दारूच्या नशेत बापाचा मुलीवर बळजबरी करण्याचा प्रयत्न; संतापलेल्या मुलीने थेट बॅट घातली डोक्यात अन्…

नराधम वडिलाचा काही वेळातच मृत्यू झाला. तेवढ्यात आई घरी आली. घडलेला प्रकार मुलीने आईला सांगितला. त्यानंतर मुलीने डायल ११२ वर कॉल करून पोलिसांना माहिती दिली. एमआयडीसीचे ठाणेदार बाबुराव राऊत लगेच पथकासह घटनास्थळी पोहचले.

• पोटच्या अल्पवयीन मुलीवरच बळजबरी
• घरात कोणीही नसल्याची संधी साधली
• मुलीने स्वत:च पोलिसांत केला फोन; पत्नीने दिली तक्रार

नागपूर : नराधम बापाने दारूच्या नशेत पोटच्या अल्पवयीन मुलीवरच बळजबरी करण्याचा प्रयत्न केला. बचावासाठी मुलीने घरात ठेवलेली बॅट उचलून बापावर हल्ला केला. डोक्यावर प्रहार झाल्याने बाप रक्तबंबाळ होऊन कोसळला आणि उपचारापूर्वीच त्याचा मृत्यू झाला. ही घटना सोमवारी रात्री एमआयडीसी पोलिस ठाण्याच्या हद्दीत घडली. खेसारीलाल (बदललेले नाव) असे मृताचे नाव आहे.

पोलिसांनी मृताची पत्नी दीपा (वय ३८) यांच्या तक्रारीवरून खुनाचा गुन्हा नोंदवत अल्पवयीन मुलीला ताब्यात घेतले आहे. पोलिसांनी दिलेल्या माहितीनुसार, ४५ वर्षीय खेसारीलाल हा पत्नी, १७ वर्षीय मुलगी आणि मुलासह राहत होता. मुलगी ही बाराव्या वर्गात तर मुलगा आठव्या वर्गात शिकतो. तो मोलमजुरीचे काम करायचा. दारूच्या आहारी गेल्यामुळे तो नियमित कामावर जात नव्हता. यामुळे पत्नी दीपा लोकांच्या घरी धुणी-भांडी करून कुटुंबाचा गाढा ओढत होती. खेसारीलालची मुलीवरच वाईट नजर होती. घरात कोणी नसताना तो तिच्याशी अश्लील चाळे करत होता. विरोध केल्यास शिवीगाळ करून मारहाण करत होता.

मुलगीने याबाबत आईलाही सांगितले होते. सोमवारी रात्री ८ वाजता खेसारीलाल दारूच्या नशेत घरी आला. पत्नी कामानिमित्त घराबाहेर होती तर मुलगा खेळायला गेला होता. त्यामुळे घरात खेसारीलाल आणि मुलगी हे दोघेच होते. खेसारीलालने मुलीशी बळजबरी करण्याचा प्रयत्न केला. मुलीने विरोध केल्यानंतर वाद वाढला. खेसारीलालने तिला शिवीगाळ करून लाथाबुक्क्यांनी मारहाण करण्यास सुरुवात केली. स्वतःचा बचाव करण्यासाठी मुलीने शेजारीच पडलेली बॅट उचलून बापाच्या डोक्यात प्रहार केले. खेसारीलाल गंभीर जखमी होऊन कोसळला.

मुलीने स्वतःच केला पोलिसांना फोन

नराधम वडिलाचा काही वेळातच मृत्यू झाला. तेवढ्यात आई घरी आली. घडलेला प्रकार मुलीने आईला सांगितला. त्यानंतर मुलीने डायल ११२ वर कॉल करून पोलिसांना माहिती दिली. एमआयडीसीचे ठाणेदार बाबुराव राऊत लगेच पथकासह घटनास्थळी पोहचले. खेसारीलालला रुग्णालयात नेले. मात्र, डॉक्टरांनी मृत घोषित केले. पंचनामा केल्यानंतर मृताची पत्नी दीपा यांच्या तक्रारीवरून पोलिसांनी खुनाचा गुन्हा दाखल केला. मुलगी अल्पवयीन असल्याने तिच्याबाबतची पुढील कायदेशीर कार्यवाही बाल न्यायव्यवस्थेतील तरतुदींनुसार केली जात आहे.

मैत्रिणीच्या माध्यमातून ओळख; कॅफेत नेऊन अत्याचार केल्याचा आरोप, धमकीनंतर गरोदरपणाची तपासणी करण्यासाठी दबाव