उदगीरमध्ये दोन गटांत तुफान दगडफेक, पोलीस वाहनांचे नुकसान; 47 जणांवर गुन्हा दाखल

उदगीर शहरातील सोमनाथपूर रोडवरील मुसानगर परिसरात दोन गटांमध्ये तुफान दगडफेक झाली आहे. या घटनेची माहिती मिळताच उदगीर शहर पोलीस ठाण्याचे अधिकारी फौजफाट्यासह घटनास्थळी दाखल झाले.

• उदगीरमध्ये दोन गटांत तुफान दगडफेक
• पोलीस वाहनांचे नुकसान
• 47 जणांवर गुन्हा दाखल

उदगीर : उदगीर शहरातील सोमनाथपूर रोडवरील मुसानगर परिसरात दोन गटांमध्ये तुफान दगडफेक झाली आहे. या घटनेची माहिती मिळताच उदगीर शहर पोलीस ठाण्याचे अधिकारी फौजफाट्यासह घटनास्थळी दाखल झाले. त्यावेळी पोलिसांच्या वाहनांवरही दगडफेक करण्यात आली. या घटनेत एक पोलीस कर्मचारी जखमी झाला आहे. शासकीय कामात अडथळा निर्माण करून शासकीय वाहनाचे नुकसान केल्याप्रकरणी ३७ आरोपींसह ८ ते १० अनोळखी व्यक्तींविरुद्ध उदगीर शहर पोलीस ठाण्यात गंभीर गुन्हा दाखल करण्यात आला आहे.

 

पोलीसांनी दिलेल्या माहितीनुसार, शनिवारी रात्री पावणे अकराच्या सुमारास मौलाना आझाद शाळेजवळ, मुसानगर परिसरात आरोपींनी बेकायदेशीर जमाव जमवून जिल्हाधिकाऱ्यांच्या जमावबंदी आदेशाचे उल्लंघ केले. यावेळी दोन गटांमध्ये दगडफेक झाली. तसेच आरोपींनी पोलिसांच्या वाहनांवर दगडफेक करून सुमारे १५ हजार रुपयांचे शासकीय वाहनाचे नुकसान केले. पोलिसांवरही हल्ला करण्यात आला. यात पोलीस अंमलदार सतीश भानुदास पवार जखमी झाले. शासकीय कामात अडथळा निर्माण करण्यात आला. या प्रकरणी आझम जहागीरदार, आसिफ शेख, शार्दूल शेख, आशा उर्फ अस्लम शेख, रोशन शेख उर्फ बिलाल, मोहित जहागीरदार, जाकेर जहागीरदार, बाबर शेख, आरिफ शेख, एजाज शेख, मोहेल शेख, साहील शेख, मोईन शेख, जुबेर शेख, इब्राहिम शेख, फिरोज शेख, मोहसीन शेख, बबलू उर्फ महमद रफी, सोहेल लददाफ, वजीर शेख, दस्तगीर शेख, यांच्यासह एकूण ३७ जण व इतर ८ ते १० जणांविरुद्ध विविध कलाम नुसार गुन्हा दाखल केला आहे.

हे सुद्धा वाचा : कर्जबाजारी आंबा बागायतदारांसाठी राजू शेट्टी सरसावले; नवी मुंबईतील बैठकीत घेतला मोठा निर्णय

आरोपींचा शोध सुरू

या प्रकरणाचा पुढील तपास पोलीस उपनिरीक्षक अक्षय पाटील हे करीत असून, आरोपींचा शोध घेण्यासाठी पोलिसांची पथके रवाना करण्यात आली आहेत. दरम्यान, या घटनेमुळे परिसरात काही काळ तणावाचे वातावरण निर्माण झाले होते. कायदा व सुव्यवस्था अबाधित राखण्यासाठी पोलीस प्रशासनाने नागरिकांना शांतता राखण्याचे आवाहन केले आहे.