पिस्तूल विक्रीसाठी आलेल्या टोळीला ठोकल्या बेड्या; 4 पिस्तुले अन् 7 जिवंत काडतुसे जप्त

अवैध पिस्तुलांची विक्री करण्यासाठी आलेल्या तिघांना पिंपरी-चिंचवड गुन्हे शाखेच्या मालमत्ता गुन्हे विरोधी पथकाने सापळा रचून अटक केली आहे.

पिंपरी : अवैध पिस्तुलांची विक्री करण्यासाठी आलेल्या तिघांना पिंपरी-चिंचवड गुन्हे शाखेच्या मालमत्ता गुन्हे विरोधी पथकाने सापळा रचून अटक केली आहे. संशयितांकडून चार देशी बनावटीची पिस्तुले, सात जिवंत काडतुसे, तीन मोबाईल फोन आणि एक कार असा सुमारे १० लाख ९२ हजार रुपयांचा मुद्देमाल जप्त करण्यात आला आहे. ही कारवाई सोमाटणे फाटा परिसरात करण्यात आली आहे.

 

सरदार अकबर सय्यद (वय २७, रा. तळेगाव दाभाडे), विशाल नाना कुडेकर (३५, रा. खेड), प्रशांत बबुशा सोनवणे (२८, सध्या रा. चेंबूर, मुंबई) अशी अटक केलेल्यांची नावे आहेत. पाेलिस उपायुक्त डाॅ. शिवाजी पवार यांनी दिलेल्या माहितीनुसार, अवैध पिस्तूल बाळगणाऱ्या व त्यांची तस्करी करणाऱ्या संशयितांवर कारवाईचे आदेश पोलिस आयुक्त विनय कुमार चौबे यांनी दिले होते. त्यानुसार मालमत्ता गुन्हे विरोधी पथकाने ही कारवाई केली आहे.

पथकाला माहिती मिळाली की, संशयित हे सोमाटणे फाटा परिसरात पिस्तूल विक्रीसाठी येणार आहेत. त्यानुसार १० मार्च रोजी पोलिसांनी सापळा रचला. निर्जन ठिकाणी असलेल्या कारमधून तिघांना ताब्यात घेतले. त्यांच्याकडे तीन देशी बनावटीची पिस्तुले व सहा जिवंत काडतुसे आढळून आली. पुढील तपासात संशयित प्रशांत सोनवणे याच्याकडून आणखी एक पिस्तूल आणि एक जिवंत काडतूस जप्त करण्यात आले. या प्रकरणी तळेगाव दाभाडे पोलिस ठाण्यात गुन्हा दाखल करण्यात आला आहे.

सहायक पोलिस आयुक्त डॉ. विशाल हिरे यांच्या मार्गदर्शनाखाली मालमत्ता गुन्हे विरोधी पथकाचे वरिष्ठ पोलिस निरीक्षक संजय चव्हाण, सहायक निरीक्षक गोरक्षनाथ बालवडकर, पांडुरंग देवकाते, रावसाहेब मोटे, श्रेणी उपनिरीक्षक महेश खांडे, पोलिस अंमलदार गणेश सावंत, विनोद वीर, हर्षद कदम, गणेश कोकणे, गणेश हिंगे, नितीन लोखंडे, प्रवीण कांबळे, विशाल गायकवाड, समीर रासकर, मोहसीन आत्तार, अमोल गोरे, ज्ञानेश्वर कौलगे, अमर कदम, चंद्रकांत गडदे, औदुंबर रौंगे यांच्या पथकाने ही कामगिरी केली आहे.

हे सुद्धा वाचा : फॉर्च्यूनर गाडीमधून गांजाची तस्करी! पुणे पोलिसांनी आरोपीला सापळा रचून पकडले

अपहरण, खंडणीचेही गुन्हे दाखल

सरदार सय्यद याने ही पिस्तुले मध्यप्रदेशातील उमरटी येथील गुरुसिंग नावाच्या व्यक्तीकडून आणल्याची माहिती तपासादरम्यान समोर आली आहे. सरदार सय्यद याच्याविरुद्ध चाकण पोलिस ठाण्यात अपहरण व खंडणीसंबंधी गंभीर गुन्हे दाखल आहेत.