कात्रजमध्ये पेट्रोल पंपावरील कामगाराला दांडक्याने मारहाण; साडेतीन लाखांची रोकड लूटण्याचा प्रयत्न

कात्रज-कोंढवा रस्त्यावर पेट्रोल पंपावरील कामगाराला धमकावून चोरट्यांनी त्यांच्याकडील त्याच्याकडील साडेतीन लाखांची रोकड लूटण्याचा प्रयत्न केला.

पुणे : कात्रज-कोंढवा रस्त्यावर पेट्रोल पंपावरील कामगाराला धमकावून चोरट्यांनी त्यांच्याकडील त्याच्याकडील साडेतीन लाखांची रोकड लूटण्याचा प्रयत्न केला. चोरट्यांनी केलेल्या मारहाणीत कामगार जखमी झाला आहे. याबाबत सलीम सिकंदर शेख (वय ३१, रा. भैरवनाथ मंदिरासमोर, खडकवासला) यांनी भारती विद्यापीठ पोलीस ठाण्यात तक्रार दिली आहे. त्यानूसार, तीन चोरट्यांवर गुन्हा दाखल करण्यात आला आहे. चोरट्यांनी दांडक्याने मारहाण केली.

पोलिसांच्या माहितीनुसार, शेख एका पेट्रोल पंपावर कामाला आहेत. सोमवारी (१३ जानेवारी) दुपारी साडेचारच्या सुमारास ते पेट्रोल पंपावर जमा झालेली रोकड घेऊन बँकेत भरणा करण्यासाठी निघाले होते. कात्रज-कोंढवा रस्त्यावरील माऊलीनगर परिसरात तीन चोरट्यांनी त्यांना अडवले. लाकडी दांडक्याने त्यांना मारहाण केली. डोक्यात दांडके बसल्याने ते जखमी झाले. झटापटीत चोरट्यांनी शेख यांच्याकडील रोकड ठेवलेली पिशवी हिसकावण्याचा प्रयत्न केला.

शेख यांनी प्रसंगावधान राखून पिशवी घट्ट पकडली. त्यांचा आरडाओरडा ऐकून नागरिक तेथे जमा झाले. नागरिक जमा झाल्याचे पाहताच चोरटे पसार झाले. या घटनेची माहिती मिळताच पोलीस उपायुक्त स्मार्तना पाटील, सहायक आयुक्त राहुल आवारे, भारती विद्यापीठ पोलीस ठाण्याचे वरिष्ठ निरीक्षक दशरथ पाटील यांनी घटनास्थळी धाव घेतली. पसार झालेल्या चोरट्यांचा माग काढण्यात येत असून, सहायक पोलीस निरीक्षक शेंडे अधिक तपास करत आहेत.

हे सुद्धा वाचा : पुणे हादरलं! पत्नीवर चाकूने सपासप वार; पतीचाही आत्महत्येचा प्रयत्न

पुन्हा तेच चोरटे ॲक्टीव्ह?

पुण्यात सहा वर्षांपुर्वी सोनसाखळी चोरट्यांनी मोठ्या प्रमाणात धुमाकूळ घातला होता. दिवसाला तीन ते चार सोनसाखळी चोरीच्या घटना घडत असत. पादचारी महिला तसेच ज्येष्ठ महिला या चोरट्यांच्या टार्गेटवर असत. तीन राज्यात या टोळ्यांनी मोठा गोंधळ घातला होता. पुणे पोलिसांनी तीन राज्यातील माहिती एकत्रित करून या चोरट्यांचा माग सुरू केला होता. नंतर यातील काही टोळ्यांना पकडण्यात यश देखील आले होते. त्यांच्यावर मोक्कासारखी कारवाई देखील केली होती. नंतर या घटना थांबल्या होत्या. परंतु, आता पुन्हा सहा वर्षांनी सोन साखळी टोळ्या ॲक्टीव्ह झाल्याचे गेल्या काही महिन्यांपासून दिसत आहे. त्यामुळे पुन्हा तेच चोरटे ॲक्टीव्ह झाले आहेत का ? असा प्रश्न उपस्थित झाला आहे.

पान टपरी फोडून चोरी

पुणे स्टेशन परिसरात हॉटेलजवळ असलेली पान टपरी अज्ञाताने फोडून सिगारेट पाकीट आणि रोकड असा ३७ हजार रुपयांचा ऐवज चोरून नेला. ही घटना रविवारी दुपारी एकच्या सुमारास घडली. या प्रकरणी मंगळवार पेठ येथे राहणाऱ्या ६५ वर्षीय व्यक्तीने तक्रार दिली आहे. त्यावरून बंडगार्डन पोलिस ठाण्यात गुन्हा दाखल करण्यात आला आहे. सहायक निरीक्षक अर्जुन मोहिते याचा तपास करीत आहेत.