प्रतिस्पर्धी टोळीतील तरुणांशी मैत्री ठेवली म्हणून पिस्तूल रोखले; १९ वर्षीय तरुणाला बांबूने बेदम मारहाण
पुणे : प्रतिस्पर्धी टोळीतील तरुणांशी मैत्री ठेवल्याच्या कारणावरून १९ वर्षीय तरुणाच्या डोक्यावर पिस्तूल रोखून त्याला बांबूने बेदम मारहाण केल्याची धक्कादायक घटना गुलटेकडीतील मीनाताई ठाकरे वसाहतीत घडली. २७ सप्टेंबर रोजी रात्री पावणेनऊच्या सुमारास घडलेल्या या प्रकारामुळे परिसरात भीतीचे वातावरण निर्माण झाले आहे. याप्रकरणी स्वारगेट पोलिसांनी चौघांविरोधात गंभीर स्वरूपाचा गुन्हा दाखल केला असून, आरोपींचा शोध सुरू आहे.
‘त्या’ मुलांसोबत का फिरतोस? म्हणत जाब विचारला
पोलिसांनी दिलेल्या माहितीनुसार, सनी खंडू म्हात्रे (१९, रा. मीनाताई ठाकरे वसाहत, गुलटेकडी) हा २७ सप्टेंबर रोजी रात्री वसाहतीजवळ थांबला होता. त्यावेळी आरोपी तेथे आले. त्यांनी सनीला प्रतिस्पर्धी गटातील तरुणांसोबत का फिरतोस, असा जाब विचारत त्याच्याशी वाद घातला. वाद वाढल्यानंतर आरोपींपैकी एकाने सनीला धमकावत थेट पिस्तूल बाहेर काढून त्याच्या डोक्यावर रोखले. त्यानंतर इतर आरोपींनी बांबूने सनीला मारहाण करण्यास सुरुवात केली. या हल्ल्यात तो जखमी झाला. आरोपींनी त्याला जीवे मारण्याची धमकीही दिली आणि त्यानंतर ते घटनास्थळावरून पसार झाले.
गोळीबार झाल्याची परिसरात चर्चा
दरम्यान, या घटनेच्या वेळी आरोपींनी पिस्तूलातून गोळीबार केल्याची चर्चा परिसरात पसरली आहे. स्थानिकांच्या माहितीनुसार, गोळी झाडण्यात आली; मात्र ती सनीला लागली नाही आणि तो थोडक्यात बचावला. त्यामुळे घटनेनंतर परिसरात अधिकच खळबळ उडाली. मात्र, स्वारगेट पोलिसांनी दाखल केलेल्या अधिकृत तक्रारीत गोळीबाराचा उल्लेख नसल्याचे समोर आले आहे. त्यामुळे प्रत्यक्ष गोळीबार झाला होता का, याबाबत पोलिसांकडून तपास केला जात आहे. सध्या पोलिसांकडून पसार झालेल्या चौघांचा शोध सुरू असून, घटनेमागील कारण आणि आरोपींच्या भूमिकेबाबत पुढील तपास सुरू आहे.
.png "Videos"){kind=small}
