फिनिक्स मॉल परिसरात मध्यरात्री थरार! सिमेंटचा गट्टू तरुणाच्या डोक्यात घातला अन्…

पबमध्ये झालेल्या वादातून तरुणाच्या डोक्यात सिमेंटचा गट्टू घालून त्याला मारहाण केल्याची घटना विमाननगर भागात घडली आहे. पोलिसांनी खुनाचा प्रयत्न करणाऱ्या महिलेसह चौघांना अटक केली आहे.

• पबमध्ये शर्ट काढून डान्स केल्याने वाद
• ऋतिकला सिमेंटचा गट्टूने मारहाण
• महिलेसह चौघांना अटक

पुणे : पबमध्ये झालेल्या वादातून तरुणाच्या डोक्यात सिमेंटचा गट्टू घालून त्याला मारहाण केल्याची घटना विमाननगर भागात घडली आहे. पोलिसांनी खुनाचा प्रयत्न करणाऱ्या महिलेसह चौघांना अटक केली आहे. ऋतिक मधुकर कोंडे (वय २६, रा. स्वामी नारायण पीजी, गणेशनगर, वडगाव शेरी) असे जखमी झालेल्याचे नाव आहे. याबाबत कोंडे याने विमानतळ पोलीस ठाण्यात तक्रार दिली आहे. या प्रकरणी जेम्स फिलिप मकासरे (वय ४१), प्रिया जेम्स मकासरे (वय ३२, दोघे रा. गांधीनगर, श्री दत्त मंदिराजवळ, येरवडा), भारत संजय ठाकूर (वय ४०, शिंदेंची छत्रीसमोर, वानवडी), वेदांत शैलेंद्र भालेराव (वय २६, रा. श्री तुकाराम हाऊसिंग सोसायटी, टिंगरेनगर, विश्रांतवाडी) यांना अटक करण्यात आली.

 

नेमकं काय घडलं?

ऋतिक एका खासगी कंपनीत कामाला आहे. गुरुवारी रात्री तो आपला मित्र प्रशांत याच्यासोबत फिनिक्स मार्केट सिटी परिसरातील एका पबमध्ये गेला होता. पबमध्ये दोघंही डान्स करत होते. रात्री दहा वाजताच्या सुमारास ऋतिकने डान्स करताना आपला शर्ट काढला आणि हवेत फिरवायला सुरुवात केली. यावरूनच आरोपींसोबत त्याचा वाद झाला. काही वेळानंतर ऋतिक आणि प्रशांत पबमधून बाहेर पडले. मात्र, हा वाद आरोपींच्या अजूनही डोक्यात होता. त्यांनी ऋतिकला गाठून शिवीगाळ केली. एवढ्यावरही न थांबता त्यांनी रस्त्यावर पडलेला सिमेंटचा गट्टू उचलून त्याच्या डोक्यात घातला. इतकंच नाही, तर यानंतर झाडाच्या फांदीने त्याला मारहाण केली. यात ऋतिक जखमी झाला. त्याने पोलिसात धाव घेतली. विमाननगर पोलीस ठाण्यात याबाबत फिर्याद दिली. यानंतर पोलिसांनी महिलेसह चौघांनाही अटक केली.

हे सुद्धा वाचा : पोलिसांना पाहताच आरोपीने उगारला लोखंडी टिकाव, मुकुंदनगरात थरारक प्रकार; पाच कर्मचारी जखमी

कौटुंबिक वादातून वडिलांचा फावडे घालून खून

कौटुंबिक वादातून मुलाने ८० वर्षांच्या वडिलांच्या डोक्यात फावडे घालून खून करण्यात आल्याची धक्कादायक घटना पर्वती पायथा परिसरातील जनता वसाहतीत घडली आहे. या प्रकरणी मुलाला पर्वती पोलिसांनी अटक केली. जगन्नाथ धोंडू होडे (वय ८०, रा. वेताळबाबा मंदिराजवळ, जयभवानीनगर, जनता वसाहत, पर्वती) असे खून झालेल्याचे नाव आहे. या प्रकरणी रणी मुलगा रामचंद्र (वय ४६) याला अटक करण्यात आली. याबाबत पोलीस शिपाई धनंजय रौंदळ यांनी पर्वती पोलीस ठाण्यात फिर्याद दिली आहे. २ नोव्हेंबर रोजी जगन्नाथ आणि त्यांचा मुलगा रामचंद्र यांच्यात कौटुंबिक वाद झाला. वादातून मुलगा रामचंद्र याने वडिलांच्या डोक्यात घरातील फावडे घातले. पोलीस उपनिरीक्षक प्रकाश खिलारी तपास करत आहेत.