पहाटे तरुणांची गाडी अडवली, चाकूचा धाक दाखवून हात-पाय बांधलेअन्…; संभाजीनगरमधील घटनेनं खळबळ

कर्णपुरा येथील देवीदर्शनावरून परतणाऱ्या आणि मित्राला घरी सोडण्यासाठी निघालेल्या तीन तरुणांना संजयनगरात अडवून लुटल्याची घटना समोर आली आहे. या घटनेमुळे मोठी खळबळ उडाली आहे.

• देवीदर्शनावरून परतणाऱ्या तीघांना संजयनगरात लुटले
• चाकूचा धाक दाखवून ५८ हजारांचा ऐवज लंपास
• जिन्सी पोलिसांकडून दोघांना अटक

छत्रपती संभाजीनगर : कर्णपुरा येथील देवीदर्शनावरून परतणाऱ्या आणि मित्राला घरी सोडण्यासाठी निघालेल्या तीन तरुणांना संजयनगरात अडवून लुटल्याची घटना समोर आली आहे. कुख्यात अझीम पुटक व त्याच्या साथीदारांनी तिघांना पत्र्याच्या शेडमध्ये डांबून हातपाय बांधले. चाकूचा धाक दाखवून मारहाण करत सोन्याच्या बाळ्या, चांदीची साखळी आणि तीन मोबाइल असा ५८ हजारांचा ऐवज लुटला आहे. या प्रकरणात जिन्सी पोलिसांनी तपास करुन आरोपी शेख हुसेन शेख गौस (वय २५) आणि आमेर सय्यद बाबर (वय २४, दोघे रा. संजयनगर) यांना अटक केली आहे.

 

न्यायालयाने दोघांना चार दिवसांची पोलिस कोठडी सुनावली आहे. तर कुख्यात आरोपी अझीम पुटकसह त्यांच्या अन्य फरार साथीदारांचा शोध सुरु असल्याची माहिती पोलिस निरीक्षक गणेश ताठे यांनी दिली. या प्रकरणात अक्षय माधवराव मुळे (वय २१, रा. बाळापूर फाटा, बीड बायपास) याने फिर्याद दिली आहे.

अक्षय हा अनिरुद्ध अनंतराव काळे आणि रवींद्र लिंबाजी मगरे या मित्रांसोबत कर्णपुरा येथे देवीदर्शनासाठी गेला होता. २१ ऑक्टोबर रोजी पहाटे साडेचारच्या सुमारास तिघे मित्राला संजयनगरात सोडण्यासाठी जात असताना एचपी गॅस गोदामासमोरील गल्ली क्रमांक ९ च्या कोपऱ्यावर अझीम पुटक, शेख हुसेन, आमेर आणि त्यांच्या साथीदारांनी त्यांची गाडी अडवली. तिघांना बाजूच्या पत्र्याच्या शेडमध्ये ओढून नेले. तेथे हातपाय बांधून चाकूचा धाक दाखवत मारहाण केली. आरडाओरड केल्यास जीवे मारण्याची धमकीही दिली.

हे सुद्धा वाचा : मध्य प्रदेशातून गावठी पिस्तूल आणून संभाजीनगरमध्ये विक्री, सहा जणांच्या टोळीचा पर्दाफाश; तब्बल…

सकाळी सातपर्यंत डांबून ठेवले

आरोपींनी अक्षयच्या गळ्यातील १०० ग्रॅम वजनाची चांदीची साखळी, तीन ग्रॅमच्या सोन्याच्या कानातील बाळ्या आणि मोबाईल, तसेच अनिरुद्ध व रवींद्र यांचे मोबाईल हिसकावले. एकूण ५८ हजारांचा ऐवज लुटल्यानंतर तिघांना सकाळी सात वाजेपर्यंत शेडमध्ये डांबून ठेवले. त्यानंतर आरोपींनी त्यांना सोडून दिले.

हे सुद्धा वाचा : विमानतळ भूसंपादनात ‘रात्रीच्या व्यवहारां’ची चर्चा; शासकीय विश्रामगृहातील कथित मोबदला वाटपावर आरोप