निलंबित तलाठीच्या घरावरील गोळीबार प्रकरणात मोठा ट्विस्ट; पोलिसांच्या तपासातून धक्कादायक माहिती समोर

अमरावती शहरातील गाडगेनगर पोलिस ठाण्याच्या हद्दीतील अर्जुननगर येथे झालेल्या खळबळजनक गोळीबाराच्या घटनेचा गुन्हे शाखेने अवघ्या २४ तासात छडा लावला आहे. तपासात धक्कादायक माहिती समोर आली आहे.

अमरावती : अमरावती शहरातील गाडगेनगर पोलिस ठाण्याच्या हद्दीतील अर्जुननगर येथे झालेल्या खळबळजनक गोळीबाराच्या घटनेचा गुन्हे शाखेने अवघ्या २४ तासात छडा लावला आहे. तपासात धक्कादायक माहिती समोर आली असून, घरमालक तथा निलंबित तलाठी विपूल भानुदास ठाकरे यानेच स्वतःच्या घरावर गोळीबार घडवून आणल्याचा बनाव रचल्याचे पोलिस तपासात निष्पन्न झाले आहे. या प्रकरणात गुन्हे शाखेने चार आरोपींना अटक केली असून, मुख्य सूत्रधार विपूल ठाकरे पसार आहे. त्याचा शोध सुरू आहे.

रविवारी डायल-११२ वर अर्जुननगर येथील रहिवासी विपूल ठाकरे यांच्या घरावर बुरखाधारी दोन व्यक्तींनी देशी कट्टयाने गोळीबार केल्याची माहिती मिळाली होती. त्याच्या आधारे गाडगेनगर पोलिस आणि गुन्हे शाखेचे पथक घटनास्थळी दाखल झाले. घटनेचे गांभीर्य लक्षात घेऊन पोलिस ठाण्यात विविध कलमांसह आर्म्स अॅक्टनुसार गुन्हा दाखल केला.

प्रकरणाचे गांभीर्य लक्षात घेऊन पोलिस आयुक्त राकेश ओला यांच्या निर्देशानुसार गुन्हे शाखेची सहा विशेष पथके तयार करण्यात आली. पोलिस निरीक्षक दिनेश दहातोंडे आणि अतूल वर यांच्या नेतृत्वाखाली पथकाने १०० हून अधिक ठिकाणचे सीसीटीव्ही फुटेज तपासले. त्यानंतर पोलिसांनी नागपूर महामार्ग आणि वडाळी परिसरातून बादशाहसिंग टांक व अजय भोसले या दोघांना ताब्यात घेतले.

दीड लाखांची सुपारी

पोलिस तपासात विपुल भानुदास ठाकरे याने स्वतःच्या घरावर गोळीबार घडवून आणण्यासाठी बादशाहसिंग टांक याच्याशी १ लाख ५० हजार रुपयांत व्यवहार ठरविल्याचे समोर आले. त्यापैकी १० हजार रुपये आगाऊ रक्कम चंद्रसिंग ऊर्फ शेरूसिंग याच्यामार्फत शूटरपर्यंत पोहोचविण्यात आल्याचे तपासात निष्पन्न झाले. विपुल ठाकरे याने स्वतः वर हल्ला झाल्याचा बनाव नेमका कोणत्या कारणासाठी रचला, याचे कारण त्याच्या अटकेनंतरच स्पष्ट होण्याची शक्यता आहे.

हे सुद्धा वाचा : खड्ड्यांचे साम्राज्य अन् ट्रॅफिकचा फास, चाकणमधून 20 कंपन्या गाशा गुंडाळणार? हजारो जणांचे रोजगार धोक्यात

चार आरोपी अटकेत

या प्रकरणात बादशाहसिंग अजाबसिंग टांक (वय ४२, सिकलकरीपुरा, वडाळी, अमरावती), अजय नुरजेम भोसले (वय ३१, राजुरा, अमरावती), राजासिंग अजाबसिंग टांक (३२, सिकलकरीपुरा, वडाळी, अमरावती) आणि चंद्रसिंग ऊर्फ शेरूसिंग जोधसिंग शाकला (३०, रा. फलौदी, राजस्थान; हल्ली मुक्काम अर्जुननगर, अमरावती) यांना अटक करण्यात आली आहे.

दरम्यान, पसार आरोपी विपूल भानुदास ठाकरे (रा. अर्जुननगर, अमरावती) याचा पोलिसांकडून शोध सुरू आहे. ही कारवाई पोलिस आयुक्त राकेश ओला, उपायुक्त यशवंत सोलंके, उपायुक्त श्याम घुगे आणि उपायुक्त प्रांजली सोनवणे यांच्या मार्गदर्शनाखाली गुन्हे शाखेचे पोलिस निरीक्षक दिनेश दहातोंडे आणि पोलिस निरीक्षक अतुल वर यांच्या नेतृत्वातील पथकाने केली आहे.