कृषी आयु्क्तालयातील उपसंचालक एसीबीच्या जाळ्यात; अडीच लाख रुपयांची लाच घेताना पकडले

कृषी आयुक्तालयातील फलोत्पादन विभागातील उपसंचालक संजय गुंजाळ लाचलुचपत प्रतिबंधक विभागाच्या (एसीबी) जाळ्यात अडकले आहेत.

पुणे : कृषी आयुक्तालयातील फलोत्पादन विभागातील उपसंचालक संजय गुंजाळ लाचलुचपत प्रतिबंधक विभागाच्या (एसीबी) जाळ्यात अडकले आहेत. गैरव्यवहार प्रकरणात निलंबित केलेल्या कर्मचाऱ्याकडून तीन लाख रुपयांची लाच मागितल्यामुळे त्यांना पकडण्यात आले आहे. संगमवाडी परिसरात शुक्रवारी रात्री उशीरा ही कारवाई करण्यात आली आहे. निलंबित कर्मचाऱ्याकडून अडीच लाख रुपयांची लाच घेताना गुंजाळ यांना ताब्यात घेतले आहे.

याप्रकरणी कृषी आयुक्तालयातील फलोत्पादन विभागातील उपसंचालक, प्रभारी सहसंचालक संजय बहादू गुंजाळ यांच्यावर भ्रष्टाचार प्रतिबंधक अधिनियमान्वये येरवडा पोलीस ठाण्यात रात्री उशीरा गुन्हा दाखल करण्यात आला आहे. याबाबत कृषी आयुक्तालयातील निलंबित कर्मचाऱ्याने तक्रार दिली आहे.

तक्रारदार २०१९-२०२० मध्ये जळगाव जामोद बुलढाणा येथे कनिष्ठ लिपिक होते. प्रधानमंत्री कृषी सिंचन योजनेअंतर्गत गैरव्यवहार, तसेच कसुरी केल्याचा ठपका ठेवून अमरावतीतील कृषी सहसंचालकांनी त्यांना सेवेतून निलंबित केले होते. याप्रकरणाची चौकशी सुरू होती. निलंबन कालावधीत मदत करणे, तसेच तक्रारदारावर घेतलेल्या आक्षेपांविरुद्ध मदत करण्यासाठी गुंजाळ यांनी त्यांच्याकडे तीन लाख रुपयांची लाच मागितली. तक्रारदाराने तडजोडीत अडीच लाख रुपयांची लाच देण्याचे मान्य केले. तर पुणे एसीबीकडे तक्रार दिली होती. या तक्रारीची पडताळणी करण्यात आली.

तक्रारीत तथ्य आढळल्याने सापळा लावला. शुक्रवारी रात्री तक्रारदाराला अडीच लाख रुपये घेऊन संगमवाडी येथील खासगी प्रवासी वाहतूक करणाऱ्या आराम बस थांब्यावर बोलाविण्यात आले. तक्रारदाराकडून लाच घेताना गुंजाळ यांना पकडण्यात आले. पोलीस अधीक्षक शिरीष सरदेशपांडे यांच्या मार्गदर्शनखाली ही कारवाई करण्यात आली. रात्री उशीरा त्यांच्यावर येरवडा पोलीस ठाण्यात गुन्हा दाखल करण्यात अला आहे. पोलीस निरीक्षक प्रवीण निंबाळकर अधिक तपास करत आहेत.

हे सुद्धा वाचा : रात्रीच्या धांगडधिंगाण्यावर पोलिसांची नजर; दोन ऑर्केस्ट्रा बारवर धडक कारवाई

चारशे रुपयांची लाच घेणे अंगलट

राज्यात लाच घेतल्याचे अनेक प्रकरण उघडकीस आले आहेत. दरम्यान गेल्या काही दिवसाखाली प्रादेशिक परिवहन विभागातील भ्रष्टाचार पुन्हा एकदा चव्हाट्यावर आला आहे. कोणतीही त्रुटी काढल्याशिवाय वाहनांचे हस्तांतरण (ट्रान्सफर ऑफ ओनरशिप) करून देण्यासाठी सहाय्यक प्रादेशिक परिवहन अधिकाऱ्याने 400 रुपयांची लाच मागितली. दलालाच्या माध्यमातून पैसे घेताना लाच लुचपत प्रतिबंधक विभाग (एसीबी) च्या पथकाने दोघांनाही पकडले. या कारवाईने ग्रामीण प्रादेशिक परिवहन कार्यालयात एकच खळबळ उडाली आहे. अश्फाक मेहमूद अहमद (वय 57) आणि मिर्झा असराग अकरम बेग (वय 30) अशी आरोपींची नावे आहेत.