Daund Murder : दौंडमध्ये 70 वर्षीय महिलेचा धारदार शस्त्राने खून; 12 तासात 2 आरोपींना ठोकल्या बेड्या

दौंड शहरात एका ७० वर्षीय वृद्ध महिलेचा निर्घृण खून झाल्याची खळबळजनक घटना घडली आहे. पोलिसांनी या प्रकरणात केवळ १२ तासांच्या आत २ आरोपींना अटक करून मोठी कामगिरी केली आहे.

दौंड : राज्यासह देशभरात गुन्हेगारी वाढली असून, वाढत्या गुन्हेगारीमुळे नागरिकांमध्ये भिती निर्माण होत आहे. अशातच आता एक मोठी बातमी समोर आली आहे. दौंड शहरात एका ७० वर्षीय वृद्ध महिलेचा निर्घृण खून झाल्याची खळबळजनक घटना घडली आहे. पोलिसांनी या प्रकरणात केवळ १२ तासांच्या आत २ आरोपींना अटक करून मोठी कामगिरी केली आहे. हत्येचे कारण अद्याप स्पष्ट झालेले नाही, अशी माहिती पोलिसांनी दिली.

याबाबत दौंड पोलीसांनी दिलेली अधिक माहिती अशी की, दौंड पोलीस ठाण्याच्या हद्दीतील सुमन किसन शिंदे (वय ७०, रा. आर.बी. १ नगरमोरी, दौंड) या ज्येष्ठ महिलेचा धारधार शस्त्राने खुन झाल्याची घटना पोलीस बुधवारी (दि. १९ ) रोजी दुपारी ३:१५ वाजण्याच्या सुमारास घडली आहे. मयत महिलेची मुलगी तृप्ती सचिन हिरवे ( वय ४५, रा. रामलिंग रोड, शिरूर )यांना त्यांचे मामा अशोक धोंडीबा पोळ यांनी फोन करून खुनाची माहिती दिली. फिर्यादी आपल्या पतीसह दौंड उपजिल्हा रुग्णालयात गेल्या असता त्यांनी सदर मृतदेह आपल्या आईचा असल्याचे सांगितले.

प्राथमिक माहितीनुसार अज्ञात आरोपीने धारदार हत्याराने गळ्यापासून शिरच्छेद करून खून केला आणि पुरावा नष्ट करण्याच्या हेतूने शिर वेगळ्या ठिकाणी नेऊन टाकले. या प्रकरणी दौंड पोलीस ठाण्यात अज्ञात आरोपीविरुद्ध खुनासह गंभीर गुन्हा दाखल करण्यात आला आहे. गुन्ह्याची गंभीरता लक्षात घेऊन दौंड पोलीस स्टेशन आणि पुणे ग्रामीण स्थानिक गुन्हे अन्वेषण शाखा यांची स्वतंत्र पथके तयार करण्यात आली.  या पथकाने तपासा दरम्यान दोन संशयितांना ताब्यात घेतले आहे. विकी उर्फ विक्रम धनराज अल्हाट, (रा. समतानगर, दौंड) व प्रसाद बाबूलाल चव्हाण, (रा. आर.बी. १ नगरमोरी, दौंड) अशी या संशयित आरोपींची नावे आहेत. चौकशीत दोघांनी गुन्ह्याची कबुली दिल्याने त्यांना अटक करण्यात आली आहे. या गुन्ह्याचा पुढील तपास पोलीस उपनिरीक्षक लोकरे हे करीत आहेत.

दौंड पोलीस निरीक्षक हेमंत शेडगे, स्थानिक गुन्हे अन्वेषण शाखेचे पोलीस निरीक्षक प्रमोद क्षीरसागर, सहाय्यक पोलीस निरीक्षक अमोल गवळी, विनायक सपाटे, पोलीस उपनिरीक्षक रुपेश कदम, ज्ञानेश्वर राऊत, सहाय्यक फौजदार आसिफ शेख, सचिन घाडगे, पांडुरंग थोरात, पोलीस हवालदार गुरुनाथ गायकवाड, सुभाष राऊत, विकास कापरे, नितीन बोराडे, धनंजय गाढवे, निखिल जाधव, आमिर शेख, किरण पांढरे, महेंद्र लोहार, पवन माने, सोमनाथ चौंडे, निखील पवार, हजारे, अक्षय कुंभार, ओमनाथ तुमकुटे, तांबोळी आदींच्या पथकाने ही कामगिरी केली आहे. पुढील तपास सुरू असून हत्येचे कारण अद्याप स्पष्ट झालेले नाही, अशी माहिती पोलिसांनी दिली.

हे सुद्धा वाचा : वडगाव मावळात प्रतिबंधित अन्नपदार्थांचा ७.९७ लाखांचा साठा जप्त, दोघांना अटक; अन्न व औषध प्रशासनाची मध्यरात्री धडक कारवाई