दानोळीतील महेश दळवी खून प्रकरणाचा उलगडा, चार संशयितांना अटक; आठ दिवसांची पोलीस कोठडी

जयसिंगपूर  शिरोळ तालुक्यातील दानोळी येथील चांदोली वसाहतीत महेश बजरंग दळवी (वय ४१) यांचा गोळ्या झाडून खून केल्याप्रकरणी जयसिंगपूर पोलिसांनी चौघा संशयित आरोपींना अटक केली आहे.

• महेश दळवी खून प्रकरणात चार संशयितांना अटक
• हातकणंगले परिसरात पोलिसांनी आरोपींना पकडले
• चौघांना आठ दिवसांची पोलीस कोठडी

जयसिंगपूर :  शिरोळ तालुक्यातील दानोळी येथील चांदोली वसाहतीत महेश बजरंग दळवी (वय ४१) यांचा गोळ्या झाडून खून केल्याप्रकरणी जयसिंगपूर पोलिसांनी चौघा संशयित आरोपींना अटक केली आहे. हातकणंगले परिसरात हे संशयित असल्याची गोपनीय माहिती मिळाल्यानंतर पोलिसांनी सापळा रचून त्यांना ताब्यात घेतले आहे. शनिवारी (दि. २४) न्यायालयात हजर केले असता चौघांनाही आठ दिवसांची पोलीस कोठडी सुनावण्यात आली आहे.

 

महेश दळवी यांचा १९ ऑक्टोबर रोजी दानोळी येथील चांदोली वसाहतीत शिवप्रेमी चौक ते सह्याद्री चौक मार्गावरील धोंडीराम गुरव यांच्या घरासमोर गोळ्या झाडून खून करण्यात आला होता. मोटारसायकलवरून आलेल्या दोन अज्ञात व्यक्तींनी अज्ञात कारणावरून महेश दळवी यांच्यावर गोळीबार करून त्यांना गंभीर जखमी केले. या घटनेत त्यांचा मृत्यू झाला. अटक करण्यात आलेल्या संशयित आरोपींची नावे रोहित भुपाल मगदूम (वय २६, रा. उमळवाड) संतोष भिमराव कोळी (वय २७, रा. चांदोली वसाहत, दानोळी) अनमोल सुनील करे (वय ३३, रा. कोथळी) आणि अश्विनकुमार ऊर्फ ऋषिकेश राजेंद्र भोई (वय २९, रा. सांगलीवाडी, सांगली) अशी आहेत. पोलिसांनी दिलेल्या माहितीनुसार, प्राथमिक चौकशीत संशयितांनी गुन्ह्याची कबुली दिली आहे.

हे सुद्धा वाचा : अत्याचाराच्या गुन्ह्यात अटक, कोठडीत दुखापत अन् मृत्यू; सोलापुरातील घटनेनं खळबळ

संशयितांचा शोध घेण्यासाठी विशेष पथके नियुक्त

याप्रकरणी त्यांचे भाऊ विजय बजरंग दळवी यांनी दिलेल्या फिर्यादीवरून जयसिंगपूर पोलीस ठाण्यात गुन्हा दाखल करण्यात आला होता. घटनेचे गांभीर्य लक्षात घेऊन कोल्हापूरचे पोलीस अधीक्षक नीलोत्पल आणि अपर पोलीस अधीक्षक अण्णासाहेब जाधव यांच्या मार्गदर्शनाखाली संशयितांचा शोध घेण्यासाठी विशेष पथके नियुक्त करण्यात आली होती. तपासादरम्यान जयसिंगपूर विभागाचे उपविभागीय पोलीस अधिकारी अमोल ठाकूर यांना गोपनीय बातमीदारामार्फत संशयित आरोपी हातकणंगले परिसरात असल्याची माहिती मिळाली. त्यानुसार ठाकूर व त्यांच्या पथकाने सापळा रचून संशयितांना ताब्यात घेतले.

हे सुद्धा वाचा : मध्य प्रदेशातून गावठी पिस्तूल आणून संभाजीनगरमध्ये विक्री, सहा जणांच्या टोळीचा पर्दाफाश; तब्बल…