Sindhudurg Crime News: दोन दिवस बेपत्ता, जंगलात मृतदेह; महिला हवालदाराच्या पतीला अखेर बेड्या

कणकवली पोलीस ठाण्यातील महिला हवालदार स्मिता माने यांच्या संशयास्पद मृत्यू प्रकरणात मोठी कारवाई झाली आहे. दोन दिवसांपासून बेपत्ता असलेल्या स्मिता यांचा मृतदेह जंगलात आढळल्यानंतर पोलिसांनी त्यांच्या पोलीस कॉन्स्टेबल पती सचिन माने याला अटक केली आहे.

• महिला हवालदार स्मिता माने दोन दिवसांपासून बेपत्ता
• बिडवाडी-हुंबरणे जंगलात संशयास्पद अवस्थेत मृतदेह
• पती सचिन माने याला पोलिसांकडून अखेर अटक

 

सिंधुदुर्ग : सिंधुदुर्ग जिल्ह्यातील कणकवली पोलीस ठाण्यात कार्यरत महिला हवालदार स्मिता माने यांच्या संशयास्पद मृत्यू प्रकरणाला अखेर नवे वळण मिळाले आहे. या प्रकरणात स्मिता माने यांचे पती आणि स्वतः पोलीस कॉन्स्टेबल असलेल्या सचिन माने याला कणकवली पोलिसांनी सोमवारी रात्री उशिरा अटक केली. या कारवाईमुळे पोलीस दलासह परिसरात खळबळ उडाली आहे.

दोन दिवसांपासून होत्या बेपत्ता

मिळालेल्या माहितीनुसार, स्मिता माने मागील दोन दिवसांपासून बेपत्ता होत्या. त्या कुणालाही न सांगता घराबाहेर पडल्या होत्या. त्यामुळे त्यांचा शोध सुरू होता. अखेर बिडवाडी-हुंबरणे परिसरातील दाट जंगलात त्यांचा मृतदेह संशयास्पद अवस्थेत आढळून आला. मृतदेह आढळल्यानंतर पोलिसांनी तो शवविच्छेदनासाठी कोल्हापूर येथील सीपीआर रुग्णालयात पाठवला. शवविच्छेदन अहवालानंतर त्यांच्या मृत्यूचे नेमके कारण स्पष्ट होण्याची शक्यता आहे.

पतीवर छळाचा आरोप

दरम्यान, स्मिता माने यांच्या बहिणीने पोलिसांकडे दिलेल्या तक्रारीत पती सचिन माने याच्यावर गंभीर आरोप केले आहेत. सचिन हा स्मिता यांचा सातत्याने शारीरिक आणि मानसिक छळ करत असल्याचे तक्रारीत नमूद करण्यात आले आहे. या त्रासाला कंटाळून स्मिता यांनी आत्महत्येसारखे टोकाचे पाऊल उचलले असावे किंवा त्यांच्या मृत्यूमागे घातपात असण्याची शक्यता असल्याचा संशय नातेवाईकांनी व्यक्त केला आहे. त्यामुळे या प्रकरणाचा तपास त्या दिशेनेही केला जात आहे.

हेही वाचा: Pune Crime: १३ तोळे सोने दिले, तरी छळ थांबेना; आयटी अभियंता विवाहितेचा मृत्यू

रात्री उशिरा पतीला अटक

प्राथमिक तपास आणि नातेवाईकांच्या तक्रारीच्या आधारे कणकवली पोलिसांनी सोमवारी रात्री सुमारे पावणेनऊच्या सुमारास सचिन माने याला अटक केली. सचिन याला मंगळवारी न्यायालयात हजर केले जाणार आहे. या प्रकरणाचा पुढील तपास कुडाळ पोलीस ठाण्याचे पोलीस निरीक्षक विकास बडवे यांच्याकडे सोपवण्यात आला आहे. शवविच्छेदन अहवाल आल्यानंतर तपासाला अधिक दिशा मिळणार असून, स्मिता माने यांच्या मृत्यूमागील नेमके कारण आणि परिस्थिती स्पष्ट होण्याची शक्यता आहे.