
Murder case Update: मित्रावर संशय, पण मास्टरमाइंड निघाली पत्नी! कारच्या जीपीएसवरून लोकेशन हेरले अन् जंगलात...
घनदाट जंगलात मित्रासोबत फिरायला गेलेल्या विवाहितेची अशाप्रकारे हत्या झाल्याने संपूर्ण जिल्ह्यात खळबळ उडाली. तिच्यासोबत केवळ तिचा मित्र होता. त्यामुळे त्यानेच ही हत्या घडवून आणल्याचा संशय व्यक्त केला गेला. मात्र आता या प्रकरणात मोठा ट्विस्ट आला आहे. ही हत्या नितेशनं नव्हे तर त्याची पत्नी मोना अग्रवालने घडवून आणल्याचं पोलीस तपासात समोर आलं आहे. मोनाने आपल्या घराशेजारी राहणाऱ्या शाहरूख खान पठाण याला १३ लाखांची सुपारी दिली होती.
आपला पती नितेश याचे एअर होस्टेस वर्षा तुरकर हिच्यासोबत अनैतिक संबंध असल्याचा संशय मोनाला होता. यातूनच तिने सुपारी देऊन ही हत्या घडवली. मात्र वर्षा आणि नितेश जंगलात फिरायला गेले होते. अशात यांचं लोकेशन हल्लेखोरांना कसं मिळालं? याबाबत पोलीस तपासात चक्रावून टाकणारा प्रकार समोर आला आहे.
पोलीस तपासात समोर आलेल्या माहितीनुसार, नितेश वापरत असलेली कार ही त्याची पत्नी मोना हिच्याच नावावर होती. मोनाने कारच्या ‘टोयोटा आय-कनेक्ट’ या जीपीएस ॲपचा आयडी आणि पासवर्ड आरोपींच्या मोबाईलमध्ये टाकून दिला होता. याच जीपीएस लोकेशनचा माग काढत आरोपींनी बोंडरानीचे जंगल गाठलं आणि वर्षावर चाकूने सपासप वार करून तिची निर्घृण हत्या केली.
सुरुवातीला वर्षाची हत्या कुणी केली? याबाबत पोलिसांकडे काहीच पुरावे नव्हते. नितेशनेच फोन करून वर्षावर हल्ला झाल्याची माहिती दिली होती. चोरीच्या उद्देशाने हल्ला झाल्याचं नितेशनं सांगितलं होतं. मात्र वर्षाच्या अंगावरील दागिने तसेच होते. त्यामुळे नितेशनेच काहीतरी घातपात केला असावा, असा संशय पोलिसांना होता. मात्र स्थानिक गुन्हे शाखेने तांत्रिक तपास आणि तब्बल २५० सीसीटीव्ही फुटेजच्या आधारे या गूढ गुन्ह्याचा उलगडा करत मुख्य सूत्रधार पत्नीसह चौघांना बेड्या ठोकल्या आहेत. इमरान करीम शेख, शाहरुख खान पठाण, कुणाल कुंभलकर आणि मोना नितेश अग्रवाल अशी अटक केलेल्या चौघांची नावं आहेत. इतर दोन आरोपी अद्याप फरार आहेत. पोलीस त्यांचा शोध घेत आहेत.
Ans: पोलीस तपासात समोर आलेल्या माहितीनुसार, नितेश अग्रवाल याची पत्नी मोना अग्रवाल हिने पतीच्या अनैतिक संबंधांच्या संशयातून १३ लाखांची सुपारी देऊन ही हत्या घडवून आणली.
Ans: नितेश वापरत असलेली कार मोनाच्या नावावर होती आणि तिने कारच्या 'टोयोटा आय-कनेक्ट' जीपीएस ॲपचा आयडी व पासवर्ड आरोपींना दिला होता, ज्याद्वारे लोकेशन ट्रॅक करून हल्लेखोर जंगलात पोहोचले.
Ans: स्थानिक गुन्हे शाखेने मोना नितेश अग्रवाल, शाहरुख खान पठाण, इमरान करीम शेख आणि कुणाल कुंभलकर या चौघांना अटक केली असून उर्वरित दोन फरार आरोपींचा शोध सुरू आहे.