भाजयुमोच्या अनुप मोरेचे ‘त्या’ गुन्ह्यात नाव का नाही? फिर्यादीच्या प्रश्नावर पोलिसांचे बेजबाबदार उत्तर; म्हणाले… 

तेजस्विनी चंद्रकांत कदम यांनी याप्रकरणी २६ ऑक्टोबर रोजी चिंचवड पोलिस ठाण्यात फिर्याद दिली. फिर्यादी तेजस्विनी कदम या भारतीय जनता युवा मोर्चाच्या प्रदेश सचिव आहेत.

पिंपरी चिंचवड/PCMC Crime: भाजपच्या प्रदेश महिला पदाधिकाऱ्याला भारतीय जनता युवा मोर्चाच्या (भाजयुमो) प्रदेशाध्यक्षाच्या नावाने टोळक्याने जिवे मारण्याची धमकी दिल्याचा धक्कादायक प्रकार समोर आला आहे. ही घटना चिंचवड येथे घडली. याप्रकरणी भाजयुमोचे प्रदेशाध्यक्ष अनुप मोरे याच्यासह इतर सात जणांच्या विरोधात गुन्हा दाखल करण्यात आला आहे.

तेजस्विनी चंद्रकांत कदम (वय ३६, रा. निगडी प्राधिकरण) यांनी याप्रकरणी २६ ऑक्टोबर रोजी चिंचवड पोलिस ठाण्यात फिर्याद दिली. फिर्यादी तेजस्विनी कदम या भारतीय जनता युवा मोर्चाच्या प्रदेश सचिव आहेत. त्यांच्या फिर्यादीनुसार भाजयुमोचे प्रदेशाध्यक्ष अनुप मोरे (वय ४३, रा. निगडी प्राधिकरण), अनिता कृष्णा तिपाले, एकविरा शरीफ खान, प्रवीण यादव, आशिष राऊत, गौरव गोळे, सागर घोरपडे व जयेश मोरे यांच्यावर गुन्हा दाखल करण्यात आला आहे.

पोलिसांनी दिलेल्या माहितीनुसार, २६ ऑक्टोबर रोजी दुपारी दोनच्या सुमारास फिर्यादी आशीष गावडे यांना भेटण्यासाठी चिंचवड येथील त्यांच्या घरी गेल्या होत्या. दरम्यान, बंगल्याबाहेर संशयितांनी आमचा दादा अनुप मोरे येथे असताना तू येथे का आलीस? तुला मारून टाकू. तू एकटी राहतेस, अनुप मोरेने तुला मारून टाकायला सांगितले आहे. तुला अपघातात गाडीने उडवू, आमचे आमच्या दादावर खूप प्रेम आहे.

पुण्यात दहशतवादविरोधी पथकाची मोठी कारवाई; संशयित दहशतवाद्याला बेड्या

तुला बदनाम करून जगणे मुश्किल करू. अनुप मोरे हा आमचा बाप आहे, तो आम्हाला सांभाळून घेईल, असे म्हणत धमकी दिली. त्यामुळे फिर्यादी कदम पुन्हा बंगल्यात परत गेल्या. त्यावेळी श्री कलाटे कार घेऊन त्यांना सोडायला आले असता, अनेक महिलांनी त्यांच्या गाडीला घेराव घातला. फिर्यादी तेजस्विनी कदम तक्रार देण्यासाठी चिंचवड पोलिस ठाण्यात गेल्या असता, अनिता तिपाले व एकविरा खान यांनी त्यांना मारहाण आणि शिवीगाळ केली. तक्रार नोंदवून पोलिस ठाण्याच्या बाहेर येताच तेजस्विनी यांना पुन्हा शंभर जणांच्या टोळक्याने धमकी दिली. तुला मारून टाकू, असे त्यांनी धमकावले, असे फिर्यादीत नमूद आहे. पोलिस उपनिरीक्षक सुजाता पाटील तपास करत आहेत.

Pune : निलेश घायवळचा ठावठिकाणा लागला! फरार गॅंगस्टर लंडनमध्ये असल्याची पुष्टी; हाय कमिशनच पुणे पोलिसांना उत्तर

पोलिस म्हणतात.. अनावधानाने राहिले नाव

फिर्यादी तेजस्विनी कदम यांनी फिर्याद देताना जबाबात आठ जणांची नावे नमूद केली. त्यातील सात जणांच्या विरोधात पोलिसांनी गुन्हा दाखल केला. अनुप मोरे याचा आरोपींच्या नावामध्ये समावेश का केला नाही, अशी विचारणा फिर्यादी महिलेने केली. त्यानंतर पोलिसांनी अनुप मोरे याच्या नावाचा आरोपींमध्ये समावेश केला. अनावधानाने अनुप मोरे याचे नाव राहून गेले, असे पोलिसांकडून सांगण्यात आले.