समृद्धी महामार्गावर भीषण अपघात; कारचे टायर फुटल्याने कार उलटून एकाचा मृत्यू

छत्रपती संभाजीनगर येथील सीआरओकडून समृद्धी महामार्गावरील चॅनल क्रमांक ३२५.३ येथे अपघात झाल्याची माहिती मिळाल्यानंतर समृद्धी महामार्ग उपकेंद्राचे पोलिस पथक तातडीने घटनास्थळी रवाना झाले.

बुलढाणा : समृद्धी महामार्गाच्या नागपूर कॉरिडोरवरील चॅनल क्रमांक ३२५.३ येथे स्कॉर्पिओ कारचे टायर फुटल्याने कार पलटी होऊन अपघात झाला. या अपघातात एक जण ठार, तर आठ जण किरकोळ जखमी झाले. अमन साहू (वय २५) यांना गंभीर दुखापत झाली. त्यानंतर उपचारादरम्यान त्यांची प्राणज्योत मालवली.

मिळालेल्या माहितीनुसार, छत्रपती संभाजीनगर येथील सीआरओकडून समृद्धी महामार्गावरील चॅनल क्रमांक ३२५.३ येथे अपघात झाल्याची माहिती मिळाल्यानंतर समृद्धी महामार्ग उपकेंद्राचे पोलिस पथक तातडीने घटनास्थळी रवाना झाले. पोलिस उपनिरीक्षक अनिता इर्शीद यांच्या नेतृत्वाखालील पथक दुपारी १२.०५ वाजता घटनास्थळी पोहोचले. त्यावेळी एक कार (सीजी ०८ / बीसी ४४०५) ही रस्त्यावर पलटी झालेल्या अवस्थेत आढळून आली. कारचालक हेमंत विश्वकर्मा (वय २४, रा. राजनांदगाव, छत्तीसगड) यांच्याकडे चौकशी केली असता, ते आपल्या मित्रांसह नाशिकहून नागपूरकडे जात असल्याचे सांगितले.

प्रवासी छत्तीसगड राज्यातील

प्रवासादरम्यान कारच्या पाठीमागील डाव्या बाजूचे टायर अचानक फुटले. त्यामुळे कारवरील चालकाचे नियंत्रण सुटले आणि कार पलटी होऊन हा अपघात झाला. अपघातात तीकेस बंदे, रवी साहू, यश साहू, देवेश साहू, हेमंत विश्वकर्मा, वासू साहू, विकी साहू, किशन विश्वकर्मा आणि नवीन साहू यांना दुखापत झाली. जखमींना अॅम्ब्युलन्सच्या मदतीने उपचारासाठी शासकीय रुग्णालय, सिंदखेडराजा येथे हलवण्यात आले. अपघातग्रस्त स्कॉर्पिओ क्रेनच्या सहाय्याने हटवून दुसरबीड टोलनाका येथे लावण्यात आली. त्यामुळे महामार्गावरील वाहतूक सुरळीत सुरू राहिली असून, घटनास्थळी शांतता असल्याचे पोलिसांनी सांगितले.

खराब रस्त्यामुळे चार महिन्यांत पाच जणांचा मृत्यू

नाशिक गेल्या सहा महिन्यांपासून शहरातील रस्ते खोदून (Nashik Pothole Deaths) ठेवले आहेत. उन्हाळ्यात रस्त्यांची अपेक्षित डागडूजी किंवा नवीन कामे न करता, महापालिका प्रशासन आणि सरकारने एकाच वेळी सर्व कामे हातात घेतल्याने रस्त्यांची चाळण झाली आहे. प्रशासनाच्या या अक्षम्य हलगर्जीपणामुळे नाशिककरांना रस्त्यांवरून चालताना जीवघेणी कसरत करावी लागत असून, गेल्या चार महिन्यांत वेगवेगळ्या अपघातांत खड्यांमुळे तब्बल पाच निष्पाप नागरिकांचा जीव गेला आहे. या दुर्दैवी मृतांमध्ये निलेश कोतकर, प्रभाकर निकम, दिपाली बेळे आणि प्रवीण गायकवाड यांचा समावेश आहे.