‘स्मार्ट’ चोरट्याला पोलिसांनी ठोकल्या बेड्या; तपासातून धक्कादायक प्रकार उघड

पुण्यासारख्या शहरात चोरटे देखील 'स्मार्ट' झाल्याचे दिसत असून, एका चोरट्यांने महागड्या गाड्यांची चोरी करून त्या विकल्याची माहिती समोर आली आहे.

पुणे : पुण्यासारख्या शहरात चोरटे देखील ‘स्मार्ट’ झाल्याचे दिसत असून, एका चोरट्यांने महागड्या गाड्यांची चोरी करून त्या गाड्या विकण्यासाठी एक नवीन फंडा शोधून काढला. दुचाकी चोरुन त्याने फेसबूकवरील ‘मार्केट प्लेस’ या ‘ऑनलाईन पद्धतीने या दुचाकींच्या विक्रीची जाहिरात देऊन विक्री केल्याचे समोर आले आहे. त्याच्या या करामतीने पोलिसही हैराण झाले होते.

महादेव शिवाजी गरड (वय २६, रा. मांजरी बुद्रुक) असे अटक करण्यात आलेल्या या स्मार्ट चोरट्याचे नाव आहे. ही कारवाई पोलिस उपायुक्त निखील पिंगळे यांच्या मार्गदर्शनाखाली वरिष्ठ निरीक्षक संजय पतंगे व त्यांच्या पथकाने केली आहे.

पुणे शहरात वाहन चोरीची प्रचंड संख्या वाढली आहे. या पार्श्वभूमीवर गुन्हे शाखेकडून वाहन चोरणाऱ्या सराईतांवर लक्ष केंद्रीत करण्यात आले आहे. यादरम्यान, युनिट पाचच्या पथकाने गुप्त माहितीवरून महादेव गरड याला पकडले. त्याची चौकशी केल्यानंतर त्याच्याकडून दोन चोरीच्या दुचाकी जप्त करण्यात आल्या. त्याच्यावर संशय बळावल्याने त्याच्याकडे सखोल तपास केला. तेव्हा त्याने वेगवेग‌ळ्या भागातून तब्बल आणखी १२ दुचाकी चोरल्याचे समोर आले. त्याबाबत माहिती घेतल्यानंतर त्याने या दुचाकी ऑनलाईन विक्री देखील केल्याची माहिती समोर आली. पोलिसांनी त्या दुचाकी जप्त केल्या आहेत.

या पोलिस ठाण्यातील गुन्हे उघड

हडपसर पोलिस ठाण्याच्या हद्दीतील ६, काळेपडळ पोलिस ठाण्याकडील ३, चिखली पोलिस ठाण्याकडील २ तसेच सांगवी पोलिस ठाण्याकडील ३ असे १४ गुन्हे उघडकीस आले असून, त्याच्याकडून ८ लाख ४० हजार रुपयांच्या १४ दुचाकी जप्त करण्यात आल्या आहेत.

हे सुद्धा वाचा : रोहित पवारांना मोठा धक्का! ED कडून पुरवणी आरोपपत्र दाखल, नेमकं प्रकरण काय?

फेसबूकवरून दुचाकींची विक्री

फेसबुकवरील मार्केट प्लेस या अॅपच्या माध्यमातून त्याने चोरलेल्या दुचाकींची विक्री जाहिरात टाकून त्या विक्री केल्याचे समोर आले आहे. त्याने विक्री करताना ग्राहकांना या दुचाकी हप्ते तटल्याने फायनान्स कंपनीने जप्त केलेल्या आहेत. यामुळे त्या विक्री करत असल्याचे सांगितले होते. त्यामुळे अनेकांनी त्याच्याकडून या दुचाकी घेतल्याचे सांगण्यात आले.

पुण्यात भरदिवसा घरफोड्या

घरफोड्या करणाऱ्या चोरट्यांनी कोंढवा आणि आंबेगाव पठार भागात भरदिवसा ३ फ्लॅट फोडून सुमारे ३ लाख ५६ हजार रुपयांचा ऐवज लंपास केल्याची घटना घडली. चोरट्यांनी बंद घरांची टेहळणी करून ही चोरी केल्याचा संशय आहे. दुपारी झालेल्या या घरफोड्यांमुळे पोलिसांची गस्त आणि प्रतिबंधात्मक यंत्रणेवर प्रश्नचिन्ह निर्माण झाला आहे. याप्रकरणी कोंढवा आणि भारती विद्यापीठ पोलिस ठाण्यात स्वतंत्र गुन्हे दाखल करण्यात आले असून, आरोपींचा तपास सुरू आहे.