मोबाइल चोरण्यासाठी तरुणाला फरफटत नेलं, हाताचाही घेतला चावा; पुण्यातील धक्कादायक प्रकार

हडपसर भागात पादचारी तरुणाचा मोबाइल चोरट्यांनी चोरुन नेण्याचा प्रयत्न केला आहे. तरुणाने चोरट्यांना विरोध केल्यानंतर चोरट्यांनी तरुणाला फरफटत नेल्याचा प्रकार उघडकीस आला आहे.

पुणे : हडपसर भागात पादचारी तरुणाचा मोबाइल चोरट्यांनी चोरुन नेण्याचा प्रयत्न केला आहे. तरुणाने चोरट्यांना विरोध केल्यानंतर चोरट्यांनी तरुणाला फरफटत नेले, तसेच दुचाकीवरील दुसऱ्या चोरट्याने तरुणाच्या हाताचा चावा घेतला. त्यानंतर तरुणाचा मोबाइल चोरुन चोरटे पसार झाले. याबाबत २१ वर्षीय तरुणाने हडपसर पोलीस ठाण्यात तक्रार दिली.

तरुण हडपसर भागातील भगीरथीनगर परिसरात राहायला आहे. शुक्रवारी रात्री साडेआठच्या सुमारास पादचारी तरुण भगीरथीनगर परिसरातून निघाला होता. तेव्हा सोसायटीकडे वळत असताना दुचाकीवरुन आलेल्या चोरट्यांनी तरुणाचा मोबाइल चोरण्याचा प्रयत्न केला. तरुणाने त्यांना विरोध केला, तसेच चोरट्यांना रोखण्याचा प्रयत्न केला. त्यावेळी चोरट्याने तरुणाला २०० ते ३०० मीटर अंतरापर्यंत फरफटत नेले. तर दुसऱ्याने तरुणाच्या हाताचा चावा घेतला. झटापटीत तरुणाच्या गुडघ्याला दुखापत झाली. पोलीस उपनिरीक्षक अर्जुन कुदळे अधिक तपास करत आहेत. शहरात पादचाऱ्यांना लुटण्याच्या घटनांमध्ये वाढ झाली आहे.

हे सुद्धा वाचा : पुण्यात कार चालकाची मुजोरी; उड्डाणपुलावर दिली दुचाकीस्वार दाम्पत्याला धडक

विवाह समारंभात महिलेचे दीड लाखांचे दागिने चोरले

विवाह समारंभातून ज्येष्ठ महिलेचे दीड लाखांचे दागिने ठेवलेली पिशवी चोरुन नेल्याची घटना नगर रस्ता भागातील एका मंगल कार्यालयात घडली. याबाबत ६६ वर्षीय ज्येष्ठ महिलेने लोणीकंद पोलीस ठाण्यात तक्रार दिली आहे. तक्रारादार महिला चंदननगर भागात राहायला आहेत. त्यांच्या नात्यातील एकाचा विवाह गेल्या महिन्यात होत्या. फुलगाव येथील एका मंगल कार्यालयात विवाह समारंभाचे आयोजन करण्यात आले होते. ज्येष्ठ महिलेने दीड लाखांचे दागिने असलेली पिशवी मंगल कार्यालयातील खोलीत ठेवली होती. महिलेचे लक्ष नसल्याची संधी साधून चोरट्याने दागिने ठेवलेली पिशवी चोरुन नेली. विवाह समारंभ पार पडल्यानंतर महिलेने नुकतीच पोलिसांकडे तक्रार दिली. सहायक पोलीस निरीक्षक विजया वंजारी तपास करत आहेत.

महिलांकडील मोबाइल लंपास

पुणे शहरात दुचाकीस्वार चोरट्यानी धुमाकूळ घातला असून, पादचारी महिलांकडील दागिने तसेच मोबाइल चोरून नेण्याच्या घटनांत वाढ झाली आहे. प्रभात रस्त्यावरील हिरवाई उद्यान येथे दुचाकीस्वार चोरट्यांनी पादचारी महिलेकडील मोबाइल चोरून नेल्याची घटना घडली. नगर रस्त्यावरील वाघोली भागात दुचाकीस्वार महिलेच्या गळ्यातील साडेतीन लाखांचे मंगळसूत्र चोरट्यांनी चोरून नेले, तर हडपसरमध्ये ज्येष्ठ महिलेचे मंगळसूत्र चोरण्याचा प्रयत्न झाला. सातत्याने या घटना घडत असताना पोलिसांना मात्र या चोरट्यांचा थांगपत्ता लागत नसल्याचे वास्तव आहे. याप्रकरणी ५२ वर्षीय महिलेने डेक्कन पोलीस ठाण्यात तक्रार दिली आहे. तक्रारदार महिला प्रभात रस्त्यावरील गल्ली क्रमांक १५ परिसरातील सोसायटीत राहायला आहेत. त्या बुधवारी सायंकाळी प्रभात रस्ता परिसरातील हिरवाई उद्यान परिसरात चालायला गेल्या होत्या. तेथून त्या घरी निघाल्या होत्या. त्यावेळी त्यांच्या मोबाइलवर वहिनीचा फोन आला. त्यामुळे त्या मोबाइलवर बोलत पायी चालत असताना गल्ली क्रमांक १५ परिसरातील सिंबायोसिस शाळेसमोर महिलेच्या हातातील २० हजारांचा मोबाइल चोरून दुचाकीस्वार चोरटे पसार झाले. चोरट्यांनी हेल्मेट परिधान केले होते. सहायक पोलीस फौजदार राजेंद्र मारणे तपास करत आहेत.