महिलेचे दागिने चोरणाऱ्याला दिल्लीतून ठोकल्या बेड्या; चौकशीतून आरोपीबाबत धक्कादायक माहिती समोर
पुणे : राज्याजह देभरात चोरट्यांनी धुमाकूळ घातला असून, चोरटे वेगवेगळ्या भागात नागरिकांच्या लाखो रुपयांवर डल्ला मारत आहेत. अशातच आता पुण्यातून एक चोरीसंदर्भात बातमी समोर आली आहे. रेल्वे प्रवासी महिलेला मदतीचा बहाणा करून तिच्या बॅगेतील सोन्याच्या बांगड्या, अंगठी चोरून पसार झालेल्या चोरट्याला पुणे लोहमार्ग पोलिसांनी दिल्लीतून अटक केली आहे. चोरट्याचे पुणे आणि मिरज रेल्वे स्थानकात प्रवाशांकडील ऐवज चोरीचे दोन गुन्हे उघडकीस आले आहेत. त्याच्याकडून ११० ग्रॅम सोन्याचे दागिने जप्त करण्यात आले आहेत.
रमेश उर्फ मोटा पिता फूलचंद (रा. न्यू अनाज मंडी, नजफगड, दिल्ली) असे अटक केलेल्या चोरट्याचे नाव आहे. याबाबत एका महिलेने पुणे लोहमार्ग पोलिस ठाण्यात तक्रार दिली आहे. पोलीस अधीक्षक अश्विनी सानप, अतिरिक्त अधीक्षक रोहिदास पवार यांच्या मार्गदर्शनाखाली पोलीस निरीक्षक इरफान शेख, सहायक निरीक्षक प्रभाकर कापुरे, उपनिरीक्षक सुनील माने यांच्या पथकाने ही कारवाई केली आहे.
तक्रारदार महिला बडोदा-पुणे या मार्गावर रेल्वेने प्रवास करत होत्या. पुणे रेल्वे स्थानकाजवळ गाडी आल्याने महिला खडकी जवळ येऊन थांबली होती. तिच्याकडे बॅग होती. तेव्हा चोरटा रमेश आधीच डब्यात होता. त्याने प्रवासी महिलेला दरवाज्यापर्यत बॅग ठेवतो, असे सांगितले. महिलेला मदतीचा बहाणा केला. मात्र, त्याने बॅगेतून ५२ ग्रॅम वजनाच्या सोन्याच्या बांगड्या, तसेच एक ग्रॅम वजनाची लहान मुलांची अंगठी असा ऐवज लांबविला. बॅगेतून ऐवज चोरीला गेल्याचे उघडकीस आल्यानंतर महिलेने पोलिसांकडे तक्रार दिली. पुणे लोहमार्ग पोलिसांच्या स्थानिक गुन्हे अन्वेषण शाखेला दिल्या.
पोलिसांच्या पथकाने तपास सुरू केला. तेव्हा रमेश आणि त्याच्याबरोबर असलेल्या चार साथीदारांनी बॅगेतून ऐवज चोरल्याचे उघडकीस आले. रमेश दिल्लीत असल्याची माहिती तांत्रिक तपासात मिळाली. त्यानंतर लोहमार्ग पोलिसांचे पथक दिल्लीला रवाना झाले. दिल्ली पोलिसांच्या मदतीने आरोपी रमेशला पकडले. चौकशीत त्याने मिरज रेल्वे स्थानकात प्रवासी महिलेला मदत करण्याचा बहाणा करुन ५७ ग्रॅम सोन्याचे दागिने लांबविल्याचे उघडकीस आले. पोलिसांनी त्याच्याकडून ११० ग्रॅम सोन्याचे दागिने जप्त केले.
.png "Videos"){kind=small}
