जमिनीचा वाद अन् हत्येची सुपारी! व्यावसायिकावर कटरने हल्ला; पुण्यातील घटनेनं खळबळ

राज्यासह देशभरात गुन्हेगारी वाढली असून, अशातच आता पुण्यातून एक मोठी बातमी समोर आली आहे. जमिनीच्या वादातून व्यावसायिकाचा खून करण्यासाठी ५० हजार रुपयांची सुपारी दिल्याचा प्रकार उघडकीस आला आहे.

• व्यावसायिकाच्या हत्येसाठी ५० हजारांची सुपारी 
• कटरने हल्ला केल्याप्रकरणी दोघे ताब्यात
• मुख्य आरोपी प्रवीण सूर्यवंशीचा शोध सुरू

पुणे : राज्यासह देशभरात गुन्हेगारी वाढली असून, अशातच आता पुण्यातून एक मोठी बातमी समोर आली आहे. जमिनीच्या वादातून व्यावसायिकाचा खून करण्यासाठी ५० हजार रुपयांची सुपारी दिल्याचा प्रकार उघडकीस आला असून, या प्रकरणात सहकार आयुक्त कार्यालयातील सुनावणी संपवून वकिलासोबत जाताना संबंधित व्यावसायिकावर दुचाकीवरून आलेल्या दोघांनी धारदार कटरने वार करून त्यांना गंभीर जखमी केले होते. याप्रकरणी बंडगार्डन पोलिसांनी एका तरुणाला अटक केली असून, त्याच्या अल्पवयीन साथीदाराला ताब्यात घेतले आहे.

 

आनंद बाबा गव्हाणे (वय १९, रा. गुलटेकडी) असे अटक करण्यात आलेल्याचे नाव आहे. तर, या हल्ल्यात व्यवसायिक जीवन रंगराव सूर्यवंशी (वय ५५, रा. धाराशिव) हे जखमी झाले आहेत. बंडगार्डन पोलिस ठाण्याचे वरिष्ठ निरीक्षक संतोष पांढरे, गुन्हे निरीक्षक विनोद सलगरकर यांच्या मार्गदर्शनाखाली उपनिरीक्षक राहुल पवार, प्रकाश आव्हाड, सारस साळवी, निलेश पालवे, ज्ञाना बडे, महेश जाधव, मनोज भोकरे यांच्यासह पथकाने ही कारवाई केली.

तीन दिवसांपुर्वी (दि. २२ सप्टेंबर) सहकार आयुक्त कार्यालयातील सुनावणी संपवून सुर्यवंशी हे वकिलासोबत ससून रुग्णालयाच्या दिशेने जात होते. त्यावेळी दुचाकीवरून आलेल्या दोघांनी त्यांच्यावर धारदार कटरने चेहर्‍यावर वार केले. या हल्ल्यात सूर्यवंशी गंभीर जखमी झाले. याप्रकरणी बंडगार्डन पोलिस ठाण्यात गुन्हा दाखल करण्यात आला होता. गुन्ह्याचा तपास करताना पोलिसांनी घटनास्थळावरील सीसीटीव्ही फुटेज आणि तांत्रिक विश्लेषणाच्या आधारे संशयितांचा माग काढून गव्हाणे आणि साथीदाराला ताब्यात घेतले. चौकशीत दोघांनी मुख्य आरोपी प्रवीण बाळाजी सूर्यवंशी (रा. बाभूळगाव, ता. उमरगा) याचे नाव सांगितले.

हे सुद्धा वाचा : पहाटे तरुणांची गाडी अडवली, चाकूचा धाक दाखवून हात-पाय बांधलेअन्…; संभाजीनगरमधील घटनेनं खळबळ

मुख्य आरोपी प्रवीण यांचे तक्रारदार यांच्यासोबत जमिनीवरून वाद सुरू होते. या वादातून प्रवीणने त्यांच्या खून करण्यासाठी ५० हजार रुपयांची सुपारी दिल्याचे आरोपींनी सांगितले. त्यानुसार त्यांनी हल्ला केल्याची माहिती तपासात समोर आली आहे. हल्ल्यात वापरलेली दुचाकी पोलिसांनी जप्त केली असून, वार करण्यासाठी वापरलेला कटर मुख्य आरोपीने पुरविल्याचेही तपासात निष्पन्न झाले आहे. मुख्य आरोपीचा शोध सुरू आहे.

हे सुद्धा वाचा : ऊसदराची कोंडी कोण फोडणार? पहिली उचल किती मिळणार? कारखानदारांच्या भूमिकेकडे शेतकऱ्यांचे लक्ष