कौटुंबिक वादातून चुलत भावांनीच केली हत्या; निंबी मालोकार हत्याकांडाचा 9 तासांत छडा

पोलिस अधीक्षक अर्चित चांडक यांच्या आदेशानुसार स्थानिक गुन्हे शाखेचे पोलिस निरीक्षक लेव्हरकर यांनी पसार आरोपींच्या शोधासाठी तीन पथके तयार केली. तांत्रिक विश्लेषण आणि गोपनीय बातमीदारांकडून मिळालेल्या माहितीच्या आधारे पोलिसांनी शोधमोहीम राबवली.

अकोला : निंबी मालोकार येथील शेतशिवारात झालेल्या अमोल गजानन मालोकार यांच्या खून प्रकरणाचा स्थानिक गुन्हे शाखेने अवघ्या 9 तासांत छडा लावला. शेतातील रस्त्याच्या कारणावरून झालेल्या कौटुंबिक वादातून चुलत भावांनीच अमोल यांच्यावर बंदुकीतून गोळ्या झाडून हत्या केल्याचे तपासात समोर आले आहे. या प्रकरणात 5 आरोपींना अटक करण्यात आली.

अमोल निंबी मालोकार येथील रविवारी दुपारी त्यांच्या शेतात असताना त्यांचे चुलत भाऊ अजय मालोकार, विजय मालोकार व त्यांच्या साथीदारांनी शेतातील रस्त्याच्या कारणावरून त्यांच्याशी वाद घातला. वाद विकोपाला गेल्यानंतर आरोपींनी बंदुकीतून अमोल यांच्यावर गोळ्या झाडल्या आणि घटनास्थळावरून पसार झाले. या घटनेची माहिती अमोल यांचे भाऊ उमेश यांनी पोलिसांना दिली.

दरम्यान, या घटनेचे गांभीर्य लक्षात घेऊन पोलिस अधीक्षक अर्चित चांडक, उपविभागीय पोलिस अधिकारी गजानन पडघन, स्थानिक गुन्हे शाखेचे पोलिस निरीक्षक नितीन लेव्हरकर, जुने शहर पोलिस निरीक्षक पितांबर जाधव आणि बाळापूर पोलिस निरीक्षक प्रकाश झोडगे यांनी घटनास्थळी भेट देऊन तपासाला सुरुवात केली. यावेळी पहिल्या गोळीबारानंतर अमोल यांचा मृत्यू झाला नसल्याचे आरोपींना समजले. त्यानंतर आरोपी पुन्हा घटनास्थळी आले आणि ज्ञानेश्वर मालोकार यांच्या समक्ष अमोल यांच्यावर पुन्हा गोळ्या झाडून पसार झाले.

Baramati Woman Death Case : ‘अथर्व मला गोळी देतोय…’ आईला मुलीचा शेवटचा फोन; काही तासांतच घडलं भयंकर, बारामती हादरलं !

आरोपी विजय याने स्वतः पोलिसांना खून झाल्याची माहिती देण्याचा बनाव करून तपासाची दिशाभूल करण्याचा प्रयत्न केला. मात्र, पोलिसांनी केलेल्या तांत्रिक तपासातून त्याचा हा बनाव उघड झाला. पोलिस अधीक्षक अर्चित चांडक यांच्या आदेशानुसार स्थानिक गुन्हे शाखेचे पोलिस निरीक्षक लेव्हरकर यांनी पसार आरोपींच्या शोधासाठी तीन पथके तयार केली. तांत्रिक विश्लेषण आणि गोपनीय बातमीदारांकडून मिळालेल्या माहितीच्या आधारे पोलिसांनी शोधमोहीम राबवली.

अटकेतील आरोपींची नावे

अटक करण्यात आलेल्या आरोपींमध्ये विजय श्रीकृष्ण मालोकार (३३, रा. निंबी मालोकार, ह.मु. उमरी, अकोला), अजय श्रीकृष्ण मालोकार (३२, रा. निंबी मालोकार, ह.मु. उमरी, अकोला), राजकुमार शिवचरण मालोकार (२५, रा. निबी मालोकार), विजय कैलास बुटे (३०, रा. कावसा, ता. अकोट, ह.मु. मोठी उमरी, अकोला) आणि एका विधी संघर्षग्रस्त बालकाचा समावेश आहे.

जप्त केलेला मुद्देमाल

आरोपींकडून २ कार, एक बुलेट मोटरसायकल, ५ मोबाइल, १ लाख ७ हजार ७६० रुपये रोख तसेच दैनंदिन वापराचे साहित्य जप्त करण्यात आले आहे. आरोपी गुन्हा करून पसार होण्याच्या तयारीत असतानाच पोलिसांनी त्यांना ताब्यात घेतले.