Couple Murder News: जुना वाद ठरला जीवघेणा! वृद्ध दाम्पत्याच्या हत्येनंतर पळून जाणाऱ्या आरोपीला नसरापूर पुलावर बेड्या

Couple Murder News: पुणे जिल्ह्यातील पुरंदर तालुक्यातील पानवडी येथे झालेल्या वृद्ध दाम्पत्याच्या निर्घृण हत्याप्रकरणी खळबळजनक बातमी समोर आली आहे! हत्येनंतर पसार झालेल्या संशयित आरोपीचा येरवड्यापासून पाठलाग करत सासवड व राजगड पोलिसांनी नसरापूर-चेलाडी पुलावर सापळा रचून त्याला जेरबंद केले आहे.

• पानवडी येथे मोहन व रत्नमाला धिवार यांची हत्या
• पोलिसांच्या पाठलागानंतर नसरापूर पुलावर संशयित गणेश धिवार ताब्यात
• जुन्या वादातून हत्या झाल्याचा संशय

Couple Murder News: पुणे जिल्ह्याच्या पुरंदर तालुक्यातील पानवडी येथे काही दिवसांपूर्वी एका वृद्ध दाम्पत्याची धारदार शस्त्राने वार करून अत्यंत निर्घृणपणे हत्या करण्यात आली होती. या गंभीर प्रकरणातील संशयित आरोपीला अखेर सासवड आणि राजगड पोलिसांनी संयुक्त कारवाई करत जेरबंद केले आहे. पुणे–सातारा महामार्गावरील नसरापूर–चेलाडी पुलावर सापळा रचून ही धडक कारवाई करण्यात आली. संशयित पुणे शहरातून साताऱ्याच्या दिशेने पळून जात असताना पोलिसांनी येरवड्यापासून त्याचा फिल्मी स्टाइलने माग काढला होता.

काय होती घटना? पानवडीत दुहेरी हत्याकांड

पानवडी येथे २५ ऑक्टोबर २०२६ रोजी मोहन बाबुराव धिवार (वय ८२-८३) आणि त्यांच्या पत्नी रत्नमाला मोहन धिवार (वय ७२) या वृद्ध दाम्पत्यावर धारदार शस्त्राने वार करण्यात आले होते, ज्यामध्ये त्यांचा मृत्यू झाला. या दुहेरी हत्याकांडांमुळे संपूर्ण परिसरात मोठी खळबळ उडाली होती. या प्रकरणी मृत दाम्पत्याची मुलगी अश्विनी अमर खरात यांनी सासवड पोलीस ठाण्यात फिर्याद दिली. त्यानुसार गणेश सुभाष धिवार (वय २७, रा. पानवडी) याच्याविरुद्ध गुन्हा दाखल करण्यात आला. प्राथमिक तपासानुसार, जनावरे घरासमोरून नेण्याच्या कारणावरून आणि गणेश विसर्जनाच्या दिवशी झालेल्या पूर्ववैनस्यातून हा प्रकार घडल्याचा संशय आहे.

हेही वाचा: Pradeep Purnekar Murder Case: पतीची ७ वेळा चौकशी, आता थेट माजी महापौर! पूर्णेकर हत्या प्रकरणाचा तपास ऐन वळणावर

येरवड्यापासून नसरापूरपर्यंत थरारक पाठलाग

तपासादरम्यान संशयित खराडी परिसरातून चारचाकी वाहनाने साताऱ्याच्या दिशेने जात असल्याचे तांत्रिक तपासातून स्पष्ट झाले. त्यानंतर पोलिसांनी येरवडा, लक्ष्मीनगर, खराडी, कोंढवा, नवले ब्रिज आणि खेड शिवापूर टोलनाक्यामार्गे त्याच्या हालचालींवर बारीक नजर ठेवली. राजगड पोलीस ठाण्याचे वरिष्ठ पोलीस निरीक्षक संतोष जाधव आणि त्यांच्या पथकाने खेड शिवापूर, नसरापूर पूल, कामथडी पूल, कापूरव्होळ आणि धांगवडी परिसरात नाकाबंदीचे नियोजन केले. नसरापूर–चेलाडी पुलावर संशयिताचे वाहन येताच सासवड पोलीस आणि राजगड पोलिसांनी संयुक्तरीत्या वाहनाला घेराव घातला. या कारवाईदरम्यान पोलीस कर्मचारी राहुल भडाळे यांनी INSAS रायफलच्या सहाय्याने संशयिताला शिताफिने नियंत्रणात आणले.

आरोपीची गुन्हेगारी पार्श्वभूमी व पुढील तपास

पोलिसांनी दिलेल्या माहितीनुसार, संशयित गणेश धिवारविरुद्ध यापूर्वीही काही गुन्हे दाखल आहेत. यामध्ये चंदननगर पोलीस ठाण्यात २०१७ मध्ये दाखल असलेला अपहरण, लैंगिक अत्याचार आणि पॉक्सो कायद्याशी संबंधित गंभीर गुन्हा, तसेच बंडगार्डन पोलीस ठाण्यात २०२३ मधील एका गुन्ह्याचा समावेश आहे. सध्या सासवड पोलीस या प्रकरणाचा सखोल तपास करत असून, हत्येमागील नेमके कारण, वापरलेले हत्यार आणि इतर तांत्रिक बाबींचा शोध घेतला जात आहे.

हेही वाचा: Guwahati Shooting News: गुवाहाटीत रक्तरंजीत थरार! हॉटेलमध्ये बेछुट गोळीबार; महिलांसह ६ जणांच्या हत्येने खळबळ