तरुणाईला नशेपासून दूर ठेवण्यासाठी ‘कॅम्पस कनेक्ट’; नवी मुंबई पोलिसांचा महत्त्वाकांक्षी उपक्रम
पोलीस आयुक्त मिलिंद भारंबे यांच्या संकल्पनेतून आणि मार्गदर्शनाखाली नवी मुंबईत अमली पदार्थांविरोधात पोलिसांकडून एकीकडे कठोर कारवाई, तर दुसरीकडे जनजागृती आणि पुनर्वसनावर भर दिला जात आहे. विशेषतः विद्यार्थी आणि तरुण पिढीला व्यसनाच्या विळख्यात जाण्यापासून रोखण्यासाठी ‘कॅम्पस कनेक्ट’ हा महत्त्वाचा उपक्रम ठरत आहे.
‘कॅम्पस कनेक्ट’च्या माध्यमातून पोलीस अधिकारी शाळा-महाविद्यालयांमध्ये थेट विद्यार्थ्यांशी संवाद साधत आहेत. अमली पदार्थांचे दुष्परिणाम, व्यसनाचे आरोग्य आणि सामाजिक परिणाम तसेच त्यापासून दूर राहण्याचे मार्ग याबाबत विद्यार्थ्यांमध्ये जनजागृती केली जात आहे. प्रत्येक शाळा व महाविद्यालयात ‘अँटी-नार्कोटिक्स कमिटी’ स्थापन करण्यावरही भर देण्यात आला असून, शहरातील सुमारे २५० महाविद्यालयांनी या अभियानाला प्रतिसाद दिला आहे.
नवी मुंबई पोलिसांकडून अमली पदार्थांची विक्री, तस्करी आणि वितरण करणाऱ्यांविरोधात सातत्याने कठोर कारवाया करण्यात येत आहेत. मात्र, केवळ कारवाई न करता व्यसनाच्या आहारी गेलेल्या तरुणांना पुन्हा समाजाच्या मुख्य प्रवाहात आणण्यासाठी पुनर्वसनावरही विशेष लक्ष केंद्रित करण्यात आले आहे. नशामुक्त झालेल्या व्यक्तींना इतर तरुणांना व्यसनमुक्तीचा संदेश देण्यासाठी सहभागी करून घेण्याचे प्रयत्नही केले जात आहेत.
नवी मुंबई पोलीस आयुक्तालय आणि नवी मुंबई महानगरपालिकेच्या संयुक्त विद्यमाने व्यसनमुक्ती व पुनर्वसन केंद्र सुरू करण्यात येणार आहे. या केंद्रात वैद्यकीय उपचार, मानसोपचार, समुपदेशन तसेच निवासी सुविधा उपलब्ध करून देण्यात येणार असून, १० खाटांची व्यवस्था करण्यात आली आहे. त्यामुळे व्यसनमुक्तीसाठी आवश्यक असलेली वैद्यकीय आणि मानसिक मदत एकाच ठिकाणी उपलब्ध होणार आहे.
नवी मुंबई, पनवेल महानगरपालिका आणि तळोजा एमआयडीसी परिसरातील सीसीटीव्ही कॅमेऱ्यांचे फीड एकाच ठिकाणी उपलब्ध करून देणाऱ्या ‘इंटिग्रेटेड कमांड अँड कंट्रोल सेंटर’चेही उद्घाटन करण्यात येणार आहे. या माध्यमातून शहरातील संशयास्पद हालचालींवर अधिक प्रभावीपणे लक्ष ठेवणे, गुन्ह्यांचा तपास आणि प्रतिबंधात्मक कारवाई अधिक वेगाने करणे शक्य होणार आहे. अमली पदार्थांच्या तस्करीवर पाळत ठेवण्यासाठीही या यंत्रणेचा उपयोग होणार आहे.
नवी मुंबई आंतरराष्ट्रीय विमानतळाच्या पार्श्वभूमीवर महत्त्वपूर्ण ठरणारे विमानतळ पोलीस ठाणेही या कार्यक्रमांतर्गत सुरू करण्यात येणार आहे. सिडको आणि अदानी समूहाच्या सहकार्याने सुसज्ज इमारतीत हे पोलीस ठाणे उभारण्यात आले आहे. येथे एक वरिष्ठ पोलीस निरीक्षक, सहा सहायक पोलीस निरीक्षक/पोलीस उपनिरीक्षक आणि ४० पोलीस अंमलदार तैनात असणार आहेत.
शनिवारी सकाळी ११ वाजता नवी मुंबई पोलीस आयुक्तालयात एकात्मिक कमांड अँड कंट्रोल सेंटरचे उद्घाटन करण्यात येईल. त्याचवेळी नवी मुंबई विमानतळ पोलीस ठाण्याचे ऑनलाइन उद्घाटन होणार आहे.
यानंतर सकाळी ११.३० वाजता नेरुळ येथील डी. वाय. पाटील विद्यापीठाच्या सेंटर ऑफ एक्सलन्स येथे मुख्य कार्यक्रम पार पडेल. मुख्य कार्यक्रमापूर्वी सकाळी १०.३० वाजल्यापासून विद्यार्थ्यांकडून पथनाट्य, नृत्य आणि विविध सांस्कृतिक कार्यक्रमांच्या माध्यमातून नशाविरोधी जनजागृती करण्यात येणार आहे.
या वेळी नशाविरोधी जनजागृतीपर चित्रफितीचे प्रकाशन, ‘रील व पोस्टर’ स्पर्धेतील विजेत्यांचा गौरव तसेच तीन प्राचार्यांना मुख्यमंत्र्यांच्या पत्रांचे वितरण करण्यात येणार आहे. उपस्थितांना व्यसनमुक्तीची शपथही देण्यात येणार आहे.
नवी मुंबई पोलिसांनी जानेवारी २०२५ पासून ‘नशामुक्ती नवी मुंबई’ अभियान सुरू केले आहे. नागरिकांना अमली पदार्थांबाबत माहिती देण्यासाठी किंवा मदतीसाठी ८८२८ ११२ ११२ ही हेल्पलाइन उपलब्ध करून देण्यात आली आहे. प्रत्येक पोलीस ठाण्यात स्वतंत्र ‘अँटी नार्कोटिक्स सेल’ स्थापन करणारे नवी मुंबई पोलीस आयुक्तालय राज्यातील पहिले आयुक्तालय ठरले आहे. या निर्णयाची दखल घेत पुढे शासनाने राज्यभर अशा प्रकारची यंत्रणा राबविण्याचा निर्णय घेतला.
अमली पदार्थांविरोधातील कठोर पोलिसी कारवाईसोबतच विद्यार्थी, पालक, शिक्षक, सामाजिक संस्था आणि नागरिकांना या अभियानाशी जोडण्याचा प्रयत्न होत असल्याने ‘नशामुक्ती नवी मुंबई’ अभियानाला व्यापक सामाजिक चळवळीचे स्वरूप प्राप्त होत आहे.
चाकूने भोसकून सराईत गुंडाची हत्या; प्रेयसीला दुसऱ्या तरुणासोबत पाहून झाला वाद अन्…
.png "Videos"){kind=small}
