Dhananjay Munde on Suresh Dhas: ‘माझ्या आईवर खोटे आरोप…’; सुरेश धसांच्या आरोपांवर धनंजय मुंडेंचा पलटवार

 सुरेश धस यांनी माजी मंत्री धनंजय मुंडे यांच्यावर नवे आरोप करत, कृषी खात्यातील २०० कोटींच्या कथित घोटाळ्याप्रकरणी ईडीकडे तक्रार दाखल करणार असल्याचे जाहीर केले आहे. तसेच, “धनंजय मुंडे यांच्या वागणुकीला कंटाळून त्यांची आई परळी सोडून नाथ्रा गावी राहायला गेल्या” असा दावा त्यांनी एका मुलाखतीत केला.

धनंजय मुंडेंची संतप्त प्रतिक्रिया

या आरोपांवर प्रतिक्रिया देताना धनंजय मुंडे यांनी सोशल मीडियाच्या माध्यमातून वस्तुस्थिती स्पष्ट केली. “परळी वैजनाथ येथील माझ्या निवासस्थानाचे नूतनीकरण सुरू असल्यामुळे मागील काही महिन्यांपासून मी आणि माझे कुटुंब नाथ्रा येथील शेतातील घरी राहत आहोत. ही गोष्ट सर्वांनाच माहिती आहे,” असे त्यांनी सांगितले.

Raigad News: “केलकम कंपनीच्या कामगारांचे देणे द्या अन्यथा….” ; शिवसेना ठाकरे गटाचा साधना कंपनीला इशारा

मुंडे यांनी सुरेश धस यांच्यावर दुटप्पीपणा आणि खोटे आरोप करण्याचा आरोप करत, “ज्यांनी आरोप केले, त्याच लोकांनी यापूर्वी मी शेतातील घरात राहतो, असे सांगितले होते. मात्र, आता केवळ माझी आई तिथे राहते असे भासवले जात आहे, हे हास्यास्पद आहे,” असे त्यांनी स्पष्ट केले.

आईवर आरोप करणाऱ्यांना इशारा

धनंजय मुंडे यांनी या आरोपांवर संतप्त प्रतिक्रिया देत “माझ्या आईबद्दल खोटे आरोप करणाऱ्यांना मी सोडणार नाही” असा इशारा दिला आहे. तसेच, “राजकारणाच्या पातळीवर चर्चा करण्याऐवजी कुटुंबीयांना गोवले जात आहे, हे अत्यंत खेदजनक आहे” असेही त्यांनी म्हटले आहे. सुरेश धस आणि धनंजय मुंडे यांच्यातील संघर्ष दिवसेंदिवस अधिकच तीव्र होत असून, ईडीच्या तक्रारीनंतर मुंडेंना चौकशीला सामोरे जावे लागते का? याकडे राजकीय वर्तुळाचे लक्ष लागले आहे.