दिव्या शिंदेवर गुन्हा दाखल
पुणे : ‘बिग बॉस’ मराठी फेम दिव्या शिंदेवर पुण्यातील एका डॉक्टरच्या घरात घुसून त्यांना पट्ट्यांनी आणि काठ्यांनी मारहाण केल्याचा आरोप आहे. रील स्टार दिव्या शिंदेसह 10 जणांविरुद्ध काळेपडळ पोलीस ठाण्यात गुन्हा दाखल करण्यात आला आहे. दिव्या शिंदेला डॉक्टरने ५ लाख रुपयांची खंडणी दिली नाही, तेव्हा त्यांनी त्याला बेदम मारहाण केली आणि त्याची कार पळवून नेल्याचाही आरोप करण्यात आला आहे.
पुणे कॅन्टोन्मेंट बोर्डाचे माजी मुख्य वैद्यकीय अधिकारी (सीएमओ) डॉ. विद्याधर गायकवाड यांनी ही तक्रार दाखल केली आहे. ‘आर्ट इन्व्हेन्शन फेस्टिव्हल’च्या प्रमोशनच्या बदल्यात आरोपी ५ लाख रुपयांची मागणी करत असल्याचा आरोप आहे. तक्रारीनुसार, ऑगस्ट महिन्यापासून फोन आणि मेसेजद्वारे पैशांची मागणी केली जात होती. 17 सप्टेंबर रोजी दिव्या शिंदे आणि इतर काही लोकांनी डॉ. गायकवाड यांच्या घरी भेट दिली. त्यानंतर २३ सप्टेंबर रोजी त्यांना एका हॉटेलमध्ये बोलावून पुन्हा ५ लाख रुपयांची मागणी करण्यात आली. पैसे न दिल्यास गुंडांकडून मारहाण करण्याची धमकी देण्यात आली.
दरम्यान, डॉ. गायकवाड यांनी दिव्यासह तिच्या साथीदारांना मारहाण थांबवण्याची विनंती केली, परंतु आरोपींनी नकार दिला. घरातील वस्तूंची तोडफोड केली. जेव्हा डॉ. गायकवाड यांनी ५ लाख रुपये दिले नाहीत, तेव्हा आरोपी त्यांची गाडी घेऊन पसार झाले. या प्राणघातक हल्ल्यात जखमी झालेले डॉ. गायकवाड यांच्यावर सध्या पुण्यातील ससून रुग्णालयात उपचार सुरू आहेत.
दिव्या शिंदेसह 10 जणांविरोधात गुन्हा दाखल
पोलिसांनी दिव्या शिंदे, अण्णा धामधेरे आणि इतर आठ ते दहा जणांविरुद्ध विविध कलमांखाली गुन्हा दाखल केला आहे. सहाय्यक पोलीस निरीक्षक (एपीआय) अमित शेटे या प्रकरणाचा पुढील तपास करत आहेत.
कल्याणमध्ये खंडणीसाठी व्यावसायिकाचे अपहरण
दुसऱ्या एका घटनेत, कल्याणमधील व्यावसायिक जयराम नेहलानी यांचे 50 लाख रुपयांच्या खंडणीसाठी अपहरण केल्याच्या प्रकरणाचा उल्हासनगर पोलिसांनी छडा लावला आहे. या प्रकरणात पोलिसांनी मुख्य सूत्रधार आणि इस्टेट एजंट सचिन शिरसाट याच्यासह पाच आरोपींना अटक केली आहे. आणखी दोन आरोपी फरार असून त्यांचा शोध घेण्यासाठी पोलिसांची पथके कार्यरत आहेत.
.png "Videos"){kind=small}
