Pune Crime: ‘माझ्या पत्नीशी का बोलतोस?’; १७ वर्षीय मुलाला पळवले, बर्निंग घाटात मारहाण अन्...
पुणे : ‘माझ्या पत्नीशी का बोलतोस?’ असा संशय घेत १७ वर्षीय मुलाला पळवून नेऊन मारहाण केल्याची धक्कादायक घटना पुण्यात समोर आली आहे. बंडगार्डन बंधाऱ्याजवळील बर्निंग घाट परिसरात मुलाला मारहाण केल्यानंतर त्याचा पाठलाग करण्यात आल्याचा आरोप आहे. या घटनेनंतर दोन दिवसांनी चंदननगर परिसरातील नदीपात्रात त्याचा मृतदेह आढळून आल्याने खळबळ उडाली आहे. मुलगा पळताना नदीत पडला की त्याच्यासोबत घातपात झाला, याचा तपास बंडगार्डन पोलीस करत आहेत.
२६ सप्टेंबरच्या रात्री १७ वर्षीय मुलगा अचानक घरातून बेपत्ता झाला. अज्ञात व्यक्तीने आमिष दाखवून मुलाला पळवून नेल्याची तक्रार त्याच्या आईने बंडगार्डन पोलीस ठाण्यात दिली. त्यानंतर पोलीस आणि नातेवाईकांकडून त्याचा शोध सुरू होता. मात्र, २९ सप्टेंबर रोजी सकाळी साडेआठच्या सुमारास चंदननगर परिसरातील नदीपात्रात मुलाचा मृतदेह आढळला.
पोलिसांच्या तपासानुसार, मुख्य संशयित आकाश रेड्डी याला १७ वर्षीय मुलगा त्याची पत्नी स्वाती रेड्डी हिच्याशी बोलत असल्याचा संशय होता. याच कारणातून आकाश आणि त्याच्या साथीदारांनी मुलाला दुचाकीवरून बंडगार्डन बंधाऱ्याजवळील बर्निंग घाट परिसरात नेल्याचा आरोप आहे. तेथे आकाशने मुलाला मारहाण करून धमकावल्याचे तपासात समोर आले आहे. घाबरलेला मुलगा जीव वाचवण्यासाठी तेथून पळू लागला. मात्र, आरोपींनी त्याचा पाठलाग केल्याचा आरोप आहे.
पाठलागादरम्यान मुलगा नदीपात्रात पडला की त्याला ढकलण्यात आले, याबाबत अद्याप स्पष्टता झालेली नाही. त्यामुळे त्याचा मृत्यू नेमका कशामुळे झाला, याचा तपास पोलिसांकडून सुरू आहे. मुलाच्या आईच्या तक्रारीवरून बंडगार्डन पोलिसांनी पती-पत्नीसह सहा जणांविरुद्ध आत्महत्येस प्रवृत्त केल्याप्रकरणी गुन्हा दाखल केला आहे.
या प्रकरणात आकाश रेड्डी, स्वाती रेड्डी, गौरव शिंदे आणि आशिष चाबुकस्वार यांना अटक करण्यात आली आहे. आनंद रेड्डी आणि सूरज उर्फ चन्या मोरे यांच्याविरुद्धही गुन्हा दाखल करण्यात आला आहे. मुलाच्या मृत्यूचे नेमके कारण आणि तो नदीपात्रात कसा पोहोचला, याचा तपास बंडगार्डन पोलीस करत आहेत.
.png "Videos"){kind=small}
