मंगळवार, 6 ऑक्टोबर 2026
सौजन्य फोटो - सोशल मिडीया
भावनगर: गुजरातमधील भावनगर जिल्ह्यात मंगळवारी पहाटे भीषण रस्ते अपघात झाला. भावनगर-तळाजा-सोमनाथ महामार्गावरील त्रापजजवळ भरधाव बोलेरोने रस्त्याच्या कडेला उभ्या असलेल्या ट्रेलरच्या मागील भागाला जोरदार धडक दिली. धडकेची तीव्रता इतकी होती की बोलेरोचा अक्षरशः चक्काचूर झाला. या दुर्घटनेत वाहनातील सहा जणांचा घटनास्थळीच मृत्यू झाला, तर एक जण गंभीर जखमी झाला. अपघातग्रस्त सर्वजण अलंग शिपब्रेकिंग यार्डमध्ये काम करणारे कर्मचारी असल्याचे प्राथमिक तपासात समोर आले आहे.
प्राथमिक माहितीनुसार, मंगळवारी सकाळी त्रापज गावाजवळ हा अपघात झाला. बोलेरो भरधाव वेगाने जात असताना रस्त्याच्या कडेला उभ्या असलेल्या ट्रेलरच्या मागील भागावर आदळली. धडक एवढी जोरदार होती की बोलेरोमधील प्रवासी गंभीररीत्या जखमी झाले आणि सहा जणांचा जागीच मृत्यू झाला. अपघातानंतर महामार्गावर काही काळ वाहतूक विस्कळीत झाली होती.
या दुर्घटनेत मृत्यू झालेल्यांची नावे विजयभाई, साधूभाई, जिग्नेशभाई, भार्गवभाई, हिरेनभाई आणि योगेशभाई अशी प्राथमिक माहिती आहे. हे सर्व अलंग शिपब्रेकिंग यार्डमधील दोन वेगवेगळ्या प्लॉटवर काम करणारे कर्मचारी असल्याचे वृत्त आहे. काही वृत्तांत मृतांमध्ये एका प्लॉटच्या व्यवस्थापकाचाही समावेश असल्याचे नमूद करण्यात आले आहे.
या अपघातात जयेशभाई हे गंभीर जखमी झाले आहेत. स्थानिक नागरिक आणि पोलिसांनी तातडीने मदतकार्य सुरू करून त्यांना भावनगर येथील सरकारी रुग्णालयात दाखल केले. त्यांची प्रकृती गंभीर असल्याने पुढील उपचारासाठी त्यांना शहरातील खासगी रुग्णालयात हलवण्यात आल्याचे वृत्त आहे.
अपघाताची माहिती मिळताच स्थानिक पोलीस घटनास्थळी दाखल झाले. मृतदेह शवविच्छेदनासाठी सरकारी रुग्णालयात हलवण्यात आले असून, अपघात नेमका कोणत्या कारणामुळे झाला याचा तपास सुरू आहे. ट्रेलर रस्त्याच्या कडेला कोणत्या परिस्थितीत उभा होता आणि बोलेरोचा वेग किती होता, यासह विविध बाबी तपासल्या जात आहेत. या भीषण अपघातामुळे अलंग शिपब्रेकिंग यार्ड परिसरात शोककळा पसरली असून, मृत कर्मचाऱ्यांच्या कुटुंबीयांवर दुःखाचा डोंगर कोसळला आहे.
