पुण्यात भीषण अपघात; चाकाखाली सापडून दुचाकीस्वार तरुणाचा जागीचं मृत्यू

पुणे जिल्ह्यातून एक मोठी बातमी समोर आली आहे. गणेशखिंड रस्त्यावर भरधाव दुचाकीस्वाराचा अपघातात मृत्यू झाल्याची घटना घडली आहे.

पुणे : राज्यात अपघाताचे प्रमाण वाढले आहे आहे. राज्यातील वेगवेगळ्या भागातून अपघाताच्या घटना उघडकीस येत असतात. अशातचं आता पुणे जिल्ह्यातून एक मोठी बातमी समोर आली आहे. गणेशखिंड रस्त्यावर भरधाव दुचाकीस्वाराचा अपघातात मृत्यू झाल्याची घटना घडली आहे. भरधाव दुचाकीस्वार तरुण मेट्रोचे साहित्य वाहतूक करणाऱ्या ट्रेलर, तसेच पीएमपी बसवर आदळला.

भरधाव वेगामुळे नियंत्रण सुटल्याने अपघात घडल्याची माहिती चतु:शृंगी पोलिसांनी दिली. विकास देवीदास कांबळे (वय २७, रा. गल्ली क्रमांक १४, जनता वसाहत, पर्वती पायथा ) असे मृत्यू झालेल्या दुचाकीस्वाराचे नाव आहे. याबाबत सहायक निरीक्षक सचिन कारंडे यांनी चतु:शृंगी पोलीस ठाण्यात तक्रार दिली आहे.

पोलिसांच्या माहितीनुसार, दुचाकीस्वार विकास कांबळे हा ४ फेब्रुवारी रोजी मध्यरात्री एकच्या सुमारास गणेशखिंड रस्त्याने निघाला होता. कॉसमॉस बँकेसमोर दुचाकीस्वार कांबळेचे नियंत्रण सुटले. शिवाजीनगरकडे निघालेल्या मेट्रो साहित्याची वाहतूक करणारा ट्रेलर आणि पीएमपी बसवर तो आदळला. चाकाखाली सापडून त्याचा जागीच मृत्यू झाला. अधिक तपास पोलीस उपनिरीक्षक मीरा चव्हाण करत आहेत.

भरधाव दुचाकीच्या धडकेत नागरिकाचा मृत्यू

भरधाव दुचाकीच्या धडकेत गंभीर जखमी झालेल्या ज्येष्ठ नागरिकाचा उपचारादरम्यान मृत्यू झाला आहे. हडपसर भागात ही घटना घडली आहे. याप्रकरणी दुचाकीस्वारावर काळेपडळ पोलिसांत गुन्हा दाखल केला आहे. सुधाकर दादाराव झांबरे (वय ८०, रा. हांडेवाडी रस्ता, हडपसर) असे मृत्यू झालेल्या ज्येष्ठाचे नाव आहे. याप्रकरणी दुचाकीस्वार रमेश सदाशिव वाडकर (रा. हांडेवाडी रस्ता हडपसर) याच्यावर गुन्हा दाखल केला. याबाबत झांबरे यांच्या पत्नी शांता झांबरे (वय ७०) यांनी तक्रार दिली आहे.

हे सुद्धा वाचा : पुण्यात लुटमार करणाऱ्या चोरट्यांचा धुमाकूळ; दोघांनी तरुणाच्या डोक्याला बंदूक लावली अन्…

पाषाण भागात पादचाऱ्याचा मृत्यू

भरधाव वाहनाच्या धडकेत पादचारी तरुणाचा मृत्यू झाल्याची घटना घडली आहे. आशिषकुमार सर्वानंद उपाध्याय (वय २६, रा. पिंपळे गुरव) असे मृत्यू झालेल्या तरुणाचे नाव आहे. याबाबत आशिषकुमार यांचा भाऊ अभिषेकुमार (वय ३१) यांनी चतु:शृंगी पोलिसांत तक्रार दिली आहे. पोलिसांच्या माहितीनुसार, ७ फेब्रुवारी रोजी रात्री दहाच्या सुमारास आशिषकुमार पाषाण रस्त्यावरून निघाले होते. त्यावेळी ‘डीआरडीओ’ संस्थेच्या प्रवेशद्वारासमोर भरधाव वाहनाने त्यांना धडक दिली. अपघातानंतर घटनास्थळी न थांबता वाहनचालक पसार झाला. गंभीर जखमी झालेल्या आशिषकुमार यांचा उपचारांपूर्वीच मृत्यू झाला होता. पोलीस उपनिरीक्षक श्यामल पाटील तपास करत आहेत.