मैत्रिणीवरून वाद, मित्राच्या मानेवर वार करून खुनाचा प्रयत्न; आरोपीला सुनावली ‘ही’ मोठी शिक्षा

मित्राच्या खुनाचा प्रयत्न करणाऱ्यास सत्र न्यायालयाने दहा वर्ष सक्तमजुरी आणि पन्नास हजार रुपये दंड ठोठावला आहे. जिल्हा व अतिरिक्त सत्र न्यायाधीश के. डी. शिरभाते यांनी उपलब्ध पुराव्यांच्या आधारे आरोपीला दोषी ठरविले आहे.

• मैत्रिणीवरून झालेल्या वादातून मित्राच्या खुनाचा प्रयत्न
• मानेवर धारदार शस्त्राने वार; रिक्षाचालकामुळे वाचला जीव
• आरोपी किरण थोरातला सुनावली मोठी शिक्षा

पुणे : राज्यासह देशभरात गुन्हेगारी वाढली असून, वाढत्या गुन्हेगारीमुळे नागरिकांमध्ये दहशत निर्माण होत आहे. गुन्हेगारी रोखण्यासाठी पोलिसांकडूनही प्रयत्न सुरु आहेत. अशातच आता मित्राच्या खुनाचा प्रयत्न करणाऱ्यास सत्र न्यायालयाने दहा वर्ष सक्तमजुरी आणि पन्नास हजार रुपये दंड ठोठावला आहे. जिल्हा व अतिरिक्त सत्र न्यायाधीश के. डी. शिरभाते यांनी उपलब्ध पुराव्यांच्या आधारे आरोपीला दोषी ठरविले आहे.

 

किरण शिवाजी थोरात (वय २८, रा. भोसरी) असे शिक्षा सुनावण्यात आलेल्याचे नाव आहे. त्याच्यावर अभिषेक कांबळे याच्या खुनाचा प्रयत्न केल्याचा आरोप ठेवण्यात आला होता. सदर गुन्ह्याची घटना १ जानेवारी २०२१ रोजी भोसरी येथे घडली होती. घटनेच्या आधी एक महिन्यापुर्वीच आरोपी आणि जखमी यांची ओळख एका मैत्रिणीच्या माध्यमातून झाली होती. त्या मैत्रिणीबद्दलच्या वादातून मनात राग धरत किरणने फोन करून अभिषेकला बोलावून घेतले. दोघे भोसरीतील टेल्को रोडवर दुचाकीवरून जात होते. किरणने गाडी थांबवायला लावली. गाडी थांबताच त्याने अभिषेकचे डोके पकडून त्याच्या मानेवर धारदार शस्त्राने वार केला. जवळपासचे लोक येताच किरणने पळ काढला. एका रिक्षाचालकाने अभिषेकला लगेच रुग्णालयात नेल्याने त्याचा जीव वाचला होता. या घटनेमुळे मोठी खळबळ उडाली होती.

हे सुद्धा वाचा : राणा सूर्यवंशी हल्ला प्रकरणाला नवे वळण, पोलिसांना आला ‘हा’ मोठा संशय; कसून तपास सुरु

या खटल्यात सरकार पक्षाच्या वतीने प्रेमकुमार अगरवाल यांनी बाजू मांडली. आरोपी स्वतःसोबत धारदार शस्त्र घेऊन आला होता, यावरून त्याने मारण्याची पूर्ण तयारी केली होती. तसेच, गळ्यासारख्या नाजूक भागावर वार केल्याने त्याचा हेतू अभिषेकचा खून करण्याचाच होता असा सरकार पक्षाचा दावा न्यायालयाने ग्राह्य मानला. अभिषेकला वेळेवर वैद्यकीय उपचार मिळाले नसते, तर त्याचा मृत्यू झाला असता, अशी डॉक्टरांनी दिलेली साक्ष महत्त्वाची ठरली. आरोपीचे नुकतेच लग्न झाले असून त्याची पत्नी गरोदर असल्याने शिक्षा कमी करावी, अशी विनंती बचाव पक्षाकडून करण्यात आली. मात्र, गुन्ह्याचे स्वरूप गंभीर होते. त्यामुळे न्यायालयाने मोठा निर्णय दिला आहे.

हे सुद्धा वाचा : इथेनॉल खरेदी बंदीने साखर उद्योग संकटात; हर्षवर्धन पाटलांची केंद्र सरकारकडे मोठी मागणी