पुण्यात 17 व्या मजल्यावरून उडी मारून मुलीची आत्महत्या; धक्कादायक कारणही आलं समोर
पुणे : राज्यासह देशभरात आत्महत्येच्या घटनांमध्ये मोठी वाढ झाली आहे. अशातच आता पुण्यातून एक धक्कादायक बातमी समोर आली आहे. ‘शेजारच्या मुलासोबत का बोलतेस’ या शुल्लक कारणावरून सातत्याने मित्राकडून होणारा त्रास तसेच त्याच्या धमक्यांना कंटाळून १७ वर्षीय मुलीने इमारतीच्या टेरेसवरून उडी मारून आत्महत्या केल्याचा खळबळजनक प्रकार समोर आला आहे. मुलीने १७ व्या मजल्यावरून उडी मारल्याचे पोलिसांनी सांगितले. दरम्यान, याप्रकरणी पोलिसांनी एका तरुणाला अटक केली आहे.
साक्षी शिवाजी आवटे (वय १७, रा. बालेवाडी) असे आत्महत्या केलेल्या मुलीचे नाव आहे. याप्रकरणी गोरख सुग्रिव गोरे (वय २१, रा. बालेवाडी) याला अटक करण्यात आली आहे. याबाबत साक्षीच्या भावाने बाणेर पोलिस ठाण्यात तक्रार दिली आहे. ही घटना शनिवारी सकाळी घडली आहे.
पोलिसांनी दिलेल्या माहितीनुसार, साक्षी बालेवाडीतील सावळे हॉस्पीटलच्या पाठिमागील बाजूस राहत होती. ती घरकाम करत होती. गोरख हा तिला गेल्या तीन ते चार वर्षांपासून ओळखत होता. त्यांच्यात मैत्री होती. गोरखही खासगी कामे करत होता. या गोरखकडे त्याच्याकडे साक्षीचे काही फोटो होते. हे फोटो तो व्हायरल करण्याची धमकी देत होता.
दरम्यान, साक्षी तिच्या घराशेजारी राहणाऱ्या एका मुलाशी बोलत होती. त्याचा राग गोरख याला होता. त्यावरून तो तिच्याशी वाद घालत असत. तिला तु त्या मुलाशी का बोलतेस असे म्हणत असत. त्यावरून तिला त्रास देत होता. तिला घरी येऊनही शिवीगाळ करत असत. त्याने साक्षीला फोटो व्हायरल करण्याची धमकी दिली. या सततच्या त्रासाला कंटाळून साक्षीने ती काम करत असलेल्या कुणाल एक्सपायरी या बहुमजली इमारतीच्या १७ व्या मजल्यावरून उडी मारून आत्महत्या केली आहे. अधिक तपास पोलिस निरीक्षक अलका सरग करत आहेत.
.png "Videos"){kind=small}
