Crime News: गाडीची तोडफोड नाही, तरी ५० लाख गायब; पोलिसांनी आठ तासांत उलगडला चोरीचा धक्कादायक कट

मुंबईहून आणलेली तब्बल ५० लाख रुपयांची रोकड पुण्यात कारमध्ये ठेवण्यात आली. काही वेळातच रोकड गायब झाली; मात्र कारची कोणतीही तोडफोड झालेली नव्हती. पोलिसांनी तपासाची चक्रे वेगाने फिरवत अवघ्या आठ तासांत चोरीचा पर्दाफाश केला. धक्कादायक म्हणजे फिर्यादीसोबत मुंबईला गेलेल्या व्यक्तीनेच साथीदाराच्या मदतीने हा कट रचला होता.

• मुंबईहून आणलेली ५० लाखांची रोकड कारमधून चोरीला
• बनावट चावीने कार उघडून रोकड लंपास
• फिर्यादीसोबत मुंबईला गेलेल्याचाच चोरीत सहभाग

पिंपरी-चिंचवड : एखाद्या व्यक्तीवर आंधळा विश्वास ठेवणे कधी कधी चांगलेच महागात पडू शकते. समोरची व्यक्ती आपली आणि विश्वासू वाटत असली, तरी तिच्या मनात काय कट शिजतोय, याची कल्पना नसते. असाच धक्कादायक प्रकार पिंपरी-चिंचवडमध्ये समोर आला आहे. मुंबईहून आणलेली तब्बल ५० लाख रुपयांची रोकड पुनावळे येथे कारमध्ये ठेवण्यात आली होती. काही वेळातच ही रोकड कारमधून गायब झाली. विशेष म्हणजे कारची कोणतीही तोडफोड झालेली नव्हती. पोलिसांनी तपासाची चक्रे वेगाने फिरवत अवघ्या आठ तासांत या चोरीचा छडा लावला.

बनावट चावीने कार उघडून रोकड लंपास

एका व्यक्तीने मुंबईहून ५० लाख रुपयांची रोकड आणली होती. पुण्यात आल्यानंतर त्याने पुनावळे येथे आपली कार उभी केली. याच संधीचा फायदा घेत चोरट्यांनी कारमधील रोकड लंपास केली. मात्र, कारची कोणतीही तोडफोड झालेली नसल्याने पोलिसांना सुरुवातीपासूनच चोरीबाबत संशय होता. तपासात बनावट चावीच्या साहाय्याने कार उघडून रोकड चोरण्यात आल्याचे समोर आले. त्यामुळे ही अचानक झालेली चोरी नसून रोकड आणली जात असल्याची माहिती असलेल्या व्यक्तीने पाळत ठेवून हा डाव आखल्याचा संशय बळावला.

हेही वाचा: Crime News: रेस्टॉरंट व्यावसायिक शिवा शर्मा मृत्यू प्रकरण; फरार मॉडेल श्रद्धा दुबेच्या फ्लॅटमध्ये आढळले संशयास्पद साहित्य

फिर्यादीसोबत मुंबईला गेलेल्याचाच सहभाग

तपास पुढे जात असताना पोलिसांना धक्कादायक माहिती मिळाली. ही चोरी बाहेरील व्यक्तीने नव्हे, तर फिर्यादीसोबत मुंबईला ५० लाखांची रोकड आणण्यासाठी गेलेल्या व्यक्तीनेच केल्याचे निष्पन्न झाले. त्याने आपल्या एका साथीदाराच्या मदतीने चोरीचा कट रचला होता.  पिंपरी-चिंचवड गुन्हे शाखेचे युनिट दोन, मालमत्ता विरोधी पथक आणि रावेत पोलिसांनी संयुक्तपणे तपास सुरू केला. पोलिसांनी अवघ्या आठ तासांत दोन्ही संशयितांना अटक केली. त्यांच्याकडून चोरीला गेलेली संपूर्ण ५० लाख रुपयांची रोकड हस्तगत करण्यात आली आहे. मोठी रक्कम कारमध्ये असल्याची माहिती असलेल्या व्यक्तीनेच साथीदाराच्या मदतीने चोरी केल्याने या प्रकरणाला वेगळेच वळण मिळाले आहे. या प्रकरणाचा पुढील तपास पोलिसांकडून सुरू आहे.