विष प्राशन करूनही जीव वाचवण्याची धडपड; रुग्णालयाच्या पायऱ्यांवर पतीने सोडले, नाशिकमधील घटनेने खळबळ

विष प्राशन केल्यानंतर जीव वाचवण्यासाठी एक महिला स्वतः गाडी चालवत रुग्णालयात पोहोचली; मात्र, पुढे जे घडले ते धक्कादायक होते. उपचारासाठी पैसे देण्यास नकार देत पतीने तिला रुग्णालयाच्या पायऱ्यांवरच सोडून पलायन केल्याचा आरोप आहे. नाशिकमधील या घटनेने पोलीस दलात खळबळ उडाली असून, तपासात छळाचे धक्कादायक आरोप समोर आले आहेत.

• फ्लॅट दीराच्या नावावर करण्यासाठी दबाव; विवाहितेने विष प्राशन केले
• विष घेतल्यानंतर स्वतः गाडी चालवत रुग्णालय गाठले; पतीचा पलायनाचा आरोप
• पतीसह सात जणांवर आत्महत्येस प्रवृत्त केल्याचा गुन्हा; पतीला अटक

नाशिक : नाशिकच्या सातपूर पोलीस ठाण्याच्या हद्दीत पोलीस पतीकडून होणाऱ्या शारीरिक आणि मानसिक छळाला कंटाळून एका विवाहितेने विष प्राशन करून आत्महत्या केल्याची धक्कादायक घटना समोर आली आहे. विष प्राशन केल्यानंतरही जीव वाचवण्यासाठी संबंधित महिलेने स्वतः गाडी चालवत रुग्णालय गाठले. मात्र, उपचाराचा खर्च करण्यास नकार देत पतीने तिला जिल्हा रुग्णालयाच्या पायऱ्यांवर गंभीर अवस्थेत सोडून पलायन केल्याचा आरोप आहे. या प्रकरणी पोलिसांनी पतीसह सात जणांविरुद्ध आत्महत्येस प्रवृत्त केल्याचा गुन्हा दाखल केला असून, पतीला अटक करण्यात आली आहे. दीपाली अनिल पवार (वय ३२, रा. क्लासिक निकेतन अपार्टमेंट, महात्मानगर) असे मृत विवाहितेचे नाव आहे. या प्रकरणी नाशिक ग्रामीण पोलीस अधीक्षक कार्यालयात वरिष्ठ लिपिक म्हणून कार्यरत असलेला तिचा पती अनिल पवार याला सातपूर पोलिसांनी अटक केली आहे. नाशिक न्यायालयाने त्याला ९ ऑक्टोबरपर्यंत पोलीस कोठडी सुनावली आहे.

हेही वाचा: आठ महिन्यांची गर्भवती… दोन गुन्ह्यांत जामीन, आता पतीनेच मागितला घटस्फोट; निदा खानसमोर नवे संकट!

फ्लॅट दीराच्या नावावर करण्यासाठी दबाव

मिळालेल्या माहितीनुसार, दीपाली यांनी स्वतःच्या कमाईतून अहिल्यानगर येथे फ्लॅट खरेदी केला होता. हा फ्लॅट दीर सुनील याच्या नावावर करण्यासाठी पती आणि सासरच्या मंडळींकडून त्यांच्यावर सातत्याने दबाव आणला जात होता. या त्रासाला कंटाळून दीपाली यांनी विष प्राशन केले. विष घेतल्यानंतर त्यांनी स्वतः गाडी चालवत रुग्णालय गाठले. मात्र, पती अनिलने उपचारासाठी लागणारे पैसे भरण्यास नकार दिला. त्यानंतर गंभीर अवस्थेतील दीपाली यांना जिल्हा रुग्णालयाच्या पायऱ्यांवर सोडून तो निघून गेल्याचा आरोप आहे.

पगाराचे एटीएम कार्ड पतीकडे

दीपाली या जातेगाव प्राथमिक आरोग्य केंद्रात परिचारिका म्हणून कार्यरत होत्या. त्यांचे पती अनिल हे यापूर्वी एसआरपीएफ, दौंड येथे कार्यरत होते. सध्या ते नाशिक ग्रामीण पोलीस अधीक्षक कार्यालयात कार्यरत आहेत. अनिलने दीपाली यांच्या पगाराचे एटीएम कार्ड स्वतःकडे ठेवून त्यांच्या खात्यातील पैसे काढून घेतल्याचा आरोप आहे. सात वर्षांच्या मुलाच्या शिक्षणासाठी दीपाली यांनी एटीएम कार्ड परत मागितल्यानंतर त्यांचा छळ वाढल्याचे फिर्यादीत नमूद करण्यात आले आहे.

चारित्र्यावर संशय घेऊन मारहाण

दीपाली यांच्या कामाच्या ठिकाणाहून फोन आल्यास अनिल त्यांच्यावर चारित्र्याचा संशय घेत होता. त्यातून त्यांच्याशी वाद घालून मारहाण केली जात असल्याचा आरोप आहे. या त्रासाला कंटाळून दीपाली यांनी यापूर्वी कौटुंबिक हिंसाचाराची तक्रारही दाखल केली होती. विष प्राशन केल्यानंतर दीपाली यांनी वडिलांना फोन करून याबाबत माहिती दिली. त्यानंतर वडिलांनी त्यांचा मुलगा भूषण याला तातडीने नाशिकला पाठवले. भूषणने दीपाली यांना खासगी रुग्णालयात दाखल केले. मात्र, उपचार सुरू असताना त्यांचा मृत्यू झाला.

पतीसह सात जणांवर गुन्हा

दीपाली यांचे वडील सयाजी गायकवाड (रा. त्र्यंबक) यांच्या फिर्यादीवरून सातपूर पोलीस ठाण्यात पती अनिल पवार, सासू सुशिला, सासरे सोन्याबापू, दीर सुनील, जाऊ सुवर्णा, ननंद रेखा धोत्रे आणि नंदोई किशोर धोत्रे (सर्व रा. घारगाव, श्रीगोंदा) अशा सात जणांविरुद्ध आत्महत्येस प्रवृत्त केल्याचा गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक राहुल नळकांडे करीत आहेत.