Jalgaon Crime News: रागाच्या भरात बायकोने लगावली कानशिलात, पतीने राग मनात ठेवून घेतला भयानक बदला…

Jalgaon Crime News: "लग्न नाही केलं तर जीव देईन..." म्हणत घरच्यांच्या विरोधात जाऊन संसार मांडला, पण रागाच्या एका थडक्याने सर्वकाही संपवले! जळगावच्या यावलमध्ये चारित्र्याच्या संशयावरून पतीनेच २० वर्षीय पत्नीचा केलेला खून अन् आईच्या हंबरड्याने सुन्न झालेली ती काळी रात्र!

• संशयावरून पतीने २० वर्षीय पत्नीचा गळा दाबून  केला खून
• बायकोने कानशिलात लगावल्याचा राग मनात धरून कृत्य
• पोलिसांनी आरोपी पतीला अवघ्या काही तासांत बेड्या ठोकल्या

Jalgaon Crime News: प्रेमाखातर घरच्यांच्या विरोधात जाऊन ज्या लेकीने स्वतःचा संसार मांडला, त्याच पतीने तिचा घात केल्याची एक मन हेलावून टाकणारी थरारक घटना जळगाव जिल्ह्यातील यावल शहरातून समोर आली आहे. चारित्र्याच्या संशयावरून पतीने अवघ्या २० वर्षांच्या तरुण पत्नीचा गळा दाबून निर्घृण खून केल्याने संपूर्ण परिसरात एकच खळबळ उडाली आहे. मृत मुलीच्या आईने पोलिस ठाण्यात केलेला हंबरडा बघून उपस्थितांचेही काळीज पिळवटून आले.

हेही वाचा: Tuljapur Murder Case: रात्रीच्या अंधारात घरात घुसून तरुणाला बळजबरीने नेलं पळवून; तुळजापूरमधील त्या सामूहिक हल्ल्यामागील गूढ रहस्य!

चारित्र्याच्या संशयावरून कडाक्याचे भांडण

यावलमधील अयेशा नगरात फरदीन खान आरिफ खान आणि त्याची पत्नी मशिराबी फरदीन खान हे तरुण जोडपे राहत होते. मंगळवारी घरात दोघेच असताना त्यांच्यात चारित्र्याच्या संशयावरून कडाक्याचे भांडण झाले. या वादाच्या भरात संतापाच्या आहारी गेलेल्या मशिराबीने फरदीनच्या कानशिलात लगावली. एका थडक्याचा आणि अपमानाचा राग मनात ठेवून संतापलेल्या फरदीनने मशिराबीचा गळा दाबून निर्घृण खून केला आणि तो घटनास्थळावरून फरार झाला.

हेही वाचा: Payal Jhambre Update: पतीनंतर आता सासू-सासरेही पोलिसांच्या ताब्यात; मुकुंदनगरमधील पायल झांबरे प्रकरणातील सर्वात मोठे अपडेट!

लेकीच्या मृत्यूनंतर आईचा हंबरडा; आरोपी पती जेरबंद

हत्येचा हा प्रकार उघडकीस येताच यावल पोलिसांनी तातडीने सूत्रे हलवत पसार झालेल्या आरोपी फरदीन खानला ताब्यात घेतले. सुरत वरून तातडीने धाव घेतलेली मृत मशिराबीची आई सफीयाबी सय्यद अक्रम यांनी दिलेल्या फिर्यादीवरून पोलिसांनी खुनाचा गुन्हा दाखल केला आहे. लेकीच्या मृत्यूनंतर आईने पोलिस ठाण्यात फोडलेला टाहो आणि या घटनेमुळे संपूर्ण यावल शहरात पसरलेली सुन्न शांतता मनाला व्यथित करणारी आहे. या गंभीर गुन्ह्याचा पुढील तपास पोलिस निरीक्षक रंगनाथ धारबळे यांच्या मार्गदर्शनाखाली पोलिस उपनिरीक्षक मैनोद्दीन सय्यद करत आहेत.