पुण्यात भावंडांवर टोळक्याचा हल्ला, तीक्ष्ण शस्त्राने सपासप वार; कारण…

पुण्यातील धानोरीत वैमनस्यातून टोळक्याने भावंडांवर तीक्ष्ण शस्त्राने वार केल्याची घटना घडली आहे. याप्रकरणी पोलिसांनी टोळक्यावर गु्न्हा दाखल केला आहे.

पुणे : राज्यात गुन्हेगारी वाढली असून, दररोज राज्यातील वेगवेगळ्या भागातून खून, मारामाऱ्या, दरोडे यासारख्या घटना घडत आहे. यामुळे नागरिकांमध्ये प्रचंड भिती निर्माण झाली आहे. अशातचं आता पुण्यातून एक मोठी बातमी समोर आली आहे. पुण्यातील धानोरीत वैमनस्यातून टोळक्याने भावंडांवर तीक्ष्ण शस्त्राने वार केल्याची घटना घडली आहे. याप्रकरणी पोलिसांनी टोळक्यावर गु्न्हा दाखल केला असून, एकाला अटक केली आहे.

पंकज कुमार आणि साहू कुमार (दोघेही रा. मुंजाबा वस्ती, धानोरी) अशी गंभीर जखमी झालेल्यांची नावे आहेत. याप्रकरणी राजेश राधेश्याम गुप्ता (वय ४०, रा. धानोरी) याला अटक करण्यात आली आहे. त्याचे साथीदार नितीन गुप्ता (वय २५), आकाश गुप्ता (वय १९) यांच्यासह तिघांवर गुन्हा दाखल केला आहे. याबाबत राहुल कुमार गौतम (वय २३ रा. मुंजाबावस्ती ) यांनी विश्रांतवाडी पोलीस ठाण्यात तक्रार दिली आहे.

पोलिसांच्या माहितीनुसार, पंकजकुमार आणि आरोपी गुप्ता यांच्यात काही दिवसांपुर्वी वादविवाद झाले होते. त्याचा राग गुप्ता कुटुंबीयांत होता. शुक्रवारी (२५ एप्रिल) रात्री गुप्ता यांनी पंकजवर तीक्ष्ण शस्त्राने वार केले. त्यावेळी पंकजचा भाऊ साहूने भांडणात मध्यस्थी केली. टोळक्याने त्याच्यावरही शस्त्राने वार केले. टोळक्याने केलेल्या हल्ल्यात पंकजकुमार व त्याचा भाऊ साहू हे गंभीर जखमी झाले. या घटनेची माहिती मिळताच पोलिसांनी घटनास्थळी धाव घेतली. दोघांवर रुग्णालयात उपचार सुरू आहेत. पोलीस उपनिरीक्षक ताराचंद सुडगे तपास करत आहेत.

प्रेमसंबंधाच्या कारणावरून तरुणावर हल्ला

अल्पवयीन मुलीशी प्रेमसंबंध असल्याच्या कारणावरून मुलीच्या नातेवाईकांनी तरुणास नग्न करून लोखंडी रॉडने बेदम मारहाण केल्याचा संतापजनक प्रकार उघडकीस आला आहे. सौरभ भरमा कांबळे (वय २४, रा. निढोरी, ता. कागल) असे अपहरण झालेल्या तरुणाचे नाव आहे. याप्रकरणी तिघांना अटक करण्यात आली आहे. तर अल्पवयीन मुलीने दिलेल्या फिर्यादीवरुन कांबळे याच्याविरुद्ध मुरगूड पोलिसांत गुन्हा दाखल करण्यात आला.