पोर्शे अपघात प्रकरणात सरकारी वकिलांची मोठी माहिती; अजय तावरेनेच ‘तो’ कट रचल्याचे पुरावे…

रक्ताचे नमुने बदलून पुरावा नष्ट करण्याच्या कटात डॉ. अजय तावरेचा सक्रिय सहभाग सिद्ध करणारे पुरेसे पुरावे आहेत, अशी माहिती सरकार पक्षातर्फे गुरुवारी विशेष न्यायालयात देण्यात आली.

पुणे : कल्याणीनगर पोर्शे अपघातानंतर अल्पवयीन कारचालकासह त्याच्या मित्रांच्या रक्ताचे नमुने बदलण्यासाठी ससून रुग्णालयाच्या न्यायवैद्यक विभागाचा तत्कालीन प्रमुख डॉ. अजय तावरेच मुख्य वैद्यकीय अधिकारी डॉ. श्रीहरी हाळनोर व वॉर्डबॉय अतुल घटकांबळेच्या संपर्कात होता. त्यामुळे रक्ताचे नमुने बदलून पुरावा नष्ट करण्याच्या कटात डॉ. अजय तावरेचा सक्रिय सहभाग सिद्ध करणारे पुरेसे पुरावे आहेत, अशी माहिती सरकार पक्षातर्फे गुरुवारी विशेष न्यायालयात देण्यात आली.

कल्याणीनगर भागात गेल्या वर्षी (दि. १८ मे २०२४) मध्यरात्री अल्पवयीन मुलाने ‘पोर्शे’ कार भरधाव चालवून दुचाकीला उडविले होते. या अपघातात तरुण-तरुणीचा मृत्यू झाला होता. या अल्पवयीन मुलाने व त्याच्या मित्रांनी अपघातापूर्वी मुंढव्यात मद्यपान केले होते. त्यामुळे रक्ताचे नमुने तपासण्यासाठी सर्वांना ससून रुग्णालयात नेले होते. तिथे या मुलांच्या रक्ताचे नमुने बदलण्यासाठी विशाल व शिवानी अगरवाल, अरुणकुमार सिंग यांनी अश्पाक मकानदार, अमर गायकवाड, आदित्य सूद, आशिष मित्तल यांच्याशी संगनमत करून शिपाई अतुल घटकांबळेमार्फत ‘ससून’च्या आपत्कालीन विभागाचा तत्कालीन मुख्य वैद्यकीय अधिकारी डॉ. श्रीहरी हाळनोर आणि न्यायवैद्यक विभागाचा तत्कालीन प्रमुख डॉ. अजय तावरे यांना लाच दिल्याचे पोलिसांच्या तपासात निष्पन्न झाले. सर्व आरोपींविरोधात भारतीय दंड संहिता आणि मोटार वाहन कायदा व भ्रष्टाचार प्रतिबंधक कायद्याच्या कलमान्वये आरोपपत्र दाखल करण्यात आले आहे.

याप्रकरणात सत्र न्यायाधीश के. पी. क्षीरसागर यांच्या न्यायालयात आरोपी अजय तावरे याने निर्दोष मुक्ततेसाठी अर्ज केला आहे. त्याला विशेष सरकारी वकील शिशिर हिरे यांनी विरोध केला. घटनेच्या दिवशी रजेवर असल्याचा दावा तावरे याने केला आहे. परंतु, त्याचे कॉल डिटेल रेकॉर्ड तपासले असता, तो डॉ. हाळनोर व अतुल घटकांबळेच्या संपर्कात असल्याचे दिसत आहे. पालकांच्या सांगण्यावरून अल्पवयीन मुलांच्या रक्ताचे नमुने बदलण्यासाठी त्याने दबाव टाकला. साक्षीदारांनी कबुलीजबाब नोंदविला असून, त्याद्वारे तावरे याची या कटात महत्त्वाची भूमिका निदर्शनास येते, असा युक्तिवाद हिरे यांनी केला. या अर्जावर १० जून पुढील सुनावणी रोजी होणार असून, तावरे याचे वकील युक्तिवाद करणार आहेत.

हे सुद्धा वाचा : सोलापूर-पुणे महामार्गावर भीषण अपघात; भरधाव टेम्पोच्या धडकेत दुचाकीस्वाराचा मृत्यू