भरधाव टेम्पोच्या धडकेत दुचाकीवरील महिलेचा मृत्यू; दोन लहान मुले जखमी
पुणे : लोहगाव परिसरात भरधाव टेम्पोने दिलेल्या धडकेत दुचाकीवरील सहप्रवासी महिलेचा मृत्यू झाला. तर दोन लहान मुले आणि महिलेचा पती जखमी झाला आहे. रुक्मिणी राजू चव्हाण (वय २९, रा. वडगाव शिंदे रस्ता, लोहगाव ) असे मृत्यू झालेल्या महिलेचे नाव आहे. अपघातात चव्हाण यांची दोन लहान मुले जखमी झाले. याबाबत राजू चव्हाण (वय ३३) यांनी विमानतळ पोलिसांत तक्रार दिली आहे. त्यानुसार, टेम्पोचालकावर गुन्हा दाखल करण्यात आला आहे.
पोलिसांच्या माहितीनुसार, दुचाकीस्वार राजू, त्याची पत्नी रुक्मिणी व मुले लोहगाव भागातून ४ जुलै रोजी रात्री अकराच्या सुमरास निघाले होते. धानोरी जकात नाक्याजवळ भरधाव टेम्पोने दुचाकीला धडक दिली. अपघातात दुचाकीवरील सहप्रवासी रुक्मिणी आणि त्यांची दोन मुले जखमी झाली. रुक्मिणी यांच्या डोक्याला गंभीर दुखापत झाली. जखमी मुलांसह रुक्मिणी यांना तातडीने खासगी रुग्णालयात दाखल केले. उपचारांदरम्यान रुक्मिणी यांचा मृत्यू झाला. मुलांवर रुग्णालयात उपचार सुरू असल्याची माहिती पोलिसांनी दिली. अपघातानंतर पसार झालेल्या टेम्पो चालकाचा शोध घेतला जात आहे. पोलिस कर्मचारी वाय. एस. चव्हाण तपास करत आहेत.
कारच्या धडकेत ज्येष्ठाचा मृत्यू
पाटील इस्टेट भागात भरधाव कारच्या धडकेत पादचारी ज्येष्ठाचा मृत्यू झाल्याची घटना घडली आहे. अपघातात मृत्यू झालेल्या ज्येष्ठ नागरिकाची ओळख मात्र पटू शकलेली नाही. ज्येष्ठाचे वय अंदाजे ६५ वर्ष असून, त्यांची अद्याप ओळख पटलेली नाही. याप्रकरणी खडकी पोलिसांत कार चालकाविरूद्ध गुन्हा नोंद केला आहे. ४ जुलै रोजी रात्री साडेदहाच्या सुमारास ही घटना घडली आहे. पोलीस उपनिरीक्षक गाडेकर तपास करत आहेत.
हे सुद्धा वाचा : पोलीस की, खंडणीखोर! कारवाईच्या धाकाने तीनवेळा उकळले पैसे
मगरपट्टा रस्त्यावर दुचाकीस्वार युवकाचा मृत्यू
मगरपट्टा रस्त्यावर भरधाव वाहनाच्या धडकेत दुचाकीस्वार युवकाचा मृत्यू झाल्याची घटना घडली आहे. मंगेश पांडुरंग चामनर (वय १७, रा. गवळी वाडा, साईनाथनगर, वडगाव शेरी) असे मृत्यू झालेल्या दुचाकीस्वाराचे नाव आहे. याबाबत दत्ता सुरनर (वय ३४, रा. वडगाव शेरी) यांनी हडपसर पोलिसांत तक्रार दिली आहे. दुचाकीस्वार मंगेश १ जुलै रोजी मगरपट्टा रस्त्याने सकाळी साडेसातच्या सुमारास निघाला होता. अमनोरा मॉलजवळ भरधाव वाहनाने दुचाकीस्वार मंगेशला धडक दिली. अपघातानंतर वाहनचालक घटनास्थळी न थांबता पसार झाला. उपचारांपूर्वीच मंगेश यांचा मृत्यू झाला होता.
.png "Videos"){kind=small}
