संग्रहित फोटो
पुणे : राज्यात गुन्हेगारी वाढली आहे. राज्यातील वेगवेगळ्या भागातून दररोज खून, मारामाऱ्या लुटमार, दरोडे यासारख्या घटना उघडकीस येत असतात. अशातचं आता पुण्यातून एक मोठी बातमी समोर आली आहे. ताम्हिणी घाटातील खूनाचा उलगडा करण्यात वारजे माळवाडी पोलिसांना यश आले असून, मोठ्या भावानेच हा खून केला असल्याचे समोर आले आहे. व्यसनाधीन भावाशी वादविवाद झाल्यानंतर मोठ्या भावाने त्याचा खून केला आहे. ताम्हिणी घाटात हा मृतदेह आढळून आला होता. नंतर पोलिसांनी मृतदेहाची ओळख पटवून या खूनाचा उलगडा केला आहे.
ऋषिकेश अनिल शिर्के (वय २३, रा. गायकवाड चाळ, मावळे आळी, कर्वेनगर) असे खून झालेल्या तरुणाचे नाव आहे. याप्रकरणी ऋषीकेशचा मोठा भाऊ अनिकेत अनिल शिर्के (वय २६) याला अटक केली आहे. याप्रकरणी पौड पोलिसांत गुन्हा दाखल केला आहे. ही कारवाई परिमंडळ तीनचे उपायुक्त संभाजी कदम यांच्या मार्गदर्शनाखाली वरिष्ठ निरीक्षक प्रकाश धेंडे, गुन्हे पोलिस निरीक्षक निलेश बडाख यांच्या पथकाने केली आहे.
ताम्हिणी घाटात शनिवारी सकाळी बेवारस अवस्थेत तरुणाचा मृतदेह असल्याची माहिती पौड पोलिसांना मिळाली होती. नंतर पोलिसांनी घटनास्थळी जाऊन पाहणी केली. मृतदेह शवविच्छेदनासाठी पाठविला होता. मात्र, या मृतदेहाची ओळखही पटलेली नव्हती. पौड पोलिस तपास करत होते. याचदरम्यान, वारजे माळवाडी पोलिस ठाण्यातील उपनिरीक्षक सचिन तरडे यांना माहिती मिळाली की, अनिकेतने लहान भाऊ ऋषीकेशचा ताम्हिणी घाटात खून केला आहे. त्यानंतर पोलिसांच्या पथकाने अनिकेतचा शोध घेतला. अनिकेत कर्वेनगरमधील वनदेवी मंदिराच्या मागील बाजूस असलेल्या टेकडीच्या परिसरात लपून बसला होता. पोलिसांनी त्याला ताब्यात घेतले. चौकशीत त्याने लहान भावाचा खून केल्याची कबुली दिली.
अशी घडली घटना
अनिकेत आणि ऋषिकेश शुक्रवारी (२५ जुलै) रात्री कर्वेनगर येथून दुचाकीवरून रत्नागिरीतील लांजा तालुक्यातील गोळवशी-शिर्केवाडी येथे देवदर्शनासाठी निघाले. दोघे मध्यरात्री ताम्हिणी घाटातील गोणवडी गावाजवळ थांबले. ऋषिकेशला दारू आणि गांजाचे व्यसन होते. अनिकेतने ऋषीकेशला व्यसन सोडण्यास सांगितले. यावरुन दोघांमध्ये वाद झाला. त्यानंतर रागाच्या भरात अनिकेतने ऋषीकेशवर तीक्ष्ण शस्त्राने वार केले. ऋषीकेशचा मृत्यू झाल्यानंतर अनिकेत पसार झाला. आरोपी अनिकेतला पौड पोलिसांच्या ताब्यात देण्यात आले. पाैड पोलिसांकडून याप्रकरणात तपास करण्यात येत आहे.
कोथरूडमध्ये अल्पवयीन मुलावर धारदार हत्याराने हल्ला
कोथरुड भागातील गुरू गणेश नगर येथील मधुकुंज सोसायटीत १४ वर्षीय मुलावर जुन्या भांडणाच्या रागातून धारदार हत्याराने हल्ला केल्याची घटना घडली आहे. याप्रकरणी दोन तरुणांसह एका अल्पवयीन आरोपीवर कोथरुड पोलिसांनी गुन्हा दाखल केला आहे. याप्रकरणी ३० वर्षीय महिलेने तक्रार दिली आहे. त्यावरून अर्जुन धोत्रे (वय १९, रा. श्रावणधारा सोसायटी, कोथरुड), पवन वाणी (वय १८) आणि एका अल्पवयीन आरोपीविरुद्ध भारतीय न्याय संहितेच्या विविध कलमांसह, आर्म अ‍ॅक्ट आणि महाराष्ट्र पोलिस अधिनियमाअंतर्गत गुन्हा दाखल करण्यात आला आहे.
