मिळालेल्या माहितीनुसार, रामदेव पार्क परिसरात महापालिकेकडून जलवाहिनी अंथरण्याचे काम मागील काही दिवसांपासून हे काम संथ गतीने सुरू होते. त्यामुळे पालिकेच्या या दिरंगाईबाबत नाराजी व्यक्त करण्यासाठी मनसे पदाधिकारी रेश्मा तपासे या आपल्या सहकाऱ्यांसह घटनास्थळी पोहोचल्या होत्या. त्या पालिकेच्या कामकाजाचा व्हिडिओ बनवत असताना त्यांच्या मागे एक व्यक्ती अर्धनग्न अवस्थेत धूम्रपान करत उभी राहिली.यावेळी मनसे पदाधिकारी स्वप्नील तपासे यांनी संबंधित व्यक्तीला जाब विचारला असता त्याने आक्रमक होत “तुझं कच्चं मटण मला खायचं आहे” अशी धमकी दिली. त्यानंतर दोघांमध्ये जोरदार वाद झाला. वाद वाढल्यानंतर आरोपीने दगडाने स्वप्नील तपासे यांच्या डोक्यावर हल्ला केला.
ही घटना पाहून आरोपीचे इतर साथीदारही घटनास्थळी धावून आले आणि त्यांनी लोखंडी रॉड व इतर साहित्याच्या सहाय्याने स्वप्नील तपासे यांना बेदम मारहाण केली. दरम्यान, काही वेळात पोलिस घटनास्थळी दाखल झाले. मात्र आरोपींचा संताप इतका वाढला होता की त्यांनी पोलिसांसमोरच चॉपर काढून मनसे पदाधिकाऱ्याला मारण्याचा प्रयत्न केल्याचे सांगितले जात आहे.
ही संपूर्ण घटना उपस्थितांनी मोबाईल कॅमेऱ्यात कैद केली असून त्याचा व्हिडिओ सध्या सोशल मीडियावर व्हायरल होत आहे.या प्रकरणी स्वप्नील तपासे यांच्या तक्रारीवरून मिरा रोड पोलीस ठाण्यात नवीन सिंग ठाकूर, कृष्णा, गोलू सिंग, रावण ठाकूर आणि अन्य एका व्यक्तीविरुद्ध गंभीर कलमांखाली गुन्हा दाखल करण्यात आला आहे. पोलिसांनी तत्काळ कारवाई करत सर्व आरोपींना अटक केली असून पुढील तपास सुरू आहे.या घटनेमुळे मिरा रोड परिसरात राजकीय वर्तुळात मोठी खळबळ उडाली असून मनसे कार्यकर्त्यांकडून आरोपींवर कठोर कारवाईची मागणी करण्यात येत आहे.
.png "Videos"){kind=small}
