टिळक चौकाजवळ तरुणाला गाठले, मारहाण केली अन्…; पुण्यातील घटनेनं खळबळ

टिळक चौकाजवळच एका तरुणाला मारहाण करून त्याच्याकडील ४ हजार रुपये काढून घेतल्याची घटना रात्री अकराच्या सुमारास घडली आहे. याप्रकरणी विश्रामबाग पोलिस ठाण्यात दोघांवर गुन्हा नोंदवण्यात आला आहे.

• टिळक चौकाजवळ तरुणाला गाठले
• मारहाण करुन लुटले
• पुण्यातील घटनेनं खळबळ

पुणे : राज्यात चोरट्यांनी धुमाकूळ घातला असून, लुटमारीच्या घटनांमध्येही मोठी वाढ झाली आहे. अशातच आता पुण्यातून एक मोठी घटना समोर आली आहे. टिळक चौकाजवळच एका तरुणाला मारहाण करून त्याच्याकडील ४ हजार रुपये काढून घेतल्याची घटना रात्री अकराच्या सुमारास घडली आहे. याप्रकरणी विश्रामबाग पोलिस ठाण्यात दोघांवर गुन्हा नोंदवण्यात आला आहे. प्रविण चंद्रकांत खांबे (वय ३१), प्रणव संतोष कल्याणकर (वय २१, दोघेही रा. दांडेकर पूल) अशी गुन्हा दाखल झालेल्यांची नावे आहेत. अब्बु अहमद शेख (वय ३९, रा. जनवाडी) यांनी याबाबत फिर्याद दिली.

 

पोलिसांनी दिलेल्या माहितीनुसार, आरोपींनी तक्रारदार शेख यांना मारहाण केली. नंतर त्यांच्या खिशातील चार हजार रुपये जबरदस्तीने काढून घेतले. त्यांनी विरोध केला असता, आरोपींनी त्यांना जीवे मारण्याची धमकी दिल्याचे तक्रारीत नमूद करण्यात आले आहे. पोलिस उपनिरीक्षक आदर्श भंडारे तपास करत आहेत.

हे सुद्धा वाचा : विद्यार्थ्यांना वाऱ्यावर सोडल्यास उद्याचे आंदोलन महागात पडेल; आमदार रोहित पवारांचा सरकारला निर्वाणीचा इशारा

पोलिस चौकीजवळच लुटमारीची घटना

टिळक चौकातील घटनास्थळापासून अवघ्या शंभर मीटर अंतरावर विश्रामबाग विभागाच्या सहाय्यक आयुक्तांचे कार्यालय आणि पोलिस चौकी आहे. या परिसरात पोलिसांची नेहमी वर्दळ असते. असे असतानाही पोलिस चौकीजवळ लुटमारीची घटना घडल्याने नागरिकांच्या सुरक्षेचा प्रश्न उपस्थित होत आहे. पोलिसांची वर्दळ असलेल्या परिसरातच अशा घटना घडत असतील, तर सर्वसामान्यांच्या सुरक्षिततेची जबाबदारी कोण घेणार, असा प्रश्न उपस्थित केला जात आहे.

हे सुद्धा वाचा : पिंपरीत भीषण अपघात! ट्रॅक्टर-दुचाकीच्या धडकेत चिमुकलीचा मृत्यू; आई-वडील गंभीर जखमी