Pune Crime : तंबाखू न दिल्याचा राग अनावर; तरुणाला लाथाबुक्क्यांनी अन् लोखंडी रॉडने मारहाण

तंबाखू देण्यास नकार दिल्याच्या कारणावरून तिघांनी तरुणाला लाथाबुक्क्यांनी आणि लोखंडी रॉडने मारहाण केली आहे. एका आरोपीने बर्फ फोडण्याचा टोचा डोळ्याजवळ मारल्याने तरुण जखमी झाला आहे.

• तंबाखू न दिल्याचा राग अनावर
• तरुणाला लाथाबुक्क्यांनी अन् लोखंडी रॉडने मारहाण
• पुण्यातील घटनेनं खळबळ

पुणे : राज्यासह देशभरात गुन्हेगारी वाढली असून, पुण्यातही सतत खून, खुनाचा प्रयत्न, मारहाण यासारख्या घटना घडत आहेत. वाढत्या गुन्हेगारीमुळे नागरिकांमध्ये भिती निर्माण होत आहे. अशातच आता पुण्यातून एक मोठी बातमी समोर आली आहे. तंबाखू देण्यास नकार दिल्याच्या कारणावरून तिघांनी तरुणाला लाथाबुक्क्यांनी आणि लोखंडी रॉडने मारहाण केली आहे. एका आरोपीने बर्फ फोडण्याचा टोचा डोळ्याजवळ मारल्याने तरुण जखमी झाला आहे. येरवड्यातील गाडीतळ बसस्टॉप परिसरात हा प्रकार घडला आहे.

याप्रकरणी प्रकाश ज्ञानदेव कुसाळकर (वय ३५, रा. भाजी मंडई, येरवडा) आणि त्याच्या दोन साथीदारांवर लक्ष्मीनगर पोलिस ठाण्यात गुन्हा दाखल करण्यात आला आहे. याबाबत राहुल रमेश विटकर (वय ३०, रा. शितळादेवी मंदिरामागे, सेवक चौक, येरवडा) यांनी फिर्याद दिली आहे. पोलिसांच्या माहितीनुसार, मेट्रो स्टेशनसमोरील गाडीतळ बसस्टॉप परिसरात फिर्यादी होते. आरोपींनी त्यांच्याकडे तंबाखू मागितली. तंबाखू देण्यास नकार दिल्याने आरोपींनी शिवीगाळ करीत लाथाबुक्क्यांनी आणि लोखंडी रॉडने मारहाण केली. प्रकाश कुसाळकर याने बर्फ फोडण्याचा टोचा फिर्यादीच्या डोळ्याजवळ मारून त्यांना जखमी केल्याचे तक्रारीत नमूद आहे. पोलिस हवालदार कुंभार तपास करीत आहेत.

हे सुद्धा वाचा : पुण्यात अमित ठाकरेंच्या दौऱ्यात राड्याची ठिणगी? सरकारी महाविद्यालयातून मोदींचा फोटो हटवला, VIDEO व्हायरल

मारहाण करून बापाने मुलाला संपवलं

दारूच्या आहारी गेलेला मुलगा दररोज वाद घालत असल्याच्या रागातून वडिलांनी मुलाचा गळा आवळून तसेच मारहाण करून खून केल्याची धक्कादायक घटना उघडकीस आली आहे. वारजे माळवाडी परिसरात ही घटना घडली असून, याप्रकरणी वडिल तसेच आईला पोलिसांनी अटक केली आहे.  महेश भागवत गायकवाड (वय ३०) असे खून झालेल्या तरुणाचे नाव आहे. याप्रकरणी भाऊ गणेश भागवत गायकवाड (वय ३४) यांनी पोलिसांकडे तक्रार दिली आहे. त्यानुसार भागवत सूर्यभान गायकवाड (वय ६४), पार्वती भागवत गायकवाड (वय ६०) आणि आणखी एका व्यक्तीविरोधात गुन्हा दाखल करण्यात आला आहे. वडिल भागवत व आई पार्वती यांना अटक केली आहे.

हे सुद्धा वाचा : समृद्धी महामार्ग भीषण अपघात; ट्रॅव्हल्स-कंटेनरच्या धडकेत एकाचा जागीच मृत्यू तर १० जण गंभीर जखमी