मासेमारी करताना दुर्दैवी घटना; वीज कोसळून २७ वर्षीय तरुणाचा मृत्यू

खेड तालुक्यातील भामा आसखेड धरणाच्या कडेला मासेमारी करणाऱ्या तरुणाचा वीज कोसळून मृत्यू झाल्याची घटना सोमवारी घडली आहे. संतोष गुलाब खांडवे असे मृत्यू झालेल्या तरुणाचे नाव आहे.

पुणे : विजेच्या कडकडाटांसह मुसळधार पाऊस पडत असतानाच खेड तालुक्यातील भामा आसखेड धरणाच्या कडेला मासेमारी करणाऱ्या तरुणाचा वीज कोसळून मृत्यू झाल्याची घटना सोमवारी घडली आहे. संतोष गुलाब खांडवे असे मृत्यू झालेल्या तरुणाचे नाव आहे. याप्रकरणी खेड पोलिसांत घटनेची नोंद करण्यात आली आहे.

खेड पोलिसांच्या माहितीनुसार, खेड तालुक्यातील मौजे पाईट-रोंधळवाडीत भामा आसखेड धरण आहे. या धरावर मासेमारी करण्यास मोठ्या प्रमाणात तरुण असतात. दरम्यान, खांडवे सोमवारी दुपारी अडीचच्या सुमारास मासेमारी करत होता. त्या वेळी अचानक त्याच्या अंगावर वीज कोसळली. वीज कडाडण्याचा आवाज ऐकून ग्रामस्थांनी तेथे धाव घेतली. तेव्हा खांडवे जळालेल्या अवस्थेत सापडला. त्याला मित्रांनी तातडीने पाईट गावातील प्राथमिक आरोग्य केंद्रात नेले. उपचारांपूर्वीच त्याचा मृत्यू झाल्याची माहिती वैद्यकीय तज्ज्ञांनी दिली.

या घटनेची माहिती मिळताच मंडल अधिकारी एम. एस. सुतार, ग्राम महसूल अधिकारी एम. जी. क्षीरसागर, पाईट ग्रामपंचायत अधिकारी ए. एन. फुलपगर, उपसरपंच जयसिंग दरेकर, दीपक डांगले, अनिल रौंधळ, विपुल खेंगले, कबीर रौंधळ, हरिभाऊ रौंधळ, नवनाथ डांगले यांनी घटनास्थळी भेट दिली. प्रशासनाकडून घटनास्थळाचा पंचनामा करण्यात आला आहे. खांडवे याच्या कुटुंबीयांना शासनाकडून तातडीने आर्थिक मदत मिळावी, तसेच पाईट परिसरात वीज प्रतिबंधक मनोरा बसविण्यात यावा, अशी मागणी जयसिंग दरेकर यांनी केली आहे.

हे सुद्धा वाचा : पुण्यात दुर्दैवी घटना; अंगावर झाड कोसळून दुचाकीस्वाराचा मृत्यू

दौंडमध्ये भिंत कोसळून ज्येष्ठ महिलेचा मृत्यू

दौंडमध्ये दुकानाचा काही भाग कोसळून ज्येष्ठ महिलेचा मृत्यू झाल्याची घटना सोमवारी घडली आहे. या घटनेत ताराबाई विश्वचंद्र आहेर (वय ७५) या मृत्यू झाला आहे. आहेर यांचे दौंडमधील छत्रपती शिवाजी महाराज चौकात वैष्णवी फ्लावर मार्ट दुकान आहे. सोमवारी सकाळी साडेअकराच्या सुमारास आहेर या दुकानात थांबल्या होत्या. दुकानातील भिंतीचा जीर्ण झालेला भाग आहेर यांच्या अंगावर कोसळून त्या गंभीर जखमी झाल्या. त्यांना तातडीने दौंडमधील उपजिल्हा रुग्णालयात उपचारांसाठी दाखल करण्यात आले. उपचारांदरम्यान त्यांचा मृत्यू झाला, अशी माहिती दौंड पोलीस ठाण्याचे पोलीस निरीक्षक गोपाळ पवार यांनी दिली. तहसीलदार ममता भंडारे यांना घटनेची माहिती कळविण्यात आली.