संग्रहित फोटो
इचलकरंजी : गेल्या काही महिन्यापासून इचलकरंजीत जुगार मोठ्या प्रमाणात खेळला जात आहे. जुगार अड्डे उद्ध्वस्त करण्यासाठी पोलिसांंकडूनही प्रयत्न केले जात आहेत. अशातच आता शिवाजीनगर पोलिसांनी मोठी कारवाई केली आहे. शिवाजीनगर पोलिसांनी भोनेमाळ आणि शेळके मळा जॅकवेल रोड याठिकाणच्या जुगार अड्ड्यावर छापे मारले आहेत. या कारवाईत ६ दुचाकी, ९ मोबाईल व जुगाराचे साहित्य असा ३ लाख २२ हजार ६८० रुपयांचा मुद्देमाल जप्त केला. तर १३ जणांना ताब्यात घेतले आहे.
पोलिसांकडून मिळालेल्या माहितीनुसार, भोनेमाळ परिसरातील खंडेलवाल इ‌मारतीच्या पहिल्या मजल्यावर तीनपानी जुगार सुरु असल्याची माहिती मिळाल्यावरुन शिवाजीनगर पोलिसांनी त्याठिकाणी छापा मारला. त्यावेळी तौसिफ रशिद मुल्ला (वय ३६ रा. गोकुळ चेंकि), अतुल चंद्रकांत पेटकर (वय २९), संकेत उमेश म्हात्रे (वय २९ दोघे रा. भोनेमाळ), केतन किरण घोरपडे (वय ३० रा. पाटील मळा) व वरुण जगदीश जगवाणी (वय २६ रा. यशवंत कॉलनी) हे पाचजण तीनपानी जुगार खेळताना मिळून आले. त्याचबरोबर जुगार अड्डा चालविणारा प्रकाश रविंद्र हुंडेकरी आणि इमारत मालक खंडेलवाल यांच्यावर गुन्हा दाखल करण्यात आला आहे. या कारवाईत ४ मोबाईल, रोकड, डिव्हीआर, जुगाराचे साहित्य असा १ लाख ७२ हजार ३८० रुपयांचा मुद्देमाल जप्त करण्यात आला आहे. या प्रकरणी पोलिस कॉन्स्टेबल सद्दाम गजबर सनदी यांनी फिर्याद दिली आहे.
तर शेळके मळा जॅकवेल रोड परिसरातील एका खोलीत सुरु असलेल्या जुगार अड्ड्यावर पोलिसांनी छापा मारला असता तेथे अड्डाचालक विश्वनाथ विलास लवटे (वय ४१ रा. लिगाडे मळा), अक्षय पाटील (रा. चंदर), कबीर खुदबुद्दीन मोमीन (रा.भीनेमाळ), शरद किशोर पाटील (रा. कबनूर) व संतोष हात्रे (रा. कोरोची) हे जुगार खेळाताना मिळून आले. कारवाईत ५ मोबाईल, ६ दुचाकी, रोख रक्कम व जुगाराचे साहित्य असा १ लाख ५० हजार ३०० रुपयांचा मुद्देमाल जप्त करण्यात आला आहे. या प्रकरणी पोलिस कॉन्स्टेबल पवन दिलीप गुरव यांनी फिर्याद दिली आहे.
