सौजन्य फोटो: सोशल मिडीया
डॉक्टरांनी मुलीला भेटण्यास मज्जाव केला होता. त्याला कारणही तितकेच गंभीर होते. आठ वर्षांच्या या चिमुकलीला दसऱ्याच्या दिवशी कुत्र्याने चावा घेतला होता आणि तिला रेबीजची लागण झाली होती. या रोगाच्या संसर्गाची भीती असल्याने डॉक्टरांनी मुलीस भेटण्यावर निर्बंध लावले होते. त्यामुळे पोटच्या गोळ्याला जवळ घेण्याचीही हतबलता आई-वडिलांच्या वाट्याला आली. केवळ दुरूनच आपल्या लाडक्या लेकीचा मृत्यूशी सुरू असलेला जीवघेणा संघर्ष पाहण्याची दुर्दैवी वेळ बोरिवडे येथील संतोष आणि सुरेखा चौगुले या दाम्पत्यावर आली. अखेर शनिवारी (२१ नोव्हेंबर) पहाटे आठ वर्षांच्या चिमुकल्या रेवतीची मृत्यूशी सुरू असलेली ही झुंज अपयशी ठरली आणि तिने अखेरचा श्वास घेतला.
बोरिवडे येथील रेवती संतोष चौगुले ही जवाहर विद्यामंदिर शाळेत इयत्ता दुसरीत शिकत होती. घरची परिस्थिती अत्यंत बेताची असल्याने वडील संतोष सेंट्रिंगच्या कामाला जातात, तर आई सुरेखा मोलमजुरी करून संसार चालवतात. स्वभावाने अत्यंत हसतमुख आणि मनमिळाऊ असल्याने शाळेत आणि गल्लीत रेवतीचे अनेक मित्र-मैत्रिणी होते.
मात्र, २० ऑक्टोबर रोजी विजयादशमीच्या दिवशी नियतीने मोठा घाला घातला. रेवती आनंदाने शेजाऱ्यापाजाऱ्यांना ‘सोनं’ (आपट्याची पानं) वाटत असताना अचानक एका पिसाळलेल्या कुत्र्याने तिच्यावर हल्ला केला. त्यावेळी घाबरलेली रेवती पळताना गटारीत पडली आणि तिच्या डोक्याला गंभीर दुखापत झाली. त्यावेळी तातडीने खासगी रुग्णालयात उपचार घेतल्यानंतर ती बरी झाली आणि पुन्हा नेहमीसारखी हसत-खेळत राहू लागली.
मात्र, महिनाभरानंतर या कुटुंबाच्या आनंदाला दृष्ट लागली. १९ नोव्हेंबरपासून रेवतीला अचानक चक्कर येणे, डोळे पांढरे होणे आणि पाण्याची भीती वाटणे अशी रेबीजसदृश लक्षणे दिसू लागली. त्यामुळे २० नोव्हेंबर रोजी नातेवाईकांनी तिला कोल्हापूरच्या सीपीआर रुग्णालयात दाखल केले. रेबीजच्या तीव्र लक्षणांमुळे डॉक्टरांनी तिला विलगीकरण कक्षात ठेवून उपचार सुरू केले. संसर्गाचा धोका असल्याने नातेवाईकांना जवळ जाण्यास मनाई करण्यात आली होती.
विलगीकरण कक्षात वेदनेने तडफडणारी रेवती आपल्या आई-वडिलांना पाहून ‘मला जेवायला द्या, पाणी द्या, मला घरी न्या’ अशा आर्त हाका मारत होती. लेकीच्या या यातना पाहून हतबल आई-वडील ढसाढसा रडत होते, पण ते काहीच करू शकत नव्हते. अखेर शनिवारी पहाटे रेवतीची प्राणज्योत मालवली. या घटनेमुळे बोरिवडे गावासह संपूर्ण परिसरात तीव्र हळहळ व्यक्त होत आहे.
Ans: ही घटना कोल्हापूर जिल्ह्याच्या पन्हाळा तालुक्यातील बोरिवडे येथे घडली असून, आठ वर्षांच्या रेवती संतोष चौगुले हिचा दुर्दैवी मृत्यू झाला आहे.
Ans: २० ऑक्टोबर रोजी दसऱ्याला शेजाऱ्यांना आपट्याची पाने वाटताना पिसाळलेल्या कुत्र्याने चावा घेतल्यानंतर तिला रेबीजची लागण झाली होती आणि उपचारादरम्यान तिचा मृत्यू झाला.
Ans: रेबीजच्या तीव्र लक्षणांमुळे आणि रोगाचा संसर्ग होण्याचा धोका असल्याने डॉक्टरांनी तिला विलगीकरण कक्षात ठेवले होते व जवळ जाण्यास मनाई केली होती.






