शनिवार, 26 सप्टेंबर 2026
50 लाख उकळले अन् म्हणाला ‘थँक्यू अंकल’! उल्हासनगरमध्ये अपहरण-खंडणी प्रकरणाचा पर्दाफाश
50 लाखांच्या खंडणीसाठी व्यावसायिकाचे अपहरण
मुख्य सूत्रधारासह 5 जणांना अटक
उल्हासनगर पोलिसांची मोठी कारवाई
Ulhasnagar Crime: कल्याणमधील व्यावसायिक जयराम नेहलानी यांचे 50 लाख रुपयांच्या खंडणीसाठी अपहरण केल्याच्या प्रकरणाचा उल्हासनगर पोलिसांनी छडा लावला आहे. या प्रकरणात पोलिसांनी मुख्य सूत्रधार आणि इस्टेट एजंट सचिन शिरसाट याच्यासह पाच आरोपींना अटक केली आहे. आणखी दोन आरोपी फरार असून त्यांचा शोध घेण्यासाठी पोलिसांची पथके कार्यरत आहेत.
काही दिवसांपूर्वी जयराम नेहलानी हे उल्हासनगरमधील गोल मैदान परिसरात असताना त्यांचे अपहरण करण्यात आले. पोलिसांच्या तपासानुसार, अपहरणकर्त्यांनी नेहलानी यांच्या कुटुंबीयांशी संपर्क साधून त्यांच्या सुटकेच्या बदल्यात 50 लाख रुपयांची खंडणी मागितली. व्यावसायिकाच्या सुरक्षिततेची चिंता असल्याने त्यांच्या नातेवाईकांनी आरोपींच्या सूचनेनुसार कल्याण येथे जाऊन एका व्यक्तीकडे मागितलेली रक्कम दिली.
यावेळी एक धक्कादायक प्रकार घडल्याचे सांगण्यात आले. पैसे स्वीकारल्यानंतर संबंधित व्यक्तीने काही वेळात जयराम नेहलानी घरी पोहोचतील, असे त्यांच्या नातेवाईकाला सांगितले. त्यानंतर ‘थँक्यू अंकल’ असे म्हणत तो तेथून निघून गेल्याची माहिती समोर आली आहे.
दरम्यान, नेहलानी यांच्या अपहरणाची माहिती उल्हासनगरचे डीसीपी सचिन गोरे यांना मिळाल्यानंतर पोलिसांनी तातडीने तपासाची चक्रे फिरवली. आरोपींचा शोध घेण्यासाठी 10 स्वतंत्र पोलीस पथके तयार करण्यात आली. परिसरातील सीसीटीव्ही फुटेज, आरोपींच्या हालचाली आणि इतर तांत्रिक माहितीच्या आधारे पोलिसांनी तपास सुरू केला.
तपासाची साखळी जोडत पोलीस खडवली परिसरात पोहोचले. तेथे स्थानिक नागरिकांच्या मदतीने शोधमोहीम राबवण्यात आली. अखेर पोलिसांना जयराम नेहलानी यांचा ठावठिकाणा मिळाला आणि त्यांची सुखरूप सुटका करण्यात आली. या कारवाईदरम्यान एका संशयित आरोपीला ताब्यात घेण्यात आले. त्याच्या चौकशीतून पोलिसांना या प्रकरणातील इतर आरोपींबाबत माहिती मिळाल्याचे सांगण्यात आले.
पुढील तपासात नेहलानी यांच्या परिचयातील इस्टेट एजंट सचिन शिरसाट हा या अपहरणाचा कथित मुख्य सूत्रधार असल्याचे पोलिसांच्या तपासात समोर आले. पोलिसांच्या आरोपानुसार, शिरसाटने काही तरुणांना सोबत घेऊन टोळी तयार केली आणि नेहलानी यांच्या अपहरणाचा कट आखला. घटनेनंतर तो फरार झाला होता. पोलिसांनी त्याचा शोध घेऊन अखेर त्यालाही अटक केली.
या प्रकरणात अनिल जगताप, विशाल चंद्रमोरे, रमेश जाधव, सचिन शिरसाट आणि राहुल सोनी या पाच आरोपींना अटक करण्यात आली आहे. तर सतीश दोंदे आणि मयूर दराने हे दोन संशयित आरोपी अद्याप फरार असल्याची माहिती आहे. त्यांचा शोध घेण्यासाठी पोलिसांकडून विविध ठिकाणी तपास सुरू आहे.
या अपहरणामागील नेमका आर्थिक वाद किंवा इतर कारण काय होते, आरोपींनी अपहरणाचे नियोजन कसे केले, 50 लाख रुपयांच्या खंडणीच्या रकमेचे पुढे काय झाले आणि या प्रकरणात आणखी कोणाचा सहभाग आहे का, याचा तपास उल्हासनगर पोलीस करत आहेत. तसेच आरोपींविरोधात महाराष्ट्र संघटित गुन्हेगारी नियंत्रण कायद्यानुसार (MCOCA/मोका) कारवाई करण्याची प्रक्रिया केली जाणार असल्याची माहिती समोर आली आहे.
पोलिस कर्मचाऱ्याची गोळ्या झाडून आत्महत्या; निगडीतील बस डेपोमध्ये आढळला मृतदेह
