी बॉईजकडून ‘रेकी’ची शक्यता?

केवळ महिलाच नव्हे, तर डिलिव्हरी बॉय म्हणून शहरात वावरणाऱ्या काही नवीन तरुणांच्या हालचालीही संशयास्पद असल्याचे समोर आले आहे. हे तरुण विविध सोसायट्यांमध्ये जाऊन कोणती घरे बंद आहेत?, कोणत्या घरात वृद्ध व्यक्ती एकट्या राहतात? याची माहिती (रेकी) काढत असल्याचा संशय व्यक्त केला जात आहे. या माहितीचा वापर करून भविष्यात मोठ्या चोरीच्या घटना घडण्याची दाट शक्यता वर्तवण्यात येत आहे.

हे सुद्धा वाचा : आंबेगावात युरिया खताची तीव्र टंचाई; शेतकऱ्यांच्या लांबच लांब रांगा

पोलिसांकडे आक्रमक मागणी

या गंभीर प्रकाराची दखल घेत भाजपा कार्यकर्ते विराग मडकईकर यांनी सावंतवाडी पोलिसांना निवेदन दिले आहे. पोलिसांनी शहरात फिरणाऱ्या अशा संशयास्पद महिला आणि परप्रांतीय किंवा बाहेरील तरुणांची तातडीने चौकशी करावी. पूर्वसूचना न देता पैसे गोळा करणाऱ्यांवर निर्बंध घालावेत आणि त्यांची पूर्ण ओळख पटल्याशिवाय त्यांना शहरात फिरू देऊ नये, अशी मागणी मडकईकर यांनी केली आहे. तसेच घराबाहेर अनोळखी व्यक्ती दिसल्यास किंवा असा प्रकार घडल्यास त्वरित पोलीस प्रशासनाशी संपर्क साधावा आणि सावध राहावे, असे आवाहन केले आहे.